http://m.vijaykarnataka.com/edit-oped/columns/sudheendra-haldodderi/articleshow/59338851.cms
*ನೆಟ್ ನೋಟ: ರೆಡಿಯಾಗುತ್ತಿದೆ ನೋವನ್ನು ಅಳೆಯುವ ಮೀಟರ್* Updated Jun 27, 2017, 07:21 PM IST AAA ** ನೆಟ್ ನೋಟ: ಸುಧೀಂದ್ರ ಹಾಲ್ದೊಡ್ಡೇರಿ* ಹೊಟ್ಟೆನೋವೆಂದು ವೈದ್ಯರ ಬಳಿ ಹೋಗಿರುತ್ತೀರಿ. ಪ್ರಾಥಮಿಕ ಪರೀಕ್ಷೆಯಲ್ಲಿ ವೈದ್ಯರು ನಿಮ್ಮ ಹೊಟ್ಟೆಯ ವಿವಿಧ ಭಾಗಗಳನ್ನು ಒತ್ತುತ್ತಾ, ನೋವಿನ ತೀವ್ರತೆ ಎಲ್ಲಿದೆಯೆಂದು ಗುರುತಿಸುವ ಪ್ರಯತ್ನ ಮಾಡುತ್ತಾರೆ. ಎಷ್ಟೋ ಬಾರಿ ತೀವ್ರ ನೋವಿನ ಭಾಗವನ್ನು ನಿಖರವಾಗಿ ಗುರುತಿಸಲಾಗುವುದಿಲ್ಲ. ಕಾರಣ, ಮಿದುಳಿನಲ್ಲಿ ನೋವಿನ ಸಂವೇದನೆ ಹಾಗೂ ಸ್ಪರ್ಶ ಸಂವೇದನೆಗಳ ನಡುವೆ ಸರಿಯಾಗಿ ತಾಳೆ ಹಾಕಲು ಸಾಧ್ಯವಾಗುವುದಿಲ್ಲ. ಮತ್ತೂ ಒಂದು ಪ್ರಬಲ ಕಾರಣವೆಂದರೆ, ನೋವು ತೀವ್ರವಾಗಿದ್ದಾಗ ಯಾವುದೇ ಭಾಗದ ಸ್ಪರ್ಶವೂ ಒಂದೇ ಬಗೆಯ ನೋವಿನ ಸ್ಪಂದನ ನೀಡುತ್ತಿರುವಂತೆ ಭಾಸವಾಗುತ್ತದೆ. ಹಲ್ಲು ನೋವಿನ ತಪಾಸಣೆಯ ಸಂದರ್ಭದಲ್ಲಿ ಈ ಬಗೆಯ ಅನುಭವಗಳು ನಿಮಗಾಗಿರಬಹುದು. ಜ್ವರ ಬಂದರೆ ತಾಪಮಾನ ಅಳೆಯುವ ಸಾಧನವಿದೆ. ರಕ್ತದೊತ್ತಡದ ಏರುಪೇರನ್ನು ಗುರುತಿಸಲು ಅಳತೆಗೋಲಿದೆ. ನಾಡಿಮಿಡಿತವನ್ನು ಎಣಿಸಲೂ ಬಹುದು. ನೋವೆಂಬ ಬಾಧೆಯನ್ನು ಗಣನೆ ಮಾಡುವ ಹಾಗಿದ್ದರೆ ಎಷ್ಟು ಚೆನ್ನಾಗಿರುತ್ತಿತ್ತು, ಅಲ್ಲವೆ? ನೋವಿನ ತೀವ್ರತೆಯನ್ನು ಪರೋಕ್ಷ ವಾಗಿ ಗುರುತಿಸಬಹುದು. ಉದಾಹರಣೆಗೆ ಕಿರುಚಾಟದ ತೀವ್ರತೆ ನೋವಿನ ತೀವ್ರತೆಗೆ ಅನುಗುಣವಾಗಿರಬಹುದು. ಆದರೆ, ನಾಟಕೀಯವಾಗಿ ಅಬ್ಬರಿಸುವವರು ವೈದ್ಯರನ್ನು ದಿಕ್ಕೆಡಿಸಬಹುದು. ಹಾಗೆಯೇ, ನೋವನ್ನು ತಡೆದುಕೊಳ್ಳಬಲ್ಲ ಸತ್ಯಾಗ್ರಹಿಗಳು ವೈದ್ಯರನ್ನು ಗೊಂದಲಕ್ಕೀಡು ಮಾಡಬಹುದು. ಹೀಗಾಗಿ ನೋವು ನಿವಾರಕ ಮದ್ದಿನ ಪ್ರಮಾಣವನ್ನು ನಿಗದಿ ಪಡಿಸುವುದರಲ್ಲಿ ಹೆಚ್ಚೂ-ಕಮ್ಮಿಯಾಗುತ್ತದೆ. ಬಹುತೇಕ ನೋವು ನಿವಾರಕ ಮದ್ದುಗಳು ಅಡ್ಡ ಪರಿಣಾಮಗಳನ್ನುಂಟು ಮಾಡುವುದರಿಂದ, ಅಗತ್ಯಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಸೇವನೆ ಅಪಾಯಕರ. ಇಷ್ಟು ನೋವಿಗೆ ಇಷ್ಟೇ ಪ್ರಮಾಣದ ಮದ್ದು ನೀಡುವ ಮೂಲಕ ಇಂಥ ತೊಂದರೆಗಳನ್ನು ನಿವಾರಿಸಬಹುದೆನೋ ನಿಜ. ಆದರೆ ಒಬ್ಬೊಬ್ಬರ ದೇಹ ಪ್ರಕೃತಿಯೂ ಭಿನ್ನವಾಗಿರುವ ಕಾರಣ ಯಾವುದೇ ರಾಸಾಯನಿಕದ ಪರಿಣಾಮಗಳು ಒಂದೇ ಬಗೆಯದಾಗಿರುವುದಿಲ್ಲ. ನೋವಿನ ತೀವ್ರತೆಯನ್ನು ನಿಖರವಾಗಿ ಗುರುತಿಸುವ ಮೂಲಕ ಸರಾಸರಿ ಮದ್ದಿನ ಪ್ರಮಾಣವನ್ನು ಲೆಕ್ಕಹಾಕಬಹುದೆಂದು ವೈದ್ಯವಿಜ್ಞಾನಿಗಳು ಆಲೋಚಿಸುತ್ತಿದ್ದಾರೆ. ಅಮೆರಿಕದ ಸ್ಟಾನ್ಫರ್ಡ್ ವಿಶ್ವವಿದ್ಯಾಲಯದ ಸ್ಕೂಲ್ ಆಫ್ ಮೆಡಿಸನ್ನಲ್ಲಿ ನೋವನ್ನು ಗುರುತಿಸುವ, ತೀವ್ರತೆಯನ್ನು ಅಳೆಯುವ ಮಾಪನವೊಂದು ಸಿದ್ಧವಾಗುತ್ತಿದೆ. ಕೆಲವೊಂದು ದೈಹಿಕ ನ್ಯೂನತೆಗಳಿಂದಾಗಿ ನೋವನ್ನು ಗುರುತಿಸಲು ಅಶಕ್ತರಾದವರ ನೋವನ್ನು ಈ ಯಂತ್ರವು ಅಳೆಯಬಲ್ಲದೆಂದು ವಿಜ್ಞಾನ ಪತ್ರಿಕೆಗಳು ವರದಿ ಮಾಡಿವೆ. ಇದಕ್ಕಾಗಿ ಅತ್ಯಾಧುನಿಕ ತಪಾಸಣಾ ವಿಧಾನವಾದ 'ಫಂಕ್ಷ ನಲ್ ಮ್ಯಾಗ್ನೆಟಿಕ್ ರೆಸೊನೆನ್ಸ್ ಇಮೇಜಿಂಗ್' ಅನ್ನು ಬಳಸಲಾಗಿದೆ. ಸಾಮಾನ್ಯವಾಗಿ ಮಿದುಳಿಗೆ ಸಂಬಂಧಿಸಿದ ಆಘಾತಗಳಾದಲ್ಲಿ ವೈದ್ಯರು 'ಎಂ.ಆರ್.ಐ. ಸ್ಕ್ಯಾನ್' ಮಾಡಿಸಿ ಎಂದು ಸಲಹೆ ನೀಡುತ್ತಾರಲ್ಲವೆ? ನರತಂತುಗಳ ವ್ಯೂಹದಲ್ಲಿ ರಕ್ತದ ಚಟುವಟಿಕೆಗಳನ್ನು ಗುರುತಿಸುವ ತಪಾಸಣಾ ವಿಧಾನವಿದು. ಚಟುವಟಿಕೆಗಳಿಗೆ ಬೇಕಾದ ಗ್ಲುಕೋಸ್ ಹಾಗೂ ರಕ್ತ ಸಂಪರ್ಕಕ್ಕೆಂದು ನರತಂತುಗಳಲ್ಲಿ ವಿಶೇಷ ಚೀಲಗಳಿರುವುದಿಲ್ಲ. ಸಂದರ್ಭಕ್ಕೆ ತಕ್ಕಂತೆ ಚಟುವಟಿಕೆಗಳು ಹೆಚ್ಚಿರುವ ಪ್ರದೇಶದಲ್ಲಿ ರಕ್ತಪರಿಚಲನೆ ಹೆಚ್ಚಾಗುತ್ತದೆ. ಇಂಥ ವಿಶೇಷವಾದ, ಅಂದರೆ ಅಸಾಮಾನ್ಯ ರಕ್ತಪರಿಚಲನೆಯನ್ನು ಆ ಪ್ರದೇಶದ ಕಾಂತ ಸ್ಪಂದನವನ್ನು ಅಳೆಯುವ ಮೂಲಕ ಗುರುತಿಸಬಹುದು. ವಿಕಿರಣ ರಹಿತ ಹಾಗೂ ಕೆಲವೇ ಸೆಕೆಂಡುಗಳ ಚಟುವಟಿಕೆಯನ್ನೂ ನಿಖರವಾಗಿ ಗುರುತಿಸಬಲ್ಲ ವಿಧಾನವಾಗಿರುವುದರಿಂದ 'ಫಂಕ್ಷ ನಲ್ ಎಂ.ಆರ್.ಐ.' ಹೆಚ್ಚು ಜನಪ್ರಿಯವಾದ ಮಿದುಳು ತಪಾಸಣಾ ಸೌಲಭ್ಯವಾಗಿದೆ. ಸ್ಟಾನ್ಫರ್ಡ್ ವೈದ್ಯಕೀಯ ಕಾಲೇಜಿನ ಪ್ರಾಧ್ಯಾಪಕರು, ಅರಿವಳಿಕೆ ತಜ್ಞರು ಹಾಗೂ 'ನೋವು ಪರಿಣತ'ರಾದ ಶಾನ ಮೆಕೇಯ್ ನೇತೃತ್ವದ ವೈದ್ಯವಿಜ್ಞಾನಿಗಳ ತಂಡವು 'ಎಫ್.ಎಂ.ಆರ್.ಐ.' ತಪಾಸಣಾ ವಿಧಾನದಿಂದ ದಕ್ಕಿದ ಮಾಹಿತಿಯನ್ನು ವಿಶೇಷವಾಗಿ ರೂಪಿಸಿದ ಕಂಪ್ಯೂಟರ್ ಸೂತ್ರಗಳೊಂದಿಗೆ ವಿಶ್ಲೇಷಣೆ ಮಾಡಿದೆ. ಈ ಮೂಲಕ ನೋವಿಗೊಂದು ಅಳತೆಗೋಲು ಸಿಕ್ಕಂತಾಗಿದೆ. ನೋವು ಗ್ರಹಿಸುವ ಮಿದುಳಿನ ಭಾಗದಲ್ಲಾಗುವ ಸೂಕ್ಷ ್ಮ ಬದಲಾವಣೆಗಳನ್ನು ಗ್ರಹಿಸಿ, ಚಿತ್ರ ವಿಶ್ಲೇಷಣೆಯ ಮೂಲಕ ನೋವಿನ ತೀವ್ರತೆಯೆಷ್ಟು ಎಂಬುದನ್ನು ತಿಳಿಯಬಹುದಾಗಿದೆ. ಇದುವರೆಗೂ ನೋವಿನಿಂದ ಬಳಲುವವರ ಹೇಳಿಕೆಯ ಆಧಾರದ ಮೇಲೆ ವೈದ್ಯರು ನೋವಿನ ತೀವ್ರತೆಯನ್ನು ಅಂದಾಜು ಮಾಡುತ್ತಿದ್ದರು. ಸೂಕ್ಷ ್ಮ ಸಂವೇದನೆಯನ್ನು ಹೊಂದಿರುವವರು ಅಥವಾ ತೊಂದರೆಯನ್ನು ಹೇಳಿಕೊಳ್ಳಲು ನಾಚದವರು ತಮ್ಮ ಹೇಳಿಕೆ ಅಥವಾ ನಡೆವಳಿಕೆಯ ಮೂಲಕ ತೀವ್ರತೆ ಹೆಚ್ಚಾಗಿದೆಯೆಂದು ಮನವರಿಕೆ ಮಾಡಿಕೊಡುತ್ತಿದ್ದರು. ನೋವಿನ ತೀವ್ರತೆಯನ್ನು 'ಎಫ್.ಎಂ.ಆರ್.ಐ.' ಸಂಕೇತಗಳ ಮೂಲಕ ಗ್ರಹಿಸಿದ ನಂತರ ವಿಶ್ಲೇಷಣೆ ಮಾಡುವ ಕಂಪ್ಯೂಟರ್ ಸೂತ್ರಗಳನ್ನು ರಚಿಸುವಲ್ಲಿ ಶಾನ್ ಮೆಕೇಯ್ ಅವರಿಗೆ ನೆರವಾದವರು, ನೀಲ್ ಚಟರ್ಜಿ. ಪ್ರಸ್ತುತ ಮೆಕೇಯ್ ಅವರ ಮಾರ್ಗದರ್ಶನದಲ್ಲಿ ಚಟರ್ಜಿ ಡಾಕ್ಟರೇಟ್ ಅಧ್ಯಯನ ನಡೆಸುತ್ತಿದ್ದಾರೆ. ಈ ಹಿಂದೆ 1995ರಲ್ಲಿಯೇ ನೋವಿನ ಅಳತೆಗೋಲೊಂದು ಕಂಪ್ಯೂಟರ್ ಸೂತ್ರವಾಗಿ ನಿರ್ಮಾಣವಾಗಿತ್ತು. ಅದನ್ನು ಓರ್ವ ವ್ಯಕ್ತಿಯ ಹೇಳಿಕೆಯ ಆಧಾರದ ಮೇಲೆ ರೂಪಿಸಲಾಗಿತ್ತು. ಚಟರ್ಜಿ ಅವರ ತಂಡವು ನಿರ್ಮಿಸಿದ ಯಂತ್ರವನ್ನು ಮೊದಲು ನೋವಿನಿಂದ ಬಳಲುವ ಓರ್ವ ವ್ಯಕ್ತಿಯ 'ಎಫ್.ಎಂ.ಆರ್.ಐ.' ಸಂಕೇತ, ಆತನ ನೋವಿನ ತೀವ್ರತೆಯ ಬಗೆಗಿನ ಹೇಳಿಕೆಗಳಿಗೆ ಹೊಂದಿಸಲಾಯಿತು. ವಿವಿಧ ದಿನಗಳ, ವಿವಿಧ ಸಮಯಗಳಲ್ಲಿ ದಾಖಲಿಸಿದ ಮಾಹಿತಿಯ ಆಧಾರದ ಮೇಲೆ ಆ ಯಂತ್ರವು ವ್ಯಕ್ತಿಯೊಬ್ಬನ ನೋವಿನ ತೀವ್ರತೆಯನ್ನು ಗ್ರಹಿಸಿ ಅದಕ್ಕೊಂದು ಸೂಚ್ಯಂಕ ನೀಡುವಲ್ಲಿ ಯಶಸ್ವಿಯಾಯಿತು. ಬಹುದಿನಗಳ ಪರಿಶೀಲನೆಯಲ್ಲಿ ಯಂತ್ರವು ಪ್ರತಿಶತ ಎಂಬತ್ತೊಂದು ಬಾರಿ ಸರಿಯುತ್ತರ ನೀಡಿತ್ತು. ಇಂಥ ಯಶಸ್ಸಿನಿಂದ ಉತ್ತೇಜಿತರಾದ ಸ್ಟಾನ್ಫರ್ಡ್ ವೈದ್ಯವಿಜ್ಞಾನಿಗಳು ಅದೇ ಯಂತ್ರವನ್ನು ವಿವಿಧ ವ್ಯಕ್ತಿಗಳಿಗೆ ಅಳವಡಿಸಿ ನೋವಿಗೆ ಸಂಬಂಧಿಸಿದ ಮಾಹಿತಿಗಳನ್ನು ಸಂಗ್ರಹಿಸಿದರು. ಯಂತ್ರದ ತಂತ್ರಾಂಶ ಅಥವಾ ಸಾಫ್ಟ್ವೇರ್ ಅನ್ನು ಇಂಥ ದಾಖಲೆಗಳ ಸರಾಸರಿ ಸೂಚ್ಯಂಕವನ್ನು ನೀಡುವಂತೆ ಮಾರ್ಪಡಿಸಿದರು. ಅಸಲಿಗೆ ಇಂಥ ಯೋಚನೆ ಸ್ಟಾನ್ಫರ್ಡ್ ವಿಜ್ಞಾನಿಗಳಿಗೆ ಬಂದದ್ದು ಹೇಗೆ? ಎಂಬ ಕುತೂಹಲ ನಿಮ್ಮಂತೆಯೇ ನನಗೂ ಇತ್ತು. ಅಲ್ಲಲ್ಲಿ ತಲಾಷು ಮಾಡಿದಾಗ ಸಿಕ್ಕ ಮಾಹಿತಿ ಬೆರಗು ಹುಟ್ಟಿಸುವಂತಿತ್ತು. ಸ್ಟಾನ್ಫರ್ಡ್ ವಿಶ್ವವಿದ್ಯಾಲಯದ ಆವರಣದಲ್ಲಿಯೇ ಕಾನೂನು ಕಲಿಸುವ ಶಾಲೆಯಿದೆ. ಇಲ್ಲಿ ಕೆಲ ವರ್ಷಗಳ ಹಿಂದೆ ಜರುಗಿದ ಸಮ್ಮೇಳನಕ್ಕೆ ನರವಿಜ್ಞಾನಿಗಳಿಗೂ ಆಹ್ವಾನವಿತ್ತು. ನೋವಿನ ತೀವ್ರತೆಯನ್ನು ವೈಜ್ಞಾನಿಕವಾಗಿ ಅಳೆಯಲು ಸಾಧ್ಯವಾಗದ ಕಾರಣ ನ್ಯಾಯಾಲಯಗಳಲ್ಲಿ ಅಪರಾಧಿಗಳು ನೋವಿನ ನೆಪ ಹೂಡಿ ಶಿಕ್ಷೆ ತಪ್ಪಿಸಿಕೊಳ್ಳುವ ಸಾಧ್ಯತೆಯಿದೆಯೆಂಬುದರ ಬಗ್ಗೆ ವಾದ-ವಿವಾದಗಳಾದವು. ಹಾಗಿದ್ದಲ್ಲಿ 'ಪೇಯ್ನ್ಮೀಟರ್' ಒಂದನ್ನು ರೂಪಿಸಬಾರದೇಕೆ? ಎಂಬ ಆಲೋಚನೆ ಮೆಕೇಯ್ ಅವರಲ್ಲಿ ಮೂಡಿತು. ಅದರ ಫಲವೇ ಇದೀಗ ಸೃಷ್ಟಿಯಾಗಿರುವ 'ನೋವಿನ ಅಳತೆಗೋಲು'. ತೀವ್ರ ತಲೆನೋವೆಂದು ಪರಿಗಣಿತವಾದ 'ಮೈಗ್ರೇನ್' ನಿವಾರಣೆಗೆ ನೂರಾರು ಮದ್ದುಗಳು ಮಾರುಕಟ್ಟೆಯಲ್ಲಿವೆ. ನೋವು ಅನುಭವಿಸುವವರ, ನೋವನ್ನು ಅಳೆಯುವವರ ನಡುವೆ ತೀವ್ರತೆಯ ಬಗ್ಗೆ ತಾಳಿಕೆಯಿರಲು ಸಾಧ್ಯವಿಲ್ಲ. ವಿಶೇಷವಾಗಿ ಹಲ್ಲುನೋವಿನಿಂದ ನರಳುವವರ ಬಗ್ಗೆ ಡಾಕ್ಟರ್ಗಳೇ ಹೇಳುವ ಮಾತೊಂದಿದೆ - 'ಹೆರಿಗೆ ನೋವಿನ ತೀವ್ರತೆಗೆ ಸರಿ ಸಮಾನವಾದ ನೋವೆಂದರೆ ಹಲ್ಲು ನೋವು'. ಗಾಯ ಅಥವಾ ಆಘಾತಗಳಿಂದಾದ ನೋವನ್ನು ಅಳತೆಗೋಲಿಗೆ ಸಿಲುಕಿಸಿ ಸರಿ ಸುಮಾರಿಗೆ ಮಾಪನ ಮಾಡಬಹುದು. ಆದರೆ ಭಾವನಾತ್ಮಕ ನರಳಿಕೆಗಳು, ಮಾನಸಿಕ ಖಿನ್ನತೆ ಮತ್ತಿತರ ಮನೋದೌರ್ಬಲ್ಯಗಳಿಗೆ ಸಂಬಂಧಿಸಿದ ನೋವನ್ನು ಗಣನೆ ಮಾಡುವುದು ಸದ್ಯಕ್ಕೆ ನಿರ್ಮಿಸಿರುವ ಮಾಪಕಕ್ಕೆ ಸಾಧ್ಯವಿಲ್ಲ. ಈ ಬಗ್ಗೆಯೇ ವಿಶೇಷ ಪರಿಣತರು ತಂತ್ರಾಂಶ ಹಾಗೂ ನರಮಂಡಲ ಚಟುವಟಿಕೆಗಳ ನಡುವೆ ಸಂಬಂಧ ಕಲ್ಪಿಸುವ ಯತ್ನದಲ್ಲಿದ್ದಾರೆ. ನೋವಿಗೆ ತಕ್ಕ ಮದ್ದು ರೂಪಿಸುವುದು ಅಷ್ಟು ಸುಲಭದ ಕಾರ್ಯವಲ್ಲ. ಒಬ್ಬರ ನೋವು ಮತ್ತೊಬ್ಬರ ನೋವಿಗೆ ಅಳತೆಗೋಲಲ್ಲಿ ಸರಿ ಕಂಡರೂ, ದೇಹ ರಚನೆಗೆ ತಕ್ಕಂತೆ ಮದ್ದಿನ ರಾಸಾಯನಿಕಗಳು ಕೆಲಸ ಮಾಡುತ್ತವೆ. ತೀವ್ರ ನೋವಿನಿಂದ ನರಳುವವರ ಬಾಧೆಯನ್ನು ಕಿಂಚಿತ್ತಾದರೂ ಇಳಿಸುವಲ್ಲಿ ಹೊಸ ಮದ್ದುಗಳು ಸಹಕಾರಿಯಾಗಬಹುದೆಂಬ ನಿರೀಕ್ಷೆಯಲ್ಲಿದ್ದಾರೆ ವೈದ್ಯ ವಿಜ್ಞಾನಿಗಳು. ವೇದನೆಯನ್ನು ಕಮ್ಮಿಯಂತೂ ಮಾಡಲಾಗುವುದಿಲ್ಲ, ಹಾಗಿದ್ದರೆ ಮರೆಯುವಂತೆ ಮಾಡಲಾದೀತೆ? ರೋಗಿಯ ಗಮನವನ್ನು ಬೇರೆಡೆ ಸೆಳೆದು, ನೋವಿನ ತೀವ್ರತೆಯನ್ನು ಕಮ್ಮಿ ಮಾಡುವ ಬಗ್ಗೆ ವೈದ್ಯರು ಪ್ರಯತ್ನಿಸುತ್ತಲೇ ಇದ್ದಾರೆ. ಚಿಕಿತ್ಸೆ ಪಡೆಯುವವರನ್ನು ಮಾತಿನಲ್ಲಿ ಸೆಳೆದೊ, ಇಲ್ಲವೇ ಮಧುರ ಸಂಗೀತ ಕಿವಿಗೆ ಬೀಳುವಂತೆ ಮಾಡಿಯೋ ಸಮಾಧಾನ ಪಡಿಸಬಹುದೆಂದು ಕಂಡುಕೊಡಿದ್ದಾರೆ. ಆಟದಲ್ಲಿ ಎದ್ದು-ಬಿದ್ದ ಮಕ್ಕಳಿಗಾದರೆ ವಿಡಿಯೋ ಗೇಮ್ಗಳಿರುವ ಆಟಿಗೆಗಳನ್ನು ಕೊಟ್ಟು ಕಣ್ಣೀರು ತಪ್ಪಿಸುತ್ತಾರೆ. ಇದೀಗ ಮನೋವಿಜ್ಞಾನಿಗಳು ಕಂಡುಕೊಂಡಂತೆ 'ಮಿಥ್ಯಾ ವಾಸ್ತವ' ಚಿಕಿತ್ಸೆಯಿಂದ ಎಂಥದೇ ತೀವ್ರ ನೋವನ್ನು ಶಮನಗೊಳಿಸಬಹುದು. ಮಿಥ್ಯಾ ವಾಸ್ತವ ಅಂದರೆ ವಚ್ರ್ಯುಯಲ್ ರಿಯಾಲಿಟಿ. ಅದು ಗೊತ್ತಲ್ಲ? ಕಂಪ್ಯೂಟರ್ ಸೃಷ್ಟಿಸುವ ಒಂದು ಮಿಥ್ಯಾ ಲೋಕದಲ್ಲಿ ಮನುಷ್ಯ ನೇರವಾಗಿ ಭಾಗಿಯಾಗಿ ಅನುಭವಿಸಬಲ್ಲ ವ್ಯವಸ್ಥೆಯಿದು. ಉದಾಹರಣೆಗೆ ಕಂಪ್ಯೂಟರ್ ತೆರೆಯ ಮೇಲೆ ಸೃಷ್ಟಿಸಿದ ಇನ್ನೂ ಕಟ್ಟದಿರುವ ನಿಮ್ಮ ಮನೆಯೊಂದಲ್ಲಿ ನೀವು ವಿಹರಿಸುವಂತೆ ಮಾಡುವುದು. ತೀವ್ರ ಸುಟ್ಟ ಗಾಯದಿಂದ ನರಳುತ್ತಿರುವವರು ಚಿಕಿತ್ಸಾ ಸಮಯದಲ್ಲಿ ಮಿಥ್ಯಾ ಲೋಕಕ್ಕೆ ತೆರಳಿ ಅಲ್ಲಿ ಚಲನಚಿತ್ರವೊಂದರಲ್ಲಿ ಭಾಗವಹಿಸುವಂತೆ ಮಾಡಿದರೆ, ನೋವನ್ನವರು ಸುಲಭವಾಗಿ ಮರೆಯಬಹುದು. ಮನುಷ್ಯರ ಮನಸ್ಸು ಅದೆಷ್ಟೇ ಚಂಚಲವಾಗಿದ್ದರೂ, ಏಕ ಕಾಲದಲ್ಲಿ ಹತ್ತಾರು ವಿಷಯಗಳತ್ತ ಗಮನವನ್ನು ಕೇಂದ್ರೀಕರಿಸಲಾಗುವುದಿಲ್ಲ. ಒಂದೆರಡು ವಿಷಯಗಳ ಬಗ್ಗೆ ತೀವ್ರ ಆಸಕ್ತಿ ಬೆಳೆದಂತೆ ಉಳಿದ ಸಂವೇದನೆಗಳು ಆ ಕ್ಷ ಣ ಮರೆತು ಹೋಗುತ್ತದೆ. ಮಿದುಳನ್ನು ಹೊಕ್ಕುವ ನೋವಿನ ಸಂಕೇತಗಳು ಸಂಸ್ಕರಣೆಯಾಗದೇ ಹೋದರೆ ಆ ವೇದನೆ ಸ್ವಲ್ಪ ಮಟ್ಟಿಗೆ ತಪ್ಪುತ್ತದೆ. ಯಾವ ಹೊಡೆತ ಎಷ್ಟು ನೋವು ತಂದಿದೆಯೆಂದು ಅಳೆಯುವುದು ಕಷ್ಟ. ಹಾಗೆಯೇ ಮಾನಸಿಕ ಬಳಲಿಕೆಯಿಂದಾದ ನೋವನ್ನು ಗುರುತಿಸುವುದೂ ಕ್ಲಿಷ್ಟಕರ. ಅಳತೆಗೋಲಿಗೆ ಸಿಗದ ನೋವನ್ನು ಹೇಗಾದರೂ ಸೆರೆಹಿಡಿದು, ನೋವಿಗೆ ತಕ್ಕ ಮದ್ದನ್ನು ರೂಪಿಸುವ ಹಂಬಲ ವಿಜ್ಞಾನಿಗಳದು. Hareeshkumar K GHS Huskuru Malavalli TQ Mandya Dt 9880328224 -- ----------- 1.ವಿಷಯ ಶಿಕ್ಷಕರ ವೇದಿಕೆಗೆ ಶಿಕ್ಷಕರನ್ನು ಸೇರಿಸಲು ಈ ಅರ್ಜಿಯನ್ನು ತುಂಬಿರಿ. -https://docs.google.com/forms/d/e/1FAIpQLSevqRdFngjbDtOF8YxgeXeL8xF62rdXuLpGJIhK6qzMaJ_Dcw/viewform 2. ಇಮೇಲ್ ಕಳುಹಿಸುವಾಗ ಗಮನಿಸಬೇಕಾದ ಕೆಲವು ಮಾರ್ಗಸೂಚಿಗಳನ್ನು ಇಲ್ಲಿ ನೋಡಿ. -http://karnatakaeducation.org.in/KOER/index.php/ವಿಷಯಶಿಕ್ಷಕರವೇದಿಕೆ_ಸದಸ್ಯರ_ಇಮೇಲ್_ಮಾರ್ಗಸೂಚಿ 3. ಐ.ಸಿ.ಟಿ ಸಾಕ್ಷರತೆ ಬಗೆಗೆ ಯಾವುದೇ ರೀತಿಯ ಪ್ರಶ್ನೆಗಳಿದ್ದಲ್ಲಿ ಈ ಪುಟಕ್ಕೆ ಭೇಟಿ ನೀಡಿ - http://karnatakaeducation.org.in/KOER/en/index.php/Portal:ICT_Literacy 4.ನೀವು ಸಾರ್ವಜನಿಕ ತಂತ್ರಾಂಶ ಬಳಸುತ್ತಿದ್ದೀರಾ ? ಸಾರ್ವಜನಿಕ ತಂತ್ರಾಂಶದ ಬಗ್ಗೆ ತಿಳಿಯಲು -http://karnatakaeducation.org.in/KOER/en/index.php/Public_Software ----------- --- You received this message because you are subscribed to the Google Groups "Maths & Science STF" group. To unsubscribe from this group and stop receiving emails from it, send an email to [email protected]. To post to this group, send an email to [email protected]. For more options, visit https://groups.google.com/d/optout.
