Mhojim Utram Tachim Dukham Karwarcho ek ixtt mhozo. Poir tedus tannem fon khelo. Tagelea eka ixttachea logn ekvottak poilem bhurgem zolmolelem. Ani porchea Sunkrarak, Setebrache 20ver mottea gonngonnan, poracho poilo zolm dis monovpant aslo. Mhojea ixttachi vinonti. Poilea zolm disachem kantar boroun dinvchem.
Mhojea ixttan mhaka vell divnk nam. Vhoddlea disak vo zolm disak char dis asle. Mhojea kama fuddem mhaka kantar ghoddunk vell komi poddtalo. Tori astana mhojea ixttacho agro. Ek verse ani ek chorus tori kantar ghoddchem. Tachi khor magnnem (request) aslem. Hanvem utor dilem. Komputorar type korunk boslom ani 5 minutam zavnche adinch mhozo khaxallo sur (tune) bosoun, ekverse ani ek chorus kantar sompoilem ani tagelea emailir pavtti kelem. To ojeapun poddlo. Itlem fast kantar ghoddlem? WhatsApp-sacho vapor korun kantara soit tune maglo. Sunkrar. Ratchea Sumar 8.30 vorar…. “Kitem zalem? Kantar borem naslem?”, mhojea Karwari ixttacho fonn gomonam fuddem, hanvem moskorean vicharlem “Na re baba. Kantar borem zalem mhunn fon kela. Kantar suru korchea adim, lyrics tujim mhonn, Anusia birthday girl-achea bapain tujem nanv jahir kelem. Tum ek Gõykar lekhok ani kovi mhunn kollit kelam” “Arre bap re! Chodduch vhoir ubarun dovorlo mhaka. Itlea tenkxer vorcho nhi re. Sokoll aptunche unnem nam” Mungllukar ani Karwarkar git gavunk machier choddtana, sodanch kantar borovpeachem nanv jahir kortat. Hi ek tanchi kortovea hanvem, United Club of Utorda-Kuwait ghoddun haddpi Ek Anki Nattkulea Spordhen onnbhovlea. Hi tanchi chal, xeboi marpa sarkeli. Dusreanchim kantaram gavpi Gõykar kantoristanim, tanchea koddlean zaitem xikchem asa. “Ghe re! Salu tuka dhinvasunk sodta. Tachea lagim uloi”, tagelea ixttachem nanv Salu aslem. “Hello….”,Salun zap keli punn taka fuddem ulovpak dinastana, mhojem pemprem vazoilem. “Porbim tumkam avoy bapaik. Devan tumchea ballkak kherit shub-vortea dhenneamni borum. Devache kurpen ani Saibinnichea axirvaddan tem vhodd zaum” “Dev Borem Korum baba. Tujem kantar mhojea kallza meren pavlem. Hanvem Diogok (mhojea ixttachem nanv) sanglem, tuje abar attovpak fon korunk zai”, ani mhoje dhinvas attoile ani fon kaddun mhojea ixtt Diogo lagim dilo. “Aikota baba…” “Tum sangot rav. Hanv aikotam” “Kal, ami kantarachi sottasott practice keli. Salu tor, sogllea umedichea bollan, kantar xiklo, punn aiz tannem kantar….” “Kantar mhonnonk nam?” Tachem sompche adim mhozo proxn “Na re. Kantar mhonntam mhonntam Salu bhavnnik (emotional) zalo, ani roddun roddunk laglo” “Punn hanvem roddpa sarkem kantar….” “Toxem nhi re. Kantarachim utram tanchea bhavnnam (feelings) uktalim. Khorench re. Tujea kantarantlim utram konnachai kallzak hat ghalpa sarkim asat re. Tuka kantaram rochpachem dhennem…..” (mhoji odik thonnay mhojea ixttan kel’li ti hangasor mhaka kolit korun, mhojench thambddem mhunn sangpachem naka) Mhojea ixttan sanglam tea pormonnem hanvem git rochlem. Salu ani tache ghorkarnnink hem poilem cheddum-ballok. Tanchi khuxallkay sorgak tenkloli. Ani hea khuxallkayen hanvem boroilolem kantar gaitana to sapuch udhas zaun dolleantlean ghosghosxeanim bhavnnik dhukam vhanvlim khoim. Kantar Ekuch amcho sad ani ekuch amcho anand jivitan bhitor sorla Amchem kazari jivit rikami aslem bai, tem tuvem bhorun ghetlam. Devak argam ditam Tachim dennim vakhantana tuka ami svikar kelam Argam Jezuk, argam Mayek; hem ballok tumchea upkaran favo zalam. Anusia bai, Anusia bai tuzo porzoll amchea kazari jivitar fankarlo Tum amchem modem yevun eka avoy bapaycho man amkam favo zalo. Devache upkaran famil-ixttam sangatam amkam anand bhogta vhoddlo Mummy Daddy mhonnpak hea amchea ghorant tuzo avaz sontos haddtolo. Lino B. Dourado .
