Sajongjongan mah Bella ngahuleng; naha enya Jalma boga hubungan jeung Maung Hideung ? Wah kudu ditanyakeun yeuh ?
Nya Bella ngurihit ka Van Geheerst supaya mere idin manehna ngahubungan Jalma; bari menehna nyebutkeun salian ti rek ngabela Jalma; oge bari nyilidik enyaan Jalma boga hubungan ka Maung Hideung ?” Akhirna Meneer Van Geheerst ngaluarkeun surat resmi yen Bella jadi Pangacara Jalma; jadi surat resmina langsung disahkeun isukna di kantor. Nya sanggeus tilu poe; kakara Bella bisa ngadatangan tahanan Jalma. Waktu Jalma dikaluarkeun ti na tahanan Landrat, bari nyebutkeun aya dua tamu nu hayang panggih jeung manehna; manehna kaluar bari mikir; yen dua jelema teh pastina ge Bella jeung Richard. Enya we tamu duaan teh Bella jeung Richard; atuh tiluan silih rangkul ku sabab sono geus sakitu lilana teu papanggih. Sanggeus ngalubarkeun kasono, nya Bella mimiti nyarita:”Yeuh Jalma, nyaho teu naon sababna pan jij ditahan ayeuna ?” Jalma ngajawab :”Nu matak lebeng; nepi ka ayeuna kuring can nyaho naon kasalahan kuring nu matak ayeuna ditahan ?” Bella :” Tong sieun Jalma, kuring nu rek ngabela jij, lantaran taun kamari ik lulus ti Fakultiet Hukum di Lieden, Netherlaands; kuring geus jadi Meester in The Rechten; ku sabab kitu Ik daftar jadi Pangacara Jij. Kasus nu keur disanghareupan ku Jij, kaasup beurat oge; Jij dituduh geus ngahiji jeung Gorombolan Maung Hideung ! Ari nu ngadakwa jij teh ngaranna Ki Tanu ! Apal teu jij ka ieu Ki Tanu !?” Ngadenge omongan Bella kitu, kacida kagetna Jalma; oh hartina si Tanu masih beleger, jeung ayeuna keur ngalakukeun males pati ka dirina. Wah memang lain masalah gampang atuh ieu mah.” Kitu pikiran Jalma, nu matak Jalma sajongjongan mah teu ngajawab. Nempo Jalma serius kitu, Bella oge Richard mikir, yen pastina ge Jalma memang aya pakuat pakaitna; tapi piraku sugan ari pipilueun ngagarong mah ? Pikiran Bella rada hariwang; ngan Richard mikir yen Jalma teh hiji Pendekar; geus pasti loba hubungan jeung kaum Pendekar, kaasup ka Golongan Maung Hideung. Tapi Richard nyaho sipat Jalma; mun bisa jeung sakabeh golongan hayang jadi Mitra; embung boga musuh. Tapi ayeuna Ki Tanu geus mitnah, hartina aya hiji hal nu merlukeun penjelasan deui. Pok we Richard milu nyarita :” Ieu mah diluar kasus Hukum; da eta mah urusan Bella; tah kuring kacida heranna naon sababna Ki Tanu mitnah; padahal sakanyaho Kuring, maneh teh Jalma manusa nu kacida toleransina. Pasti aya hal nu hese dijelaskeunana.” Hanca
