Episode ka 71 : Nasib 5 Macan Cirebon
Kumaha nasib Ki Abdul Gofar; Abdul Rauf; KI Seca ; Ki Garniwa jeung Cakramana ? Nu sok disebut Lima Macan Cirebon ? Sanggeus kaluar ti Cirebon, maranehna indit susulumputan; estu teu puguh nu dijugjugna; ku sabab sering paamprok jeung nu nyusud nya sering tarung. Tapi salila ieu maranehna masih bisa mertahankeun Mustika Mutiara Hideungna. Ngan wae beuki lila beuki loba wae Para pendekar nu nyusud eta nu limaan. Ku sabab kitu maranehna; nya marisah; Ki Gofar jeung Cakramana; Ki Rauf sosorangan; Ki Garniwa jeung Ki Seca ngumpul duaan; tah waktu Jalma pasanggrok jeung Ki Seca saenyana mah Ki Garniwa aya di panganjrekanana; tapi teu wanieun kaluar; terus we nyumput; maranehna bungah lantaran Jalma lain rek ngudag Mutiara Hideung. Tapi tempatna Ki Seca jeung Garniwa kapanggih ku Para pendekar Silat urut anak buah Subali si Macan Telu; atuh ger we tarung ragot; tapi harita mah Ki Seca jeung Ki Garniwa masih bisa ngelehkeun eta nu ngepung. Tapi barang rek pindah tempat nyumput ; manehna jol2 dikepung ku belasan jelema daredeg bari marawa pakarang; jeung bandera nu gambarna seuneu ! Nyata gorombolan Singa Barong. Ari nu mimpin ieu belasan jelema teh papakeanana kaciri siga urang Bali. Ki Garniwa gancang nyarita:”Eh Ki silah rek naon sampeyan sakabeh ngepung Kaula ? Kaula asa teu boga masalah jeung andika sakabeh ?” “Hahahaha … Kula sarerea ti kumpulan Singa Barong; Kaula nu mingpin … ngaran Kula Nyoman Sakarta … memang sacara pribadi mah urang teh taya hubungan sama sakali … tapi andika kapan anggota ti na Lima Macan Cirebon, lain !?” Reup geuneuk ray pias Ki Seca jeung Garniwa ngadenge omongan Nyoman Sakarta saperti kitu; tapi terus nyarita deui :”Memang Kula Ki Garniwa jeung Ki Seca; anggota 5 Macan Cirebon; terus rek naon sampeyan ? Da Kula duaan teu boga naon2 nu aya hargaan …” Kakara sakitu omongan Ki Garniwa geus dipotong ku Nyoman Sakarta :”Hahahaha … tong api2 sampeyan! moal aya haseup mun euweuh seuneu ! Tah sok ayeuna pasrahkeun Mutiara Hidceung ka diri Kaula; sampeyan jig we indit bebas ti dieu !” Hanca
