Mejuah-juah man banta permilis, salam kampanye man kam caleg-caleg simehamatÂ…
Enterem tuhu senembas enda kade-kadenta jadi caleg, lit caleg i tingkat kabupaten, provinsi ras bagepe tingkat pusat. Erbage parte si ncalegken ia, lit parte si bersifat agama (gia parte perbegu lenga lit), lit ka parte si bersifat nasionalist. E me sada tanda makana kita Kalak Karo kepeken enterem beloh nampilken bana kutengah-kutengah perpolitiken negaranta. Selaku kalak karo, ermegah ate me ukurta, dingen erpengarap maka ibas pemilu legislatip enda pagi kerinanalah min ia terpilih. Gelah alu bage, reh hangkena suku-suku sideban nandangi kita kalak Karo, e me sada pengarapenta simbelinna, ambah-ambah ngarapken maka negaranta reh majunalah idur pengarak-ngarakna pepagi. Erpengarapen saja tentu labo lit ertina adi la kita ikut milih ia, emaka mari dage ersikap-sikap kita, erpenginget kita, gelah ibas pemilu e pagi ula lupa milih caleg Karona. Adi la kita tading ibas daerah pemilihenna, ula lupa mpersingetti kade2nta sini je. Io'oh, kuinget ka lagu siadi pe rempet "Kalau anda pilih menantu.." Bas musim pemilu enda salih me laguna: "Kalau anda datang ke bilik pemilu, pilihlah ia caleg Karona." Sentabi, tah bagi sikanam-kanam gia akapndu aku, bas pusuh nari kel nge sikubelas. Bagi katanta nda, labo min simeseranda kel setuhuna milih caleg Karona ndai, ma bage kin? Persoalenna kepeken la ka bo mesunah bagi engkusur nakan. Salin kata temanta ibas postingenna piga2 wari silepus, ibas piga-piga daerah pemilihen la saja sekalak ngenca caleg Karona ndai. I Kabupaten Karo kin pe kap, menam kerina calegna kade-kadenta Karo ndai. Siapai me dage sipilh? Siapai sirekomendasiken gelah ipilih? Kerinana Kalak Karo, kerinana kade-kade. Saja adi khusus kel man kita permilis, adi lit sibage rupana, adi ningku pilihlah ia si anggota milis active. (paling tidak e me sada bukti kepedulianna man kalak karo). Bage me nina pusuhku. Adi bagepe lit ka lebih asangken sada caleg, uga ka? Ea'ah gelah ula nilah bas kalak karo nari "tuak" ken, bage naring nge ningen, lang uga ninta? Pala pilihlah si manisna ningen? Sendalanen ras sie, piga-piga wari silepus, secara pribadi lit dua kade-kadenta mindo gelah dua kalak caleg i sosialisiken ilingkungen kalak Indonesia California. Gendekna, isuruh menda aku erkampanye, engkampanyeken dua kalak caleg, sada kalak Karo Asli, adi kalak karo ma kade-kade naring, sada nari la kalak karo, diberuna kalak karo, rembang ka kade2 ndeher denga ka kel kepe. Untungna, sada calon dpr, sada nari calon dpd. Bicara la mindai bage, uga me akapndu kubahan bangku, ma ituakken nda nari ka me. Bujur Selamat berjuang man kam caleg Karona simehamat.
