Episode ka 58 : Lasmini Dewi Nyi Padmini di na ngagedekeun budak orok, Kacida tulatenna; sigana teu meunang ku batur, sagalana ditanganan ku sorangan; para badega nu rek ngabantuan ge ditolak ku ieu Nyi Padmini, pajarkeun teh keun we da ieu mah tugas hiji indung ngurus orok. Kaciri pisan nyaahna Padmini ka ieu orok nu dingaranan Lasmini Dewi teh; atuh nya ieu orok teh dadasarna memang sehat, ditambah ku tulaten nu jadi indung, Lasmini jadi orok lucu nu sehat pisan; jeung kaciri ieu budak bakal pigeuliseun. Ti barang Lasmini umur lima taun sukuna sok dibengker ku lamak dibulen; atuh gerakna ieu budak teh rada beurat jeung hese. Biuti sok rajeun nanya kunaon eta budak dibeungbeuratan kitu; tapi Padmini ngan ukur ngajawab ku mesem nu loba hartina. Nya teu terus ditanyakeun, meureun ku sabab Padmini teh masing enya ge putri Adipati, tapi oge Pendekar; meureun eta teh ciri kapendekaran. Memang Lasmini geus dibere dadasar elmu kanuragan ku Padmini; nu mimiti nya eta elmu hampang raga. Nu matak elmu hampang ragana Lasmini engkena memang pang istimewana. Lantaran Padmini meunang dadasar ieu elmu nya ti Sangga Prakosa; jadi elmu ieu nu dibikeun ka Lasmini teh. Sanggeus biasa gerak kudibeungbeuratan kitu; beuratna ditambahan deui saeutik saeutik ku Padmini.HANCA
