Fikmin #Jakat Bapa Ageung#
"Kung! Kuung! Kuuung!" Bendé kabuyutan ngungkung ti paséban. "Hééé, para duafa, para pakir, para kaum miskin!" léngsér muka biantara "Geura karumpul di Bumi Ageung! Bapa Ageung seja babagi jakat pakeun bekel lebaran!" ki léngsér mungkas cacarita. Bereyek nu ti kalérna. Burudul nu ti kidulna. Ngeungkeuy nu ti kulon. Ngabandaleut nu ti wétan. "Rekééé! Gerééét!" panto beusi bumi Bapa Ageung muka lalaunan. Lawang korina méléngé. Bereyek pasesedek. Nu bedas sésélékét. Silihséréd. Nu tokroh-tokroh kaidek. Kaleyek. Ngusek. "Aduuuh! Ieueueung...!" Si Nini ngocéak. "Aduuuh! Niniii!" Si Nyai ngajerit. Patingkocéak. Patingjalerit. Hansip paciweuh. Patulayah nu paringsan. Ambulan ngahéang. Rumah Sakit pinuh ku pasén Bapa Ageung.
