Anyar tilu bagéan nu geus dibaca ku kuring, "Episode Ka-I: Ki Sarlita", "Episode Ka-2: Sari", jeung "Episode Ka-3: Sarwa", ngan geuning geus teu kawawa, géték hayang geura ngoméntaran. Hampura, hususna ka Bah AA, kitu kuring biasa nyaluk Abas Amin di ieu milis, mun koméntar kuring ieu leuwih gedé sisi émosina.
Nu karasa ku kuring sanggeus maca tilu bagéan éta, carita silat ieu (atawa mun cek istilah Bah AA mah cersil) kentel pisan kahayang Si Abah pikeun jadi guru basa, saperti nu katingali ku kuring tina sawatara postinganana di milis. Najan mémang henteu langsung ngaliwatan ucapan pangarang, tapi nginjeum létah tokoh, Neng Sari. Hal éta katingali dina paguneman antara tokoh utama, Jalma jeung Sari di episode kadua. Sari nu bolon ngajar kumaha migunakeun basa ka Jalma nu geus sawawa. Cek Sari ka Jalma, ” Nyarios téh kedah raos kakupingna ku cepil”, cenah. Jeung Jalma, nu jago, nu kasar téh teu aya rasa kapaksa dipapagahan ku Sari deuih. Éstu pasrah pisan. Naha pedah Sari anak Ki Sarlita, dununganana? Atawa ukur sikep biasana urang kampung bau lisung, nu lugu, nu narima? Walohualam. Can kajawab. Bah AA gé katingalina percaya pisan kana babasan "basa nuduhkeun bangsa", basa nuduhkeun kalakuan. Papagah Bah AA, ngaliwatan Sari, yén migunakeun basa téh kudu "raos kakupingna" henteu nerap ka babasaanna Sarwa, anak Ki Sarlita, lanceukna Sari mah. Sarwa nu apal pisan kana migunakeun basa, katingali basa ngilu mapagahan Jalma, jigana boga ahlak nu kurang hadé. Nu paling kabaca tina ieu carita, Sarwa mah boga haté sirik jeung mandang rendah ka Jalma, nu dianggap ukur bujang Bapana. Jadi Sarwa, cek Bah AA mah, wenang ngagunakeun basa nu teu "raos kakupingna" lamun ngomong ka Jalma. Sabab lawan nyarita Sarwa, Jalma, leuwih handap umur jeung darajatna. Hal séjén nu narik perhatian kuring nyaéta, Bah AA salaku pangarang teu boga kakawasaan pinuh ka tokoh carita nu diciptakeunna. Bah AA teu apal persis sabaraha umur Sari, naha 11 atawa 12 taun. Nu séjénna, Bah AA ogé teu apaleun ka umur Sarwa. Bah AA ukur apal "Umur Sarwa téh kira-kira saluhureun Jalma". Sakitu heula, ké ditambah deui, upama entos maca episode-episode salajengna. Réa hapunten sareng nuhun ti simkuring. -- d-: dudi herlianto :-q paciringan.wordpress.com kunyuk nuyun kuuk, kuuk nuyun kunyuk
