Hodíe es li anniversarie del nascentie de Alphonse Matejka, nascet in 1902-01-09.
In Cosmoglotta B 11 (1937-06), Ilmari Federn dedicat le li sequent articul, pos su adhesion a Occidental: ____ Ti eminent Idist, quel just ha definitivmen transit a Occidental, deve esser regardat, quam on regarda un activ politico, avan li dinamic funde de su partí, continui, penosimen opresset schismatic luctas inter li divers ales e nuancies. In 1928, acri polemicas inter reformistes e conservatores dat acut expression al cronic schisma in Ido. Ahlberg in Stockholm, li reformistic redactor de «Mondo» e secretario del «Uniono por la Linguo Internaciona», fat li unesim passus secessionistic, queles plu tard vat ducter le a Novial; e Noetzli in Zürich, li conservativ redactor de «Ido», creat li contra-union «Uniono Idista». Tande aparit sur li scene li triumviratu de Paris: Mauney, Matejka, Papillon, queles, sub continui ataccas del extremistes de ambi láteres, successat reconciliar li elementes moderat, reorganisar li form ancian del «Uniono por la Linguo Internaciona» e refundar li ancian revúe «Progreso» quel hat cessat aparir in li guerre mundal. Matejka devenit secretario del union e chef-redactor del revúe. Til tande conosset solmen al strett circul de amicos, il subitmen havet in manus li du max responsabil functiones del Ido-movement. Il ne deceptet li confidentie posit in le: durant su function il ha fat un enorm labor administrativ, publicat excellent belletristic traductiones e multissim contributiones linguistic. «Progreso» refundat es plen de su labor; it vell esser van pena citar ci. In ultra il havet ampli corespondenties plen de san rason e diplomatic conciliantie. Occidental hat aparit sur li camp e disputat con success a Ido li championatu de lingual perfection. Un númere de progressistic Idistes hat transit bentost. Li conservatores preferet in comensa tacer e luder li struce. In fine to ne suficet e ili provat exorciser li diábol. Lor maniere de polemica es conosset al letores de «Cosmoglotta», e anc li nociv resultates de tal polemica por li reputation del Ido-movement e li númere de su adherentes. Presc unic Matejka defendet li lingue, a quel il servit, per li brilliant espade del cavaliero. Sub li bellsonant pseudonim «Franko Veramido» (quel posse interpretar se circa: «ti quel ama francmen dir li veritá») e sub su propri nómine il publicat seriosi criticas pri Occidental, queles dat dur labor al plumes respondent. Si li ortodox Idistes credet trovar in Matejka un confederat, ili ha miscomprendet ti polemicas. Matejka nequande esset un fanatico del ideologie, ni nequande efortiat defender coses índefensibil. Just to dat fortie a su argumentes; e su criticas ne esset directet tam contra li principies e li form del lingue Occidental, quam contra exagerat formes de propaganda -- e pri ti punctu probabilmen ni un sol propagandist es pur de peccas. Matejka ne oposit a Occidental li Ido in su form present, ma ti lingue quel on vell, secun su opinion, posser far ex Ido. E to es un lingue, quam li fideles del classic Ido vole per omni medies impedir intrar in existentie. Pri ti «lingue quel on vell posser far ex Ido» il havet plu minu definit conceptiones. Nam poc a poc, malgré su rol quam conciliator mediant inter li partises, il inclinat al partise progressiv. Ne a ti savagi e utopic reformardes queles permisset al ortodoxes ornar se per li glorie esser defensores del classic Ido. Ma in private, s-u cordie apartenet a ti progressistic gruppe quel per moderat e reflectet reformes tendet a aproximar Ido a Occidental e Novial. Su ultim linguistic contributiones in «Progreso» clarmen monstra to. Ti gruppe provat realisar su desires. Li secretario del Academie redactet radical administrativ preparationes por executer per fortie li linguistic reformes queles il considerat necessi, e Matejka publicat les in «Progreso». To reinflammat li schisma ardent sub cindre. Un oposition cristallisat se in quel yo bona fide ludet un rol quel yo hodie regreta. Li schisma ne devenit publicmen conosset extra li _Idistaro_, e it ne es mi tache dar detallies pri un idistic afere intern e finit. Noi, li oposition, havet rason de formal vis-punctus; tro tard yo comprendet que Matejka e li altres havet rason in li fines ideal e esset plu sagaci e prevident quam mi consiliatores. Li afere finit per un transaction e plebiscite, e li oposition obtenet abolition del administrativ reformes combattet e introduction de altri administrativ reformes desirat de it self. Li factes es leibil in «Progreso» 1932/33. Ma, pro formalitás, Ido perdit li chance reobtener un bon plazzament in li combatte pri perfection lingual. Matejka obliviat li conflictes e devenit un comprensiv e fidel amico al ex-opositor. Supercharge per labor debilisat su sanitá, maladie fortiat le renunciar a su functiones. Li electiones del U.L.I. in 1934 posit representantes del classic Ido in li plazzas vacant. Matejka nequande esset un «reyent», ma, quam omni ver mundlinguist, un «servitor» de su idé e movement. Il ha servit fidelmen, fidel in li nobil sense del parol, nam su fidelitá ne consistet in steril adoration de dogmas o libres, ma in abnegant execution del responsabil labor por un movement, ancor quande su inteligentie e experientie ja hat comprendet que li actual ideologie de ti movement esset un scolastic utopie. In fine il videt, que li idealic lingue, esperat, trans li real labor omnidial, in li fine del aspirat linguistic evolution de Ido, es sub li present conservativ regime de Ido plu lontan quam jamá. Interlinguistic studies hat dat le un fundat conossentie de Occidental, quel modificat poc a poc su opiniones. In corespondenties con Occidentalistes il monstrat un astonant elegantie in practic aplication de Occidental. Noi saluta in nor ranges li ínfatigabil laborator por li idé, li honest e brilliant polemic sportmann, quel, pos har se battet por li colores de su club con fortie, elegantie, e fairness, prende li manu del ex-adversario quam amico. ____ -- Marcos Cruz http://alinome.net -- ne.alinome.net -=-=-=-=-=-=-=-=-=-=-=- Groups.io Links: You receive all messages sent to this group. View/Reply Online (#70): https://groups.io/g/interlingue/message/70 Mute This Topic: https://groups.io/mt/69577241/21656 Group Owner: [email protected] Unsubscribe: https://groups.io/g/interlingue/leave/5161842/2010256328/xyzzy [[email protected]] -=-=-=-=-=-=-=-=-=-=-=-
