Keur kitu kadenge sora seuri nyakakak, nu sigana silih sambung ; tapi eta sora nyakakak teh karasana ku Nyi Ipah saperti nu ngagedoran dadana ; nepi ka ngarasa leuleus saluar awak; kacirina si kedokbodas oge kapangaruhan ku eta seuri.
Barang eureun eta seuri kaciri di dinya geus aya hiji jelema nu make pakean saperti urang Bali; pakulitanana hideung, bari sura seuri nyampeurkeun nu garelut. Nyi Ipah apal, yen nu datang teh pasti jagoanana Singa Barong; buktina seurina wungkul geus bisa nyerang ka dirina; Nyi Ipah waspada, tapi sama sakali teu gimir. “Wah budak awewe, jeung jelema nu make kedok bodas, enyaan jagoan; haha, tapi kula Made Galiga teu kudu cape ngotoran diri sorangan, coba ayeuna lawanan anak buah kula.” Sanggeus ngomong kitu, eta jelema nu ngaku Made Galiga terus keprok tilu kali. Torojol we ting burudul aya ka na dua puluhna anak buah Made Galiga; bari ting belesat misahkeun diri; terus ngepung si kedok bodas jeung Nyi Ipah; terus maranehna ngaluarkeun sarupa barang nu barang digibrigkeun jadi kecrik nu gede pisan; tapi di na eta kecrik teh ditambahan puluhan peso2 nu sareukeut; tah ku eta kecrik istimewa nu duaan diserang; atuh kaget jeung reuwas Nyi Ipah; tapi nya kapaksa ngayakeun perlawanan; tapi nyata manehna jeung si kedok bodas kadesek; lantaran eta rombongan nu mawa kecrik teh teu nyerang ngan ngagiring we; atuh duanana enyaan teu aya daya pisan; nepi ka kadesek ka sisi jurang nu lungkawing; nu teu katenjo sabaraha jauh dasarna; ku lungkawing2 na. “Heup heula !” Made Galiga nyorowok. Terus nu ngarepung teu maraju deui. “Hahahaha … eh sok maraneh duaan taraluk, ka Kula; mungkin wae bakal dibere ampun.” Can ge tamat Made Galiga nyarita; Nyi Ipah geus ngaluarkeun senjata2 rahasiana nu langsung diserangkeun ka puluhan nu ngepung; atuh harita keneh aya sababaraha urang nu ngepung ting jarungkel ka keunaan. Made Galiga kacida amarahna harita keneh ngomando supaya nyerang leuwih gencer, bari manehna oge ti kajauhan ngadorongkeun tapakna, nu karasa ku Nyi Ipah aya tanaga saperti nu ngadorong manehna; otomatis Nyi Ipah ngalawan ku tanaga jero; tapi nyata tanaga Made Galiga kuat pisan, Nyi Ipah leungit kasaimbangan, sukuna tikosewad; atuh teu ampun deui Nyi Ipah ngajungkel ka jurang; teu nyaho kumaha eta si kedok bodas langsung luncat ngarontok Nyi Ipah; atuh nya duanana ngagubrag ka jurang; pastina ge duanana bakal ancur badanna lantaran eta jurang sakitu jauhna jeung jerona. Made Galiga sajongjongan mah ngahuleng, tapi terus we mere komando supaya sarerea balik ka markasna . Episode 78 : Anak jeung bapa Hanca
