Romi Lipi Niticho Panvddo Choddtanam… II - Jose Salvador Fernandes Halinch, muttbhor Devnagorivaleamni sodanche porim apli zat-kat ani motteponn samballun dovrunk, Kala Academycho Romi lipiechea pustokak aslolo vegllo Sahitya Puroskar bond korunk anik ek buniyad ani kholay naslolem karonn sodun kaddlam. Karonn oxem – Kala Academyn Romi lipientlea pustokank vegllo Sahitya Puroskar divpachem tharaun, Konknnicheo don bhaso keleat! Kala Academy khub kalla adim thaun Romi lipiechi veglli osmitay asloli Tiatr Spordha ani Devnagori lipientlean boroylolea Konknni Nattkanchi Spordha ghoddoun haddta. Gitanchi Spordha ani kuxin Kantaranchi Spordha gheta. Muttbhor Devnagorivaleanche nodrentlean hacho vichar korit zalear, Kala Academy hanga-i Konknnicheo don bhaso korta oxem zata! Punn hea spordhank tancho virod nam. Zalear, Kala Academy Romi lipientlea pustokank vegllo Sahitya Puroskar divpachem tharayta takach tancho virod kiteak? Zap itlich: Romi lipientlea sahityacho dusvas. Romi lipi anik-ui fulun Devnagorik dhokeachi tharot hi bhirant! Az Gõyant Konknnichea don-ui lipinchem ugtem zhuz cholta, tachim pallam-mullam Devnagorik lagun Romicher zalole onitent asat hem addeche suttke zhuzari mandun ghenant mhonn tem kitem sot asloli fott zainam. 1976 vorsa Sahitya Akademi, Novi Dil’li hinnem Konknni bhaxek maneotay dili. Ti maneotay melloun gheunk Devnagorivaleamni Sahitya Akademi mukhar Romi lipientlea pustokancho mandd patllaylo. Sahitya Akademin Konknnik maneotay dili, pun lipiecho matui ul’lekh korunk nam. 1981 vorsa Novembrache 21ver zalole Sahitya Akademiche Konknni Sol’lagar Somitiche zomatint, zantum Devnagorivaleanchem bhoumot aslem, tea vellar tannim khottea hetun Devnagari hi Konknnichi lipi asunk zai mhonn sanglem. Tednam thaun Sahitya Akademin Devnagori hi Konknnichi odhikrut lipi mhonn mandun ghetli. Dekunuch, az Sahitya Akademicho Konknni Sahitya Puroskar Devnagori lipientlea pustokak soddun dusre khuinchech lipiechea pustokak mellonam! Gõycho Rajbhas Kaido pas korunk gõykaramni akantachi chollvoll keli. Tantum 95 ttok’ke Romi lipientlo lok aslo hem khuinchoch advogad dhovem aslolem kallem korunk xokonam. Itihas taka govay asa. Torui, he chollvollentlea itlea-i Romi lokak matui vas lagunk dinastanam, choriam ratiam modim “Konknni mhollear Devnagori lipientli Konknni” oxi vyakya tharaun ani Romik bhairaun, tannim Gõycho Rajbhas Kaido pas korun ghetlo. Kala Academycho Sahitya Puroskar Romi lipientlea pustokank diunk survat korpacho porot-porot vixoy zomatimni yetalo. Tednam, khuinchech poristhitint to Puroskar Romi lipiechea vantteak yeuncho nhoi mhonn, modemkot tea muttbhor Devnagorivaleamni anik ek khotti yevzonn ankloli ticho hanga mud’dom ul’lekh korcho poddta. Tea Puroskara khatir Kala Academy Konknni – Romi ani Devnagori lipientlim – pustokam magun ghetali. Him pustokam Puroskara khatir topasunk, teg zonnanchim don monddollam astalim – ek Romichem, dusrem Devnagorichem. Don-ui monddollamni ek-ek pustok vinchun ditoch, tim don-ui pustokam – ek Romichem ani ek Devangorichem – tisrea ani xevottachea porikxok monddollak ditali. Hea monddollant dog Devnagoriche zalear, ek Romicho porikxok astalo. Magir puroskar konnak favo zatolo tem vegllem sangpachi goroz asa? Hi-ui, Romi lipiecho dusvas korpi yevzonn muttbhor Devnagorivaleancheach monamni xizun bhair sorloli! Voilea gozalincho vichar kelear, Konknnichio don bhaso korpachi vankddi buniyad tea muttbhor Devnagorivaleaninch ghaloli, ani tech buniyadicher tannim Devnagorichem vegllem ani vankddem ghor ubarlam mhonn thavem zata. Ani atam, Romi lipieche buniyadicher nitin ani hok’kan Konknnichem vegllem ghor ubem zata zalear, hannim apli nid itli kiteak foddunk zai? Mon’xak khuim korta tea mapan bhogpachem-i asta. Muttbhor Devnagorivaleamni Romi lipiecher adarlole oniticher atam nitichem poilem mortel poddlam, ani tankam tachi khub duk-ui zalea. Ti duk sospachi tanche kodde atam itli-i tank urunk nam. Urtoli koxi? Itlo kall Romi nam-nopoyt korunk tannim ti sabar torenim khorchili ani sompoyli! Punn Romi mat jivich urli! .
