NIAT PUASA ========== Assalaamu'alaikum wr. wb.
Dina agama Islam, niat ngalakukan hiji pagawean teh penting pisan, dinyatakeun "amalan teh kuhama niatna'; jadi saumpama niatna hade maka amalan teh bakal dipeunteun hade, tapi lamun niatna goreng maka amalan teh bakal dipeunteun goreng. Kitu oge dina ngalaksanakeun ibadah puasa, salah sahiji rukun-na teh niat, ngahaja niatkeun rek puasa. Puasa wajib teu sah lamun ti awalna euweuh niat rek puasa. Tapi lamun puasa sunat mah meunang niatna di tengah jalan; misalna rek sarapan isuk-isuk teu kasampak aya dahareun pisan di imah teh, ah sakalian weh rek diniatan puasa poe eta tepikeun ka magrib, eta meunang jiga kitu. Niat teh penting pisan, salain eta rukun ibadah, niat oge memang dina kanyataanna teh gede pisan kana kasadaran ibadah urang. Jadi ibadah teh kudu sacara sadar dijalanan. Lamun hiji ibadah teu sacara sadar dijalanan nya mangpaatna bakal leutik kana diri urang. Ieu oge anu dimaksud istilah khusuk teh. Jadi ibadah anu khusuk teh anu sacara sadar jeung sacara mawas dijalanan ku urang. Ibadah puasa anu khusuk teh jadi nyaeta ibadah puasa anu ti terbit fajar nepikeun ka magrib teh dijalanan kalayan ku kasadaran jeung mawas. Pikeun ningkatkeun kualitas puasa, misalnya ku urang bisa diniatkeun sacara sadar: 1. Moal dahar moal nginum ti subuh tepikeun ka magrib 2. Moal mikiran seksual salila puasa 3. Rek ngahapus parasaan ambek, ngewa salila puasa 4. Rek ngahapus kahayang anu mawa kana karakusan (loba) salila puasa 5. Rek ngaleungitkeun parasan panas hate, gundah gulana dina hate 6. Jrrd Tah lamun geus diniatkeun kalawan ngahaja jeunbg dirarasakeun jiga di luhur, lamun pas keur puasa kaalaman naon anu geus diniatkeun rek disingkirkeun salila puasa, pasti bakal langsung karasa. Tapi lamun teu diniatkeun bisa kacolongan. Lamun pas keur puasa karasa kaalaman naon anu geus diniatkeun rek disingkirkeun gancang urang nenangkeun diri. Misalna pas keur puasa inget kana kajadian anu geus kaliwat anu urang teu suka, nyel dina hate karasa keuheul jeung ngewa; tah gancang urang narik napas panjang lalaunan terus kaluarkeun oge lalaunan bari gerenteskeun dina hate yen urang geus ngahampura naon anu geus kaliwat, urang geus ikhlas; ku puasa ieu urang hayang bahagia, moal mamawa beban hirup anu geus kaliwat. Lamun keur puasa, utamana anu bujangan keneh, ningali lawan jenis anu hade pisan, gancang balik deui kana niat, yen urang rek narimakeun lain dina waktu keur puasa pikiran nu kitu mah, ari keur puasa mah kudu bisa ngendalikeun pikiran tina nu kitu. Atuh kalawan kukaikhlasan eta pikiran ka lawan jenis teh dihapus lalunan tina pikiran jeung parasaan. Tapi lamun godaan datang gede pisan, misalna amarah gede, kahayang gede, urang oge kudu sabar. Lamun kakuatan batin urang mereketetet keneh ulah dipaksakeun nepikeun ka gundah gulana. Coba weh lalaunan da sagala oge aya prosesna, ulah dipaksakeun. Lamun dipaksakeun biasana batin kalahka gusar. Samakin dilawan samakin gusar. Eta bahaya, karna gusar teh kadaharan setan. Bisa-bisa malah pegat kakuatan iman/batin urang. Lamun geus pegat sok jadi kaleuleuwihi, jiga kagok ah dilanggar weh sagala anu geus diniatkeun teh. Jadi lamun can kuat nedunan naon anu geus diniatkeun nya sabar, engke poe saterusna urang anyarkeun deui niat jeung usaha. Lila-lila bisa jiga sapu anu nyere-na ngalobaan. Sabeungkeutan kuat. Basa nyere-na hiji dua mah can bisa dipake nyapu runtah anu ngotoran batin. Tapi lamun nyere-na loba mah gampang nyapu gangguan batin teh. Jadi lamun teu kuat, nyere ulah dipiceun, dikumpulkeun deui dina poe isukna. Tah lamun prosesna lain sapoe dua poe, tapi taunan oge sing sabar weh. Terus biasakeun nyieun niat hade unggal poe. Ieu bab kakuatan niat anu bisa nyapukeun kokotor batin urang. Saenggeus niat teh urang kudu rajin mariksa kaayaan batin ku kasadaran. Biasana anu loba ngahinghileudan batin teh misalna: 1. Amarah jeung kangewa 2. Rasa teu puas 3. Kahayang 4. Mangmang/ragu-ragu Eta kondisi mental jeung parasaan teh kudu rajin dipariksa. Lamun geus biasa mariksa batin biasana lamun eta kondisi mental jeung parasaan datang teh aya alarm disada dina batin urang. Gancang urang ngondisikeun kasadaran diri, gerenteskeun weh dina hate, misalnya: "kuring hayang bagja, embung ambek"; "kuring hayang bagja, embung ngarasa teu puas", atawa "teu puas euweuh gunana dan moal jadi hade ku teu puas, kuring hayang puas naon wae kondisina", jeung saterusna. Bisa dibantuan ku ngatur napas anu lembut kaluar asup dada urang lalunan. Insya Allah ku kituna urang keur diajar jadi jelema khusuk tur ngabersihan batin urang. Urang jadi jalma eling: "eling-eling mangka eling, rumingkang di bumi alam... darma wawayangan bae...". Contoh kahayang: misalna karek oge isuk-isuk atawa beurang geus dicipta-cipta arek buka ku kadaharan naon wae. Atuh bulan puasa tek konsumsi dahareun jadi ningkat. Eta teh napsu. Atuh alus urang rek diajar, diniatkeun ti isuk-isuk moal mikiran dahareun jang buka engke magrib. Diniatkeun rek ikhlas buka sakasampakna engke magrib aya dahareun naon wae rek ditarima kukaikhlasan. Nya ibu-ibu lain teu meunang masak, ngan meureun tong diaya-ayakeun teuing. Cukup kadaharan anu nyehatkeun awak jeung teu loba teuing boh dina volume boh dina rupa-rupana. Jadi da moal aya jalma anu teu kahinghileudan ku parasaan goreng, kacuali jelema anu geus disucikeun batinna ku Gusti nu Maha Suci. Ari jalma biasa mah nya biasa kahinghileudan batin goreng. Tapi kuurang bisa dibersihan ku niat hade jeung ku mariksa batin terus-terusan. Wilujeng puasa/shaum ramadhan, hapunten upami aya tulisan-tulisan sim kuring di milist anu mancing antipati dina batin, nyuhungkeun diikhlaskeun dihapunten dihapus tina batin. Hatur nuhun. Wallahu'alam Febi Ahmad Hazairin ===================
