Teu lila Dokter perusahan sakaligus dokter pribadi kulawarga Hendrik.datang, terus ngomong ka si nona ku basa nu Jalma teu ngarti sama sakali; euh ieu meureun basa Kumpeni teh; basa Walanda tea, cek hate Jalma. Dokter ngaluarkeun alat2na; wah ieu “dukun” teh mamake alat leutik nu diantelkeun ka na dadana, buntutna diasupkeun ka na ceuli eta si dukun; ieu dukun meureun ngingu “Jin” dina eta alat; kitu Jalma mikir waktu harita; engke mah apal, yen eta teh ngaranna statoskof tea. Wah enya araraneh urang Kumpeni mah, ka dukun2na wae nu disebut Dokter mamake alat; teu nyaho ari kasiatna mah ? Naha leuwih alus ti batan dukun nu biasa, atawa ieu dukun urang Kumpeni? Geus kitu eta dukun teh nyokot jarum gede pisan, tapi disebut jarum asa gede2 teuing dijieunna tina logam campur jeung kaca. Euleuh naon deui ieu ? aduh naha aing rek dirogahala kituh? Kek we dukun teh nyekelan leungeun Jalma; terus diulas oles ku lamak bodas, nu lembut pisan. Ieu aing rek dinaonkeun yeuh ? Ujug2 gejos wae Jalma di”tubles” ku jarum; Jalma kaget, terus luncat; atuh eta jarum suntikan teh tipecleng; untung teu peupeus. Dokter ampir tigugulitik :”Hofperdom! Omong si dukun. Wah tadi si nona ge ngomong kitu; ambek meureun pedah ampir tiguling, jeung jarumna tipecleng; tapi sabagian obatna geus asup; memang karasa rada nyeri; tapi teu naon2 . Si Nona ngomong ku basa Malayu:”Eh kowe jangan......... eee jangan berisik........... eee jangan banyak tingkah dahulu.........e tenang tenang saja............ tidak sakit.......... ini untuk kebaekaan kamu orang.” Jalma rungah ringeuh we teu ngarti; terus wae si Nona ngageroan :”Emeh......... Kemari kamu.” Ya nona ada apa........... ? Ini orang muda , tidak ngarti urusan....... coba kamu orang ngomong pake bahasa kamu orang; ini dokter mau menyembuhkan penyakitnya.......... jadi dia orang harus bisa tenang.” “Oh ya ya nona, baek ! Terus nu disebut emeh teh, nu umurna kira2 leuwih ti 40an nyarita ka Jalma:”Jang, tong garabag gurubug; kapan keur diobatan ku ieu Juragan dokter; moal nanaon ; eta jarum teh dieusi obat, supayaa ujang gura giru sehat.” Teu nyaho kumaha Jalma jol jol nurut we ka eta babu teh; terus we cicing teu ngalawan; ahirna mah beres teu sakara kara; nu disebut dokter mere sababaraha rupa obat; kudu didahar sapoe tilu kali sanggeus dahar cenah. Geus kitu mah leos wae Dokter teh indit deui. Danke, cenah cek Si Nona. Daag ! Daag! Unggal poe nu nguruskeun dahareun , inuman jeung kamer nya eta babu nu ngaran emeh tea. Sama sakali Jalma can boga kasempetan keur nyarita jeung eta “Emeh” teh. Hanca
