Waktu istirahat digawe, biasa dahar beurang ka warung sangu anu aya di lingkungan kantor. Di hiji warung sangu sisi jalan, anu biasa kuring dahar beurang sok ragem didatangan tukang ngamen. Harita anu ngamen budak lalaki (pamuda) buukna gondrong, leungeunna loba tato, awak kerempeng asa kurang merenah ngalagukeun nasyid Salawat Badariyah. Salawat ieu geus teu asing di tengah masyarakat. "Jreng..jreng....*Salatullah* Salamullah, Ala toha rosulillah, *salatullah* salamullah, ala yasin *khabibillah* ..........jreng...jreng.........*Tawaksalna* bibismilah wabil hadi rasulillah, wakullimuja hidilillah, wabil *wadi*rasulillah...jreng...jreng.....". Ceuk kuring "stop...stop....stop......eureun heula jang, ari maneh nyaho eta salawat naon ngarana. dijawab ku tukang ngamen "aduh Pak teu teurang namina, abdi sok nguping we dina kaset sareng di masjid". Ceuk kuring "Mhmm....oh, mun ngupingkeun sing teges ulah apal cangkeum, bisi diseungseurikeun batur. Jang eta ceuk masyarakat umum ngarana salawat badariyah, ari nada na mah bener, tapi lafalna loba salah, cing dengekeun ku maneh "*Solatullah salamullah, ala toha rosulillah, solatullah salamullah, ala yasin habibillah, tawasalna bibismillah, wabil hadi rasulillah, wakullimuja hidillillah, biahlilbadriyaallah.............." *Terus kuring ngaluarkeun dua rebu, ceuk kuring "Kusabab lafalna salah ieu dua rebu bae, tadina mah rek lima rebu", ngasongkeun duit ka tukang ngamen. Ceuk tukang ngamen "Nuhun pak, nuhun tos diemutan" manehna rada gura-giru buru-buru kaluar ti warung sangu. Aya-aya wae..........
Salam, *Pesen kuring "Elmu Tuntut Dunya Siar".* **
