In 1949-09-01 li lingue Occidental esset oficialmen renominat "Interlingue". Dunc hodíe es li 75-essim anniversarie!
"Occidental" esset un bon nómine descriptiv por nor lingue, malgré que it es un adjective tre comun, quo es un desavantage in cert contextus. "Interlingue" have li grand avantage esser un parol unic e strax comprensibil; it have li litt problema de su similitá con "Interlingua", quel es li nómine de du lingues: ti de Peano (1903, nominat anc "Latino sine flexione"), ne plu usat fórsan desde c. un secul; e, plu grav, ti de IALA (1951), ancor usat. In fact li renomination de Occidental, ultra altri motives, alquant serchat ti similitá nominal a IALA-Interlingua por afacilar un possibil unification de ambi lingues, quo rasonabilmen esset tam ínpossibil ante 75 annus quam hodíe. Felicimen, yo pensa, on ne renominat nor lingue "Cosmoglotta", quel esset un del possibilitás, secun testimonie de Matejka, quel proposit ti nómine. Probabilmen nor lingue sempre va haver du nómines. -- Marcos Cruz http://alinome.net -- ne.alinome.net -=-=-=-=-=-=-=-=-=-=-=- Groups.io Links: You receive all messages sent to this group. View/Reply Online (#691): https://groups.io/g/interlingue/message/691 Mute This Topic: https://groups.io/mt/108217683/21656 Group Owner: [email protected] Unsubscribe: https://groups.io/g/interlingue/leave/5161842/21656/2010256328/xyzzy [[email protected]] -=-=-=-=-=-=-=-=-=-=-=-
