Guyon Kulonan - Bedol Lombang Ku MBF jeung ARS Poe harita kabeneran tanggal genep likurna bulan Rejep. Atuh saterusna, jagaisuk eta tanggal tujuh likurna. Geus kabiasaan di unggal kampung pasisian gunung Haseupan mah, utamana anu aya masigitan ilok ngayakeun rajaban, nyaeta mieling kajadian anu tumiba ka jungjunan ummat nabi ahir jaman, Muhammad sollallohu alaihi wa sallam. Isro wal Mi'roj tea kasebutna. Teu pati jauh bedana jeung Idul Fitri, rajaban geh ilokan "dipapaes" ku kadaharan sabogana. Dibawa laju diriung di Masigit. Isuk keneh mang Sarna jeung anak-anakna geus papariat deuk ngabedolkeun lombang nu ponuh ku lauk bujaer. "Ene, geura kelek tah sair jeung nyoru... Kai, pacuan poho panggul tah korang jeung pacul hayu urang ngabedolkeun lombang tea," ceuk Mang Sarna ngomong saingetna. "La, Si Abah mah... jang naeun mamawa nyoru sagala, Bah?" Anak cawenena nembalan. "Aih... hooh nyah. Nyoru mah jang napian beas kading." Ceuk mang Sarna bari ngaleos dituturkeun timbeuri ku anak-anakna.
Alo Ocid: Rejep taun kamari, melak bujaer 300 siki sagalede cinggir di sawah boga bapa kolot di Cening, jang babacakan engke lebaran. Barak dibedolkeun nyesa 90 siki. Beak dihakan sero. Bedus..! Katerangan: ilok = osok kodul = kidul lombang = balong ngabedolkeun = ngabedahkeun nyoru = nyiru papariat = siap-siap, tatan-tatan ponuh = pinuh telok/tilok = tara Editing: Ki Hasan
