Jabatan atawa jadi Pajabat eta impian sakabeh jalma, boh jadi RT, RW, Lurah, Camat sampe ka Presiden. Padahal jabatan eta amanah. Hiji jalma diangkat jadi pajabat hartina eta jalma di bere amanah pikeun ngalasanakeun naon-naon anu geus digariskeun. Jadi Ketua RT nanggung amanah, sabab manehna dibere kapercayaan ku warga pikeun ngurus urusan Karukunan Tatangga. Beurat amanah eta Cep Anom....beu lain lalagaan beurat.......henteu gampang jeung sakama-kama. Tapi jalma geus teu milare kana beuratna amanah, pastina maranehna nyarahoeun kana tanggung jawab amanah anu beurat. Tapi kusabab geus hubud dunya, hatena geus ka tutup ku sikap sarakah bin tamak jadi nempo obor Agama kalah dipareman lain dicaangan. Pokna teh lah urusan akherat mah kumaha engke we di akherat. Astagfirullah............Cep Anom. Mun sakabeh jalma sadar jeung nyaho kumaha beuratna amanah eta, tinangtu moal aya jalma-jalma anu palomba-lomba hayang jadi Pajabat. Tanggung jawab sabage Kapala Rumah Tangga ge beurat atuh den, tanggung jawab teh lain di dunya wae, engke pertanggung jawaban di akherat bakal di reken ku Pangeran. Sabab teu saeutik, alias loba pisan jalma-jalma anu jadi pajabat teu amanah, malahan jadi Pajabat di nagara urang mah jadi juragan 100% sagala hayang dilayanan. Imah diimahan, mobil dimobilan, jalan-jalan atawa leumpang nepungan rahayat make pangawal, gajih digajihan malahan gajihna GUEDE. Geus kumplit fasilitasna, eh masih keneh kurang wareg bin puas, APBD dileketek.......bikang dileketek ajret-ajretan pireseupeun, tapi APBD dileketek rahayat awangna baregang, eta pikaseubeuleun! Padahal Pajabat salaku palayan publik sakumaha geus di atur dina UU No. 25 tahun 2009. Eta UU prodak manusa nyah, asa pantes mun jalma loba anu ngalanggar, da jieunan manusa ieuh.....
Nempo zaman kiwari araneh loba jalma parebut amanah, melaan sampe duit milyaran rupiah di kaluarkeun, malahan jujualan pakaya sampe ka kolor digadekeun. Ari ceuk kuring mun loba duit, harta bro di juru bro di panto ngalayah di tengah imah, na kunaon ngudag-ngudag jabatan, anu akhirna lumpatna ngudag-ngudag harta keneh wae. Padahal duit jeung harta anu aya we manfaatkeun pikeun kamaslahatan kaluargana jeung jalma rea. Keur naon melaan bebeakan, ari rek bales dendam mah, ceunah "Aing jadi Bupati beak 10 milyar, kudu kagantian salila aing jadi Bupati, malahan kudu aya batina". Wek..wek...wek...wek......ceuk Donald Bebek. Coba urang tingali dawuhan Nabi anu sumber riwayatna ti Abu Dzar r.a., manehna nyarita "Kuring nanya, wahai Rasulallah, kunaon anjeun hente mere jabatan ka kuring?. Mangka anjeunna nepak-nepak taktak kuring, tuluy ngadawuh : "Wahai Abu Dzar, saestuna maneh saurang anu lemah, sedengkeun jabatan nyaeta hiji kapercayaan, anu di poe kiamat ngarupakeun hiji kahinaan jeung panyeuseulan, kacuali pikeun pajabat anu bisa ngamanfaatkeun hak jeung nyumponan kawajiban anu sahade-hadena". (HR. Muslim). Salam, -- *Henteu perlu nyaho saha kuring, sabab kuring lain anjeun jeung anjeun lain kuring.* *Pesen kuring "Elmu Tuntut Dunya Siar".* *Ceuk aki kuring : "Worship as if you will die tomorrow, and work as if you will live forever"*
