“Alhamdulillah, tah ayeuna cobaan ku sampeyan ti kajauhan rokrak bisa meupeuskeun batu.”
Jalma kudu ngalatih diri ka na barang nu lembek tapi tikajauhan ku saluran tanaga manehna bisa ngancurkeun batu; mimitina mah rada hese tapi lila2 mah teu sakumaha hesena batu teh beulah ditinggang ku rokrak leutik. Jadi tikajauhan barang nu lemah bisa ngancurkeun barang nu teuas. Nu penting saluran tanagana tepat. Terus Ki Padmarasa oge ngajarkeun elmu ngirim tanaga jero ka jelema sejen; terus deui ngajar ngaharewos ka hiji jelema nu dituju tanpa jelema sejenna nyahoeun. Nu ieu mah rada hese; tapi Jalma bisa oge lulus; lantaran memang tanaga jerona geus luhur pisan. Tah sanggeus dalahar jeung shalat lohor, terus we Ki Padmarasa nyarita bari dibarung ku imut ka Jalma:” Kumaha hidep salila cicing di dieu ?” “Aduh Ama kuring betah pisan, malah mah asa hayang tetep we di dieu.” Walon Jalma yakin pisan. “His ulah … sampeyan Jalma, boga pancen ti guru2 jeung kulawarga sampeyan. Ayeuna sampeyan geus mesuh raga di dieu; jung ayeuna mah turun ti ieu gunung Muria; jalankeun pancen kalawan soson2.” “Naha Ama tos bosen ka kuring ?” Cek Jalma. “Hahahaha, ah pananya sampeyan teu pantes dikaluarkeun ka Ama … unggal poe ge pasti sampeyan apal kumaha parasaan ama ka sampeyan. Tapi samemeh indit aya nu rek dititipkeun ku ama ka sampeyan, naha kira2 sampeyan bakal narima ?” Jalma :”Insya Allah nu kadada kaduga ku kuring, bakal diestokeun pisan.” Ki Padmarasa :” Alus jawaban sampeyan teh Jalma ! teu gagabah nyanggupan; tapi cek pikir ama mah tangtu ieu pancen ti ama bisa dilaksanakeun ku sampeyan. Teu susah2 teuing, malah bisa jadi , ieu mah pikabungaheun.” Jalma :”Mangga atuh Ama , carioskeun we naon titipan teh !?” Ki Padmarasa :”Ama teh boga titipan ti Gusti, nya eta anak Ama Anggraeni. Ayeuna geus meujeuhna laki rabi; kahayang ama mah jodona teh nu saluyu jeung kahayang ama, kitu deui kahayang manehna. Tah nya ayeuna nu saluyu ayeuna geus nyampak, teu kudu neangan susah2. Siga na mah sadaya tos ditakdirkeun ku Gusti Nu Murbeng Alam. Tah upama sampeyan teu aya halangan di na narima Anggraeni anak Ama; Ama rek nitip mercayakeun ka sampeyan; pek tikah eta anak ama teh. Kumaha pikiran sampeyan, Jalma !?” Salila aya di Gn. Muria; kumpul jeung Ki Padmarasa sarta Anggraeni; aya oge pikiran Jalma hayang nikah ka ieu Anggraeni; tapi sering ieu pikiran ku manehna disingkirkeun; bari na gerentes hatena :”Jalma siah teu boga cedo maneh; geus ditulungan, malah minculak hayang ka anakna ?” Tapi ayeuna malah ditawaran pisan ku Ki Padmarasa; sajongjongan mah Jalma teu bisa nyarita naon2; lantaran kaget jeung hareugeueun. Barang nenjo sikep Jalma kitu, Ki Padmarasa bari imut, nyarita deui :” Lamun sampeyan ngarasa kuciwa ku anak ama nu goreng sopak; tong asa2 sampeyan nolak ka ama.” Gancang atuh Jalma nyarita:”Duuh Ama … Anggraeni keur kuring mah estu Istri utama; rupa teu kudu dipulas; atuh kanyaah jeung talatenna ka diri kuring, moal aya tandinganana; cek paribasa rek neangan nu kumaha deui ? Lantaran sarat istri utama tos nyampak di Anggraeni. Mung bae kuring teh asa kaleuleuwihi; geus ditulungan ku ama; malah minculak mikahayang nu lain2.” Ki Padmarasa seuri; pok nyarita:”Tong nyarita kitu Jalma; Ama mah geus cop ka diri sampeyan. Rek neangan lalaki dimana deui nu alus model sampeyan ? Rupa teu kudu meuli; kagagahan aya di sampeyan; kitu deui kashalehan. Ama percaya pisan. Cek paribasa sampeyan teh bisa mikanyaah ka Anggraeni lahir bathin, dunya akherat. Jadi mun sampeyan teu ngarasa hina nampa anak ama; ulah ditolak.” Jalma :” Salian ti eta ama … kuring teh geus boga papacangan, nya eta ka putra ajengan Salim.” Ki Padmarasa :” Ah teu nanaon … pan lalaki mah wenang boga pamajikan leuwih ti hiji; saratna sakabeh ihlas. Tah ayeuna sukur pisan, kakara papacangan. Tah ama mah reh nikahkeun sampeyan ka anak ama; jadi ama leuwih ti heula ti batan Ajengan Salim. Kumaha sampeyan narima ka Anggraeni anak ama ?” Sajongjongan mah Jalma melengek deui; lantaran lain wae soal ka Nyi Ipah; manehna ge inget ka Sari waktu ngaliwat ka Gn Cerme; tapi ayeuna Ki Padmarasa siga ngadesek pisan; mangkaning manehna ge memang aya hate ka Anggraeni. Nya sanggeusna sababaraha kali istighfar ; Jalma Lahaola di na hatena; mun memang engke dipentog ku Ajengan Salim, atawa Sari; nya kapaksa manehna bakal bruk brak yen manehna kacida kahutangan budina ku KI Padmarasa; jeung nempo nyaksian pisan kanyaah ti Anggraeni ka manehna; akhirna Jalma narima ka na kahayang Ki Padmarasa. Nya isukna disaksian ku Ki Busro, Jalma ditikahkeun ka Anggraeni. Teu aya upacara atawa acara sukan2 naon2; ngan ditutup we ku dzikir. Isukna Ki Padmarasa ngajurung Jalma kudu gancang2 badarat ka P. Jawa ; keun we cenah Anggraeni mah dititip heula; engke mun sagalana geus beres, ulah teu balik deui mawa pamajikanana nya eta Anggraeni. Samemeh indit Jalma ge dibere ubar keur nyamur, bisi ulah kanyahoan teuing. Jalma ngadatangan lembur, bari nanyakeun kudana ka Ki Wiroguno; geus kitu mah dius wae indit ti dinya. Sanggeus tepi ka hiji lembur; Jalma nitipkeun deui kudana ka hiji pamayang; terus Jalma nyieun obat keur nyamur; nya jadi jelema hideung. Terus we ngagunakeun elmu enteng raga Jalma geus jauh ti eta kampung; terus mubus ka nu loba kakaian; keur kitu manehna ngadenge sora kuda2 keur dilumpatkeun; kaciri aya rombongan nu mamawa bandera nu digambaran seuneu hurung; manehna kaget sabab nempo Ki Sarwa ditalikung ku eta rombongan. Jalma geus rek luncat; nulungan Ki Sarwa; tapi ku elmuna nu geus luhur, manehna ngadenge bakal aya hiji jelema nu nulungan Ki Sarwa. Enya we teu kungsi lila Nyi Epon mucunghul; Jalma mengkek piseurieun nempo Nyi Epon ayeuna geus jadi Pendekar. Wah kakara ge dua taunan teu panggih; Nyi Epon geus jadi pendekar ? Terus we Jalma ngintip; bari mun perlu ngabantuan. Tapi nyata ku Nyi Epon sorangan ge geus cukup; eta gorombolan nu disebut Singa Barong geus buyar. Terus we Nyi Epon jeung Ki Sarwa arindit ti dinya. Jalma teu tahan, langsung seuri nyakakak; nu atuh mani tarik kadenge oge ku Nyi Epon; nepi ka culang cileung neangan. Gancang wae Jalma mengkek eta seuri. Saterusna Jalma nuturkeun Nyi Epon jeung Ki Sarwa; akhirna Jalma cicing disalingkungan Giri Resik, lantaran hayang nyaho kumaha tuluyna Ki Sarwa ? Akhirna Jalma nyaho yen ki Sarwa rek nekad ngalamar Nyi Epon. Jalma di na hal ieu ngarasa boga kawajiban pikeun ngarepokeun jodo duanana; nya manehna ngajadikeun dirina badega nu ngangkut barang Ki Sarlita pikeun ngalamar. Di Leuwiseeng Jalma nempo oge Indungna Nyi Emeh; tapi can sempet sowan; lantaran hayang nuntaskeun jodona Ki Sarwa tea. Manehna oge nempo Ki Bejo aya di dinya; jeung apal yen Ki Bejo boga murid2 di Leuwiseeng; saterusna Jalma nempo Ki Bejo siga2 rek pipilueun di na ngalamar ka Nyi Epon; gancang wae Jalma ti kajauhan nyentil urat palumpuhan KI Bejo; tapi teu karasa ku Ki Bejo lantaran eta sentilan kakara aya reaksi mun Ki Bejo gerak ngagunakeun tanagana. Enya we waktu rek nangtung, manehna kakara ngarasa yen dirina aya nu nyentil ti kajauhan. Barang Ki Sarwa geus jadi nikah ka Nyi Epon; Jalma nempo ka teu satujuan Ki Bejo nu jadi provokator ka murid2na; nya atuh ku elmu tingkat luhurna teu kanyahoan ku Ki Bejo; padahal aya di hiji rungkun dipipir imah nu dipake sawala ku Ki Bejo. Nya ti dinya Jalma ngirim sora tanpa jirim ka Ki Bejo; bari ngingetkeun supaya Ki Bejo sadar, Waktu Ki Bejo ka Wanayasa , Jalma teu nuturkeun deui, lantaran rek nepungan Nyi Emeh indungna. Hanca Episode 82 – Jalma ka Batavia deui
