BODOR GARING
Kolom Sarabunis Mubarok
Rengse API-1, TPI nyusul tepus ku API-2. Audisi Pelawak TPI atawa API teh
geuning geus mere kelir anyar jeung pangaruh gede keur jagat bodor di
Indonesia kiwari. Lian ti kitu, API ge jadi pabinihan anyar keur
ngawawuhkeun jeung nuwuhkeun selah atawa motif bodor lokal ka panggung bodor
nasional. Katara pisan tina API-1 keneh, selah bodor calung, reog, wayang,
ludruk, ketoprak, lenong jeung selah bodor karikatural ala Patrio atawa
Cagur rembes kana pintonan para patandang ti saban daerah. Komo deui dina
API-2 mah, diramekeun ku patandang ti Sumatra, tangtuna bakal aya selah nu
beda ti selah-selah bodor di pulo Jawa.
SOS upamana, Grup bodor asal audisi Bandung ieu, tapis pisan ngagarap selah
bodor calung-reog jeung selah bodor cepot-dawala tina wayang golek. Tangtu
ieu jadi warna anyar keur pintonan bodor televisi jaman kiwari, nu salila
ieu kahegemoni ku selah bodor ludruk, ktoprak jeung lenong.
Selah-selah bodor eta teh, da mun ditilik-tilik mah ampir sarua.
Tatarucingan, sosoledatan (peleseten), pakeuekeuh-keukeuh, silih tipu, mawa
karep sorangan, bebelegugan, jeung selah bodor lianna, ampir kabeh
kitu-kitu keneh. Ngan pama dibandingkeun cara mawakeun khas calung jeung
khas lenong upamana, karasa beda pisan. Gestur, ekspresi jeung lentong oge
beuki karasa khasna, antara dina calung jeung dina ludruk, atawa antara dina
lenong jeung ketoprak upamana.
Ku ayana API, selah-selah bodor eta teh pagilinggisik. Malah mah aya nu
karasa jadi asa selah anyar kawas nu dipintonkeun ku grup Ngelantrur. Selah
ngabodor kawas pidato salah saurang pamaen grup ngelantur, anu mana
nyengclena kopeah jadi konci beda-bedana pidato, geus teu aneh deui dina
selah bodor calung oge, ngan cara mawakeunana nu beda. Karasa aya sababaraha
modifikasi selah-selah bodor tradisional, barijil dina API. Ieu salah sahiji
sisi positif ayana API.
Ngan orokaya, can karasa aya nu kreatif dina konsep pintonan mah. Karasa
pisan teh meneran lalajo API-2. Tanggal 17 Juli 2005 kamari upamana, tema
API-2 teh: pendidikan. Da mani asa taya pikaseurieunana atuh, unggal grup
ngabodor kabeh teu rame. Taya nu ayar, taya nu kreatif jeung taya nu
minculak. Boh dina selah bodor, konsep pintonan atawa bahan bodor nu di
pintonkeun. Geura, pedah tema pendidikan, kalolobaan grup patandang
ngasongkeung konsep bodor heubeul, dialoh guru jeung murid hareupeun kelas.
Selahna mun teu tatarucingan, guru ngetes ka murid, nya sosoledatan atawa
pelesetan. Aya oge nu ngasongkoeun konsep dialoh murid jeung murid, selahna
sarua, mun teu tatarucingan nya sosoledatan deui bae. Aya nu rada beda teh,
tema pendidikan digarap dina pintonan sakola lawak jeung sakola tari, ku dua
grup patandang ti Jawa Timur jeung ti Jakarta. Ngan angger teu rame, da
selah bodorna sarua, tatarucingan jeung sosoledatan keneh.
Kuring mireng, naha taya nu kreatif kitu? Ceuk kuring, matak naon mun
mintonkeun konsep nu rada kreatif, upamana, dialoh sasama guru, nya tangtu
pamaenna kabeh maenkeun karakter guru. Atawa dialoh guru, wali murid jeung
murid, atawa dialoh guru SD, dosen jeung guru sakola agama, atawa dialoh
guru olahraga, guru matematik jeung guru agama, atawa dialoh guru PNS, guru
kontrak jeung guru sukwan, jeung rea-rea deui konsep pintonan nu bisa leuwih
kreatif batan konsep bodor guru-murid hareupeun kelas.
Sigana kabeh patandang kakara bisa mere ciri kana tema pendikan dina
pintonan, ku keukeuhna kudu aya pamaen nu maenkeun karakter murid. Taya nu
ngajaul ambahan kreatifitasna kana konsep nu rada beda. Pan konsep pintonan
dialoh guru murid hareupeun kelas mah geus mindeng di garap ku Bagito,
Patrio atawa Cagur oge. Naha kabeh patandang ngan bisa ngadopsi wungkul?
Geura, pama konsep pintonanana ku dialoh sasama guru, atawa nu leuwih
variatif, dialoh antara dosen, guru SD jeung guru sakola agama, upamana,
tangtuna bakal leuwih euyeub bahan pibodoreunana. Lian ti leuwih gampang
nyabit-nyabit warta nu aktual, oge bakal nyiku kana kritik sosial nu leuwih
signifikan. Selah bodor ge bisa leuwih eyeub ragemna, saeuyeub masalah guru
jaman kiwari.
Ari ngan tatarucingan guru jeung murid mah, atawa sakadar nyabit-nyabit
tawuran jeung narkoba sasama murid mah, nya bodor garing tea atuh. Pan loba
keneh bahan pibodoreun ngeunaan tema pendidikan teh, pama digarap dina
konsep nu leuwih daria. Kumaha rek hanjat kana model pintonan nu leuwih
beurat kawas konsep surealis atawa absurd, kakara ulukutek dina konsep
realis ge can aya nu nunjukkeun kamotekaran nu leuwih daria.
Naha rek bisa maenkeun karakter bodor absurd kawas konsep dialoh antara
pulpen, buku jeung bor, atawa dialoh antara guru, kapur jeung sapatu, pama
nyiapkeun bodor ngaheulakeun neangan pipetaeun jeung picaritaeun na panggung
batan konsep pintonanana. Matak pantes pama selah atawa motif bodor nu
dipintonkeun teh asa kitu-kitu keneh oge, da teu mere tatapakan nu jelas
kana naon nu rek disodorkeun ka panongton, iwal ti ngadopsi tina
konsep-konsep bodor nu geus bari.
Ngan tantuna ge da panjang keneh lalampahan API-2 teh, najan ti API-1 keneh
ge sacara konsep pintonan mah can hanjat leuwih daria, kukituna- kukieuna,
ngabodor teh angger bae lain perkara gampang, lian ti anleh para pamaen nu
kudu kaasah, oge kudu inget pama bodor kitu-kitu keneh mah, matak
ditaringgalkeun ku panongtonna.***
Singaparna, 18 Juli 2005
PENTING..!
attachment akan dihapus & tidak diteruskan kepada seluruh member.
dilarang beriklan. pelanggaran atas peraturan ini akan dikenai sanksi berupa
pencabutan membership.
terutama bagi pengguna ms outlook/outlook express, dihimbau untuk selalu
mengupdate antivirusnya.
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
