Ku sanan nakal tamat; tah ayeuna mah dilobaan sakalian Episode ka 22 : Ti na Musuh jadi Balad Sajongjongan mah Jalma teu bisa ngomong naon2; lantaran teu nyangka ieu Ki Darga nu sakitu angkuhna, bakal masrahkeun diri cara kitu. Tuluy akhirna Jalma nyampeurkeun, terus wae eta Ki Darga dirangkul , disina nangtung. Pok Jalma nyarita:” Ieu kajadian teh, saenyana teu kudu aya, mun ti awal urang sarerea bisa nahan diri; tapi ieu hiji hikmah; moal aya hiji mimitran nu raket, mun teu diawalan ku hiji kajadian model ayeuna; yu atuh ayeuna mah maning nguruskeun nu carilaka, bari mere nyaho ka sakabeh anak buah urang, yen urang teh ayeuna geus akur.” Nya atuh bari masih lungse Ki Darga jeung Ki Wira jung narangtung, keur kitu Ki Jara jeung nu sejenna ti Pasir Buncit oge kalaluar. Ki Jara dibejaan ku Jalma, yen saenyana Ki Darga sabalad balad teh lain musuh, jeung teu pantes dimusuhan, nya akhirna Ki Jara sasalaman jeung para pamimpin Maung Hideung. Loba pisan nu carilaka, umumna taratu, aya nu beurat, aya nu enteng, aya oge nu terus maot, untung teu loba. Ku Jalma Ki Darga jeung Ki Wira dihormat pisan, lantaran masing kalah kumaha oge Jalma masih keneh sahandapeun Ki Darga di na soal umur, jadi Jalma ngahargaan pisan ka Ki Darga. Joyo Sembodo, nu masih lungse oge dihormat ku Jalma, ayeuna mah Ki Joyo teu wani deui adigung adiguna, lantaran geus apal ka na kabisa Jalma. KI Jara jeung nu sejenna teu protes ka na kalakuan Jalma ngahormat eta para tamu ti Maung Hideung, lantaran kahiji memang Jalma geus jadi Pamimpin Pasir Buncit; atuh kaduana memang pantes pisan Jalma dijadikeun pamimpin. Jadi memang para begal geus taluk lahir batin ku Jalma teh; lantaran lain wungkul ku kagagahan, tapi oge Jalma bisa ngahargan ka maranehna, teu kumaki ieu aing pangjagona. HANCA
