INFRASTRUKTUR KOMITE PERALIHAN KOREA DAN KOMITE PERALIHAN DJEPANG!
I . KOREA.
Korea sigohlom geubangun lé Djenderal Park Chung-hee, umum djih rakjat
Koreanjan hudéep dalam musim leupië seulama 6 buleun djipadjôh lobak masén
(njang ka djipeudj'ruk) keupeunadjôh dan seulama 6 buleun seuleubèh djih,
djipadjôh makanan laén. Njan dit, gasin dan susah bangsanjan!
Djenderal Park Chung-hee geubangun Korea-njan deungôn geungui tjara disiplin
hudéep tantra dan deungôn geungui seupeunöh djih manadjeumèn militè.
A
"Deungôn disiplin tantra dan manadjeumèn militè keuh Djenderal Park Chung-hee,
geubangun Korea! Dan deungôn disiplin tantra dan manadjemen milité keuh Komite
Peralihan Korea djibangun Korea njang madju dan makmuë troih 'an djinoë!"
Oleh bansa Korea, disiplin tantra dan manadjemen militè ka djeut keu Adat dan
ka djeut keu Reusam!
Djeut teukalôn Korea yang pernah didjadjah lé Djepang, djibeudoh dan madju
meulumba-lumba deungôn pendjadjah djih, Djepang, njang djinoë djeut ka
santeut-santeut dan sarée-sarée troih 'an uroë njoë.
Lagèe geutanjoë bandum ka tateupeue bahwa, Korea-njan nakeuh salah saboh
neugara, njang peukara rakyat djih njan wadjib laksana tugaih National Service,
selaén untok djihadapi Korea Utara, teutapi 'lheh Koreanjan djibangun lé
Djenderal Park Chung-hee, maka tip-tip rakjat djih wadjwéb ikôt pendidikan
milié atawa latéhan militè, seulaén tugaih Nasional Service, nakeuh nak peudong
disiplin militè dan manadjemen militè, ateuh tip-tip aneuk bangsa Korea, dan
njang dudoë ka djipeugot ke adat dan kadjeut keu bangsa Korea!
Meunantjit geutanjoë uroë njoë, njang ka ta peu-sivilisisasi TNA, Tentara
Negara Achèh, deungôn nan baro: KPA, Komite Peralihan Achèh.
Peue Falsafah KPA, Komite Peralihan Achèh-njan geupeudong?
Meunjoë KPA, Komite Peralihan Achèhnjan njang ka teudong njan, meu-ikôt
Falsafah
Negara Achèh Sumatra cq Falsafah Bansa Achèh atawa Falsafah Éndatu Bansa Achèh,
maka that djelaih, Falsafah KPA, Komite Peralihan Achèh-njan, lagèe-lagèe hana
meubida dan hana meu-ubah, njang akan hudèep troih 'an kiamat.
Maka TNA, Tentara Neugara Achèh, njang uroë njoë ka tjok tugaih seubagoë KPA,
Komite Peralihan Achèh, njang awai ka geuhadapi Pendjadjah Indonesia
Djawa-njan, sigohlom MoU Helsinki, Finldandia dan uroë njoë bak geubangun bansa
geuh teuma, maka formula Korea, Djenderal Park Chung-hee-njan nakeuh njang
akan djeut teupiléh tjit keu formula aplikasi.
Djeut teupeugah, bah barangkiban pih na model Achèh, maka meunjoë
teupeugah meunan, maka model Achèh-njan pasti hana djiseuk dari
tjiri-tjiri-njan.
"Deungôn disiplin tantra dan manadjemen milité keuh KPA, Komite Peralihan Achèh
akan djeut geubangun Achèh dan kameuteutèe akan keukai seubagoë saboh modèl
dari saboh institusi, meunjoë geutanjoë akan ta peukeukai TNA, Tentara Negara
Achèh njang ka djeut seubagoë KPA, Komite Peralihan Achèh njan uroë njoë, njang
akan bèk lé peu-susah dan bèk lé peu-apôh-apah!
Maka djih oleh KPA, Komite Peralihan Achèh, deungôn disiplin tantra cq TNA,
Tentara Negara Achèh dan manadjemen milité beudjeut keu Adat dan akan beu djeut
keu Reusam!
II. DJÈPANG.
Meunan tjit keu tjènto Djèpang.
Djépang 'lheh masa diktator militè Tokugawa reubah dan luruh, meusabab ramè
njang ka hana lé galak keu tantara (samurai) yang ka leupah that angkôh keu
rakjat, lé that karu sabé-sabé keudroë dalam nanggroe, lé that utang neugara,
that 'brat djitantang lé oposisi dan group-group njang anti dll. dan dudoë
kareuna teukanan beurat Laksmana Matthew Calbraith Perry dari USA, bak thôn
1853 dan 1854, njang that meuseuhu ban sigom dônjä-njan, njang geupeurintah
buka fasilitas dan prioritas peulabôhan laõt di Djépang keu bangsa lua.
Njan keuh 'lheh reubah dan luruh diktator militée Tokugawa njan, maka teudong
'lheuh njan peumeurintah Meiji atawa Meiji Dinasty.
Masa Meiji dinasty keuh para samurai (tantara) dan laén-laén rakjat
Djépang njang patõt layak djikirém meureuno u Eropah dan Amerika.
'Lheh pendidékan lua njan keuh, para ex-samurai-samurai dan para rakjat njang
patõt meureuno buno, djiwo u naggroë dan djibangun Djépang.
Para ex-samurai-samurai atawa ex-tantra-tantra Djepang djikeureudja dan
djilaksana program Komite Peralihan Djepang lagèe njang ka djituntot lé Adat
dan lagèe njang ka djituntõt lé Tenoheika (Tuhan bangsa Djepang).
Maka djih ex-samurai-samurai atawa ex-tantra-tantra Djepang dan bansa Djepang
laén djih, njang ka na didalam Komite Peralihan Djepang dalam masa pemerintahan
Meiji Dinasty, barangkapueue pih njang djipeugot dan djipeulaku,
saban lagèe-lagèe pakriban njang djikeuhendak lé bansa dan lé Tenoheika (tuhan)
djih.
Meunan keuh bansa Djepang bak bila bangsa djih, lagèe njang geukeuhendak lé
Tenoheika!
Djadi bak bila bangsa oleh banga Djepang na keuh lagèe njang ka geuhendak lé
adat dan lagèe njang ka geukeuhendak lé Hukôm cq Tenoheika !
Dalam hai njoë, maka Wali Negara, Tengku Tjhik di Tiro Hasan Muhammad ka
neupeugah bahwa, bansa Djépang saban that-that lagèe bansa Achèh-njan!
Bansa Achèh ka neudidék lé Èndatu teuh njang Inong dan njang Agam untuk djak
bila bansa Achèh dan beu ta'at keu Poë teuh Allah SWT! Dan keu hai njoë ka tjit
ulôn tuléh dalam ulang thôn sedjarah TNA, Tentara Negara Achèh.
Njan keuh maka djih, geupeugah seutia keu bangsa Achèh dan ta'at keu Poë teuh
Allah SWT dari bangsa Achèh-njan saban that lagèe bansa Djépang seutia
keubangsa djih dan ta'at keu tuhan djih: Tenoheika, ka djeut keu Adat dan ka
djeut keu Hukôm!
Meunjoë teubaca majalah Reader Digest, Special Edition, njang djipeuteubit di
New York (njang peurnah ulôn batja thôn 1973) pakriban bansa Djépang ka geu
latéh dalam saboh-saboh but, maka djih hana hireun geutanjoë, pakriban bangsa
Djépang-njan ka teudong dan madju luar biasa uroë njoë.
Ulön bri tjènto meunoë: Sidroë tjalon tokkang peugot rumoh atawa tjalon keu
tengku utôh, deunôn tugaih pèh labang. Miseuë djih sigoh lom labang njang
geujupèh njan abéh djitamong, ka rôh meupèh atawa karoh teupèh aneuk djaroë
deungôn palèe dan ka bitjah asoë, seureuta meudarah, maka tugaih mupèh njan
handjeut pijôh, teutapih musti pèh ladju sampôë 'an labang njan abéh
djitamong!
Maka dalam latéhan Djepang-njan, handjeut sagai-sagai peugah sakét atawa
peuereulè boh ubat dilè, akan teutapi but pèh labang njan wadjéb,
sahingga seuleusoë atawa pèh ladju demi tugaih bangsa dan demi Tenoheika,
sahingga tugaih pèh labang njan bèrèh.
Maka djih troih 'an uroë njoë bangsa Djépang njan, hana peureunah
meukira-kira keuleubèh watèe keuridja demi kepenténgan bangsa dan demi
Tenoheika. Djareung that ta deungoë burôh-burôh bansa Djepang cq Trade Union
Djepang, peugot demonstrasi dan lagèe hana pih.
Njan keuh meunan Komite Peralihan Djepang, masa Meiji Dinasty geubangun Djépang
sehingga Djépang teudong dan madju troih 'an uroë njoë!
Djadi bida tjara Komite Peralihan Korea dengôn Komite Peralihan Djepang nakeuh:
1. Komite Peralihan Korea djibangun Korea, seumata-mata deungôn peurintah
(militè).
2. Komite Peralihan Djepang djibangun Djepang, semata-mata deungôn kehendak
(kuasa) Adat dan Tenoheika (Tuhan).
3. Dan ka pasti Komite Peralihan Achèh akan geubangun Achèh, lagèe geukeuhendak
lé bansa (Èndatu) dan lagèe geukeuhendak lé Poë teuh Allah SWT.
(1). Disino djeut tjit keutjatjatan geutanjoë Pakriban Dr Mahathir Muhammad, PM
Malaysia ke-IV, geudjak peugah Malaysia deungôn pandang ke Timur, nak ikôt
Korea dan Djepang, tetapi digobnjanjan, seubeutoi djih hana mafhum that
tjara-tjara keureudja Korea dan Djépang dengôn seumangat keureudja djih
bak geukeureudja.
(2). Troih 'an uroë njoë hana latihan keureudja ban sigom dônjä, njang djeuet
tandéng dengan tjara-tjara latéhan keuredja atawa manadjemen Komite Peralihan
Korea dan Komite Peralihan Djepang.
(3). Keuseuneuléh ulôn peugah bahwa, tulèsan njoë nakeuh saboh gambaran sebagoë
njang ulôn meukeuseuëd dalam saboh suë di Mesdjid Maulana: Achèh, njang ka hana
abèh seuleusoë bak geudjaweub lé sjèedara Ridwan Abu Bakar, salah sidroë
angèeta rombongan sjèedara Muzakir Manaf, Sofyan Dawod dan Razak
Kamaruddin. Dan ka ulôn peugah tjit keu sjèedara Ridwan Abubakar dan Bakhtiar
Abdullah Musa, akan meukeusud suë ulôn njan watèe kamoë bhan 'lhèe meusapat.
(4). Nakeuh suë njan, lagèe meukeusud tulésan diateuh njoë, sebagoë saboh
formula keu sjèedara-sjèedara dan rakan-rakan GAM njang "diateuh" beu lagèe
njan keruh geupeutimang anggèeta GAM laèn njang saban gulam beudée peu-ék prang
dan anggèeta GAM njang laèn, meusigoë deungon GAM njang mat Walkie-Talkie dan
ureung gampong njang bri beunantu 'breuh-bu seureuta ban bandum bansa Achèh
njang teungoh hudéep apôh-apah, bah keuh beusanteut-santeut dan beusama-sama
geupeurasa n'ikmat seumentara dari MoU Helsinki, Finddlandia, lagèe njang ka
geubri tjènto lé Djéndral Park Cung-hee dari Korea Selatan dan Perwira-Perwira
Samurai (Petinggi-Petinggi Tantra) dari Meiji Dynasti-Djépang, 'lheh abéh masa
muprang!
Wassalam,
Omar Putéh,
Meunasah Reudeuep
Achèh Rajeuk
