Mawar Hideung surti, yen ieu Mbah Lanang rek nguji elmuna; Nya harita Mawar Hideung gancang ngerahkeun tanagana; cekelan Mbah Lanang lesot harita keneh, bari jeung manehna mundur aya 3 lengkahna !
Mbah Lanang gogodeg, ku teu nyangka Mawar Hideung nu kaitung masih ngora keneh, boga tanaga jero saluhureun manehna. Ayeuna manehna nyakakak, bari pok ngomong :” Hahahaha ! wah pantes sampeyan siga wani pisan ! Nyata sampeyan boga cekelan nu sakitu hebatna. Wah maaf Kula teu awas yen sampeyan teh enya hebat, Mawar Hideung; pantes si Setan Alas kobar eleh !” Disebutkeun kitu Mawar Hideung rada beureum beungeut, lantaran rumasa waktu ngelehkeun si Setan Alas Kobar, rada dibantuan ku Ibuna, nya eta Nyi Padmini. Ku sabab kitu sanggeus manggut deui sakali, jorelat wae Mawar Hideung ngejat ti dinya; ngan sakilat teu katempo deui. Mbah Lanang cuk cek muji kana kadigjayaan Mawar Hideung; ngan manehna weleh teu ngarti; dimana ayana si Mawar Hideung waktu aya kajadian di Losari ? Euh meureun Mawar Hideung keur nyepi ningkatkeun elmuna !? Pikiran Mbah Lanang, nu memang cerdas ampir bisa neguh kajadian naon nu tumiba ka Mawar Hideung, masing teu sagemblengna bener ge. Tah Mawar Hideung teh terus we laju, nuju ka Markas Singa Barong di tutugan Gunung Bromo. Tapi sajajalan nu diliwatan, manehna panggih jeung Gorombolan Singa Barong nu maregat ! Atuh teu loba dongeng deui; satiap panggih jeung hiji gorombolan SB nu megat langsung disikat ku Mawar Hideung ! Atuh 9 tina 10 mah pasti binasana. Atuh ayeuna mah gorombolan Singa Barong nu can kaliwatan ku Mawar Hideung nyaho ti babaturanana nu kalabur, jadi teu wani maregatan deui, teu waranieun maruncul; lolobana kabur ka markas, sawareh nyarumput; maranehna nempo pisan ayeuna mah , kumaha gampangna Mawar Hideung ngabinasa babaturanana; estu nggegirisi cenah ! Cek basa Jawana mah. NB : di na hal expressi basa ieu … sigana urang Sunda eleh ku Jawa ! urang Sunda mah paling ge nyebut “pikagimireun” pikasieuneun” “pikareuwaseun” ; “Pikahariwangeun”; tapi basa “Nggegirisi” sigana mantep pisan karasa ka na hate urang. Hanca
