Baraya, bil khusus ka Kang Dian anu parantos ngabalada midamel Program
Computer (C) Aksara Sunda,
Aya talatah ti Abah Surya, waktu si kuring ngalaporkeun kamajuan warga
milist, khususna Kang Dian anu parantos ngabaladah midamel software Aksara
Sunda. Talatah teh perkara ngaran ieu Aksara Sunda, lamun tea mah arek
dingaranan sejen salian ti ngaran "Aksara Sunda".
Samemehna, Abah Surya teu kinten nganuhunkeunana sareng ngarojong ka Kang
Dian oge ka urang sadaya sangkan neruskeun ieu garapan anu kacida ageung
ajenna. Anjeunna oge sayogi pikeun nyalabarkeunana upama ieu software
parantos rengse.
Ngeunaan ngaran, saur Abah Surya, upama ieu aksara Sunda seja dingaranan,
saena sanes dingaranan ku "Ngalagena", namung ku ngaran anu sanes anu
langkung nyoko kana sajarah diciptakeunana ieu susunan Aksara Sunda. Aya 2
pilihan ngaran anu dipidangkeun ku Abah, nu kahiji: Aksara "Kaganga"; anu
kadua: "Aksara Ratu Pakuan". Kalawan pedaran nyoko kana sajarah, rasa jeung
aweuhan budaya, Abah ngusulkeun ngaran anu merenah pikeun Aksara Sunda
nyaeta : Aksara Pakuan. Pikeun kajelasanana, hayu urang pariosan-sakumaha
anu didugikeun ku Abah, sugan tepi ngaguarna deui- silsilah rupa-rupa ngaran
aksara anu kasebut di luhur, kaasup ngaran Aksara Sunda Ngalagena.
1. Aksara Ngalagena
Ari anu disebut ngalagana dina wacana budaya Sunda, khususna dina lebah
basa Sunda, eta satemenna runtuyan kalimah dina basa Sunda anu "vokal"-na
atawa huruf hirupna kabeh make huruf (konsonan) "a". Contona meureun siga
kieu: "Abah Ganda wayah asar mamawa ayakan anyar mapay-mapay ka sawahna.
Anakna, jang Kamad kalahka gagalayahan...jst. Pokona calawak lah lamun geus
nyarita make cara ngalagena mah. Pananyaan anu penting lebah dieu, lain
kumaha terusna eta dongeng Abah Ganda, namung kunaon ieu aksara Sunda (loba)
anu nyebut "Aksara Ngalagena"? sareng "ti iraha mimitina disebut "Aksara
Ngalagena"?.
Sigana anu jadi dasar nyebarna ngaran "Aksara Ngalagena" pikeun ieu susunan
aksara Sunda nyaeta buku anu muat ieu aksara anu judulna "Aksara Sunda",
seratan (anu nyusunna) Kang Tedi Permadi, Edi S. Ekadjati, Undang A. Darsa,
sareng Idin Baidilah. Ieu buku dipealkeun ku "Pusat Informasi Kebudayaan
Sunda dan PT. Granesia (grup Pikiran Rakyat)", Bandung, 1999 (Hatur nuhun
Kang Kandar, si kuring dipaparinan nambut ieu buku). Saba'da ngimeutan eta
buku, heunteu aya hiji katerangan anu nuduhkeun dasar hukum (tina hasil
kasuluyuan sarerea anu merhatikeung jeung anu boga otoritas) yen ieu
runtuyan aksara teh dikudukeun make ngaran "Aksara Ngalagena".
Anapon nuturkeun kana kandungan (B. Ind: secara tersirat) dina eta buku,
aya katerangan ngaran "Ngalagena" pikeun ieu aksara, sakumaha dina kaca
33-35, Bab Abjad. Sigana dumasar ieu katerangan, kabehieunakeun ieu aksara
jadi katelah salaku "Aksara Ngalagena". Urang cutat bae geura padalisan anu
ngandung kecap "Ngalagena" sabeuleugeunjeurna dina basa Indonesia tina eta
buku (kaca 33) supaya jelas:"
"2.3.2. Abjad
Berbeda dengan aksara Latin dan aksara Arab yang abjadnya satu huruf
(fonem), abja aksara Sunda dan jenis aksara lain merupakan pengembangan dari
aksara Palawa/Pra-Nagari berdasarkan satu suku kata (silabial). Dalam abjad
aksara Sunda dibedakan antara Aksara Ngalagena, Vokal Mandiri, Penanda
Bunyi, dan Angka. Aksara Ngalagena adalah lambang bunyi yang dapat dipandang
sebagai fonem konsonan, tanpa tanda-tanda yang menyatakan fonem vokal. Vokal
Mandiri adalah lambang bunyi fonem vokal yang berdiri sendiri, umumnya
digunakan pada posisi awal kata atau suku kata. Penanda bunyi atau Rarangken
adalah pelengkap Aksara Ngalagena yang berfungsi sebagai tanda vokalisasi
untuk mengubah vokal yang mengikuti Aksara Ngalagena atau berupa tanda-tanda
lainnya. Angka adalah lambang bilangan yang memiliki nilai hitungan dari
satu sampai nol."
Kacindekan: ngaran Aksara Ngalagena ngarupakeun sabagean tina susunan
Aksara Sunda sagemblengna (anu ngawengku Aksara Ngalagena, Vokal Mandiri,
Penanda Bunyi, jeung Angka). Kukituna, ieu ngaran teh heunteu pas upama
dijadikeun ngaran susunan abjad Aksara Sunda saggemblengna.
2. Aksara Kaganga
Upama tea mah susunan Aksara Sunda arek dingaranan ku hiji ngaran anu
ngawengku wujud abjad sagemblengna (ngawengku aksara, vokal, penanda bunyi
jeung angka), ngaran "Aksara Kaganga" bisa jadi pilihan. Ieu mah bane bae
lamun ieu susunan aksara merlukeun ngaran sejen atawa bisi kaburu kawentar
ku ngaran sejen anu henteu merenah disawang tina definisina (hal ieu
munasabah, sabab susunan Huruf Arab, upamana, boga ngaran sejen nyaeta
"Huruf Hijaiyah"). Ngan, ari ngaran "Aksara Kaganga" disawang tina kecap
jeung anu ngagunakeunanan rada universal alias heunteu khusus hiji susunan
aksara ti hiji seler (upama, aya oge susunan abjad ti seler sejen di urang
anu disebut oge ku ngaran "Kaganga").
Disebut universal, sabab ngaran "Kaganga" nuduhkeun runtuyan kaluarna sora
salaku sarana komunikasi manusa dina wangun huruf jeung basa dina basa
bangsa naon bae di ieu dunya. Ku cara sejen bisa disebutkeun yen "Kaganga"
nuduhkeun kaluarna sora anu digunakeun pikeun komunikasi sacara alami ti
satiap manusa. Pikeun guaran leuwih jero dina hal ieu, mangga bae pariosan
pedaran Abah Surya di web sundanet.com <http://sundanet.com> dina runtuyan
seratanana anu khusus ngaguara perkara aksara Sunda (oge kecap "kaganga" anu
judulna "Dangiang Aksara Sunda, Pemaknaan Filosofi terhadap Susunan (Abjad)
Aksara Sunda" di alamat ieu:
http://www.sundanet.com/arsip.php?page=2&cari=aksara kalawan runtuyan
sanesna di dinya (aya 5 runtuyan seratan).
Kacindekan, ngaran "Aksara Kaganga" pikeun susunan aksara Sunda rada kurang
pas, sok sanajan teu salah, sabab pacorok jeung ngaran anu sarua anu
digunakeun ku seler sejen pikeun aksarana.
3. Aksara Ratu Pakuan
Saterasna, Abah Surya ngusulkeun yen alusna, upama Aksara Sunda merlukeun
ngaran khusus, nya pingaraneunana teh taya lian ti "Aksara Ratu Pakuan".
Saheunteuna, ieu ngaran bisa disalabarkeun samemeh aya kacindekan hukum
(kawijakan/Perda) pikeun ngaran dimaksud. Ari anu jadi sabab atawa
silsilahna, numutkeun Abah, sabab aksara Sunda anu ayeuna nya anu
saheulaanan ayeuna kawentar salaku "Aksara Ngalagena" mimiti kapanggihna
nurutkeun anu katulis dina tulisan mangrupa naskah nyaeta dina naskah atawa
carita "Serat Ratu Pakuan". Ngeunaan ieu naskah, dimana kapanggihna, saha
anu nulisna, iraha ditulisna, jsb., ke urang tuliskeun deui sugan pareng,
ayeuna mah bilih panjang teuing ieu postingan. Anu jelas, "Serat Ratu
Pakuan" ngarupakeun bukti tinulis anu ngamuat ieu aksara Sunda anu ayeuna
geus diresmikeun di sagigireun prasasti-prasasti (Prasasti Kawali, jrrd).
Kacindekan si kuring: ngarojong kana usulan Abah, sangkan upama seja
dingaranana ieu aksara Sunda nya pingaraneunana merenahna nya ngaran "Aksara
Ratu Pakuan" tea. Sakumaha kasauran Abah, dina ieu ngaran aya komara jeung
dangiang udagan nuturkeun budaya jeung sajarah anu luyu jeung udagan
nanjeurkeun deui aksara Sunda.
Wallohu 'alam.
Cag.
Hapunten, ieu tulisan tangtu minuhan mailbox dulur sadaya.
Baktosna,
manAR
[Non-text portions of this message have been removed]
PENTING..!
attachment akan dihapus & tidak diteruskan kepada seluruh member.
dilarang beriklan. pelanggaran atas peraturan ini akan dikenai sanksi berupa
pencabutan membership.
terutama bagi pengguna ms outlook/outlook express, dihimbau untuk selalu
mengupdate antivirusnya.
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
