Gõykar Mars Planet-ar Pavlo Zalear Ek lakh odik lok, 2022 vorsant Mongollarcher (Mars Planet) vochpak fuddem sorla. Ani hatuntle 8 hozar vhoiruch Bharoti lokan Mars One hea nanvache songhottnnen aplim nanvam dileant. Hatunt Gõykar kitle asat? Hem nischitponnim gomun ailem nam. Hi zaun asa ek one way ticket. Mhonnchem, Mongollarcher vetole lok, ken’nach sonvsarant portean pavchenam. Hea kottkotti ani umott sonvsarak fatt korun gireacher (planet) vetolea lokan, 8 vorsamastronaut zaunchea khatir khub trasanchem training ghenvche poddtolem. Sonvsarantleant Mongollarcher ek vosti (colony) bandttolea zagear pavunk, 7 tem 8 mhoinnem lagtole. 1978 vorsantlea famad Eruption, hea songit pongddanchem One way ticket nanvanchem ek git aslem. Ani hea gitantlim thoddim bhov utram oxim aslim. Choo, choo, train a tracking down the track Gotta travel on, ain’t never coming back Ooh, ooh, got a one way ticket to the blues Mhatea velean vetoli bhatmi potrancher vachun ani TV-cher pollevn khorench ho prokolp (project)suvoll zatolo vo nam? Velluch sangtolo. Mon’xanchem ginean itlem fuddem pavlam, nokrantlo Lucifer choddui korit zalear, ifernant air condition bosovpachi vevostha zateli. Ten’nam ontoskornache monis hea sonvsarant amkam mellunk chodd kothin zatlem. Ani heach khatir Mongollarcher vochpachi sonvsarantlea lokachi yevzon kai? Ani chukon Gõykar gireacher vo planet-acher pavle tor, aplea borobor kurle sarkeli vagnnuk asa ti ghevn vetole kai? Thoddea Gõykarancho ego. Tanchean, dusro Gõykar vhoir sorlolo pollevnk zainam. Punn bhailea vo ghantteank sogllo sohokar divnk toyar. Dusrea Gõykaranchem yex pollevn, thoddeank jirvonn sarki zainam. Punn On-õykaranche (non-Goans) zoit (success) fogotteo marun khuxallkay porgottole. Xezarchea gorib gorabeantlo porikxen poilea zagear ailolea xikpeak, nidukayechem chempnnim (vozon) ghalun fuddlea xikxonn korchelo magr bond kortole. Oslim udaronam ditolo zalear zaitim asat. Punn sodeak ekuch proxn mhaka sotovpak lagla ani to mhollear, khorech Gõykar Mongollarcher pavlear nid’dukai, kuskeaponn, nosai ani hanvponn (ego) ghevn vetole?
Lino B. Dourado
