സ്നേഹത്തിന്റെ സന്ദേശം ജീവിതത്തിലെന്നപോലെ മരണത്തിലും കമല സുറയ്യ ഉദാത്തമായ സ്നേഹത്തിന്റെ സന്ദേശവാഹകയായി. ആ സന്ദേശം സഫലമാക്കുന്നതില് ജീവിതകാലത്ത് നേടാനായതിനേക്കാള് വലിയ വിജയമാണ് ഒരുപക്ഷേ, മരണാനന്തരം അവര്ക്ക് കൈവരിക്കാനായത്. പാളയം ജുമാമസ്ജിദിലെ ഖബറിസ്ഥാനില് അല്ലാഹുവിന്റെ മഹത്വം വിളംബരം ചെയ്യുന്ന വചനങ്ങള്ക്കിടയില് കമലയുടെ ചേതനയറ്റ ശരീരം ഭൂമി ഏറ്റുവാങ്ങുന്നതിന് സാക്ഷ്യം വഹിക്കാനെത്തിയ ജനക്കൂട്ടം അതാണ് സൂചിപ്പിക്കുന്നത്.
പുറം ലോകത്തുനിന്ന് കിട്ടിയ തരത്തിലുള്ള ആദരം കേരളം തനിക്ക് നല്കിയില്ലെന്ന് കമല ദാസ് എന്ന മാധവിക്കുട്ടി പറയുമായിരുന്നു. സത്യസന്ധതയിലും ആത്മാര്ഥതയിലും നൂറില് നൂറു മാര്ക്കിനും അര്ഹയായ വ്യക്തിയായിരുന്നു അവര്. അത്രമാത്രം സത്യസന്ധതയും ആത്മാര്ഥതയും ഉള്ക്കൊള്ളാനുള്ള കഴിവ് കേരളസമൂഹത്തിന് ഇല്ലാത്തതു കൊണ്ടാവണം ജീവിച്ചിരിക്കെ അവരെ പൂര്ണമായും ഉള്ക്കൊള്ളാന് നമുക്കായില്ല. അന്ത്യയാത്രയിലുടനീളം അഞ്ജലിയര്പ്പിക്കാനെത്തിയ ജനക്കൂട്ടം ഉള്ളിന്റെയുള്ളില് നാം പ്രകടിപ്പിക്കാതെ കാത്തുസൂക്ഷിച്ച ആദരത്തിന് തെളിവാണ്. പൂനെയില്നിന്ന് കേരളത്തിലേക്കുള്ള യാത്രയില് മക്കള് മോനു, ചിന്നന്, ജയസൂര്യ, മറ്റ് കുടുംബാംഗങ്ങള് എന്നിവരോടൊപ്പം മതപണ്ഡിതന് ശൈഖ് മുഹമ്മദ് കാരകുന്ന് ഉള്പ്പെടെ ഏതാനും ഇസ്ലാമിക കുടുംബാംഗങ്ങളുമുണ്ടായിരുന്നു. മുംബൈയില് നിന്ന് സാംസ്കാരികമന്ത്രിയുടെ നേതൃത്വത്തില് ഔദ്യോഗിക സംഘവും ചേര്ന്നു. രാത്രി വൈകി തിരുവനന്തപുരത്തെത്തുമ്പോഴേക്കും മലയാളികള് കമല സുറയ്യയെ നെഞ്ചിലേറ്റിയിരുന്നെന്ന കാര്യത്തില് സംശയത്തിന് ഇടമുണ്ടായിരുന്നില്ല മുമ്പെങ്ങും കണ്ടിട്ടില്ലാത്ത രംഗങ്ങളാണ് ഖബറിസ്ഥാനില് കണ്ടതെന്ന് അവിടത്തെ രീതികള് അറിവുള്ളവര് പറയുന്നു. സന്ദര്ഭത്തിന്റെ സവിശേഷത തിരിച്ചറിഞ്ഞ് മസ്ജിദ് ഭാരവാഹികള് ഉദാരമായ സമീപനം സ്വീകരിച്ചു. പള്ളിപ്പറമ്പിലെ സ്ഥലപരിമിതി പരിഗണിച്ച് ആചാരവെടിയുള്പ്പെടെ ഔദ്യോഗിക ബഹുമതിയുടെ ഭാഗമായുള്ള ചടങ്ങുകള് സമീപത്തുള്ള ചന്ദ്രശേഖരന് നായര് സ്റ്റേഡിയത്തില്വെച്ചു നടത്തുന്നതിനെക്കുറിച്ച് അധികൃതര് ആലോചിച്ചു. എന്നാല് ബന്ധപ്പെട്ടവര് വേണ്ട ഏര്പ്പാടുകള് അവിടെത്തന്നെ ചെയ്തുകൊടുത്തു. കമലദാസിന്റെ മതപരിവര്ത്തനം വ്യക്തിപരമായ തീരുമാനമായിരുന്നു. അതെടുത്ത സാഹചര്യം അവര് സുഹൃത്തുക്കളോട് പറഞ്ഞിരുന്നു. അത് മനസ്സിലാക്കാന് അവര്ക്ക് പ്രയാസമുണ്ടായിരുന്നില്ല. എന്നാല് സമൂഹത്തില് അത് മനസ്സിലാക്കാനാകാത്തവരും ഉണ്ടായിരുന്നതുകൊണ്ട് ഭീഷണികള് നേരിടേണ്ടിവന്നു. ഇസ്ലാമികസമൂഹത്തിന് അവര്ക്ക് സുരക്ഷിതത്വബോധം നല്കാന് കഴിഞ്ഞു. ജുമാമസ്ജിദിലെ ഖബറിസ്ഥാനില് നിന്ന് പ്രസരിച്ചത് സ്നേഹത്തിന്റെ സന്ദേശമാണ്. മലയാളി മനസ്സിന്റെ അടിത്തട്ടില് ഒളിഞ്ഞുകിടക്കുന്ന, നവോത്ഥാനമൂല്യങ്ങളുടെ ഭാഗമായ, മതസൌഹാര്ദ ചിന്ത തട്ടിയുണര്ത്തിയാണ് കമല സുറയ്യ കടന്നുപോയിരിക്കുന്നത്. -- -- Warm Regard M S ALI Deira,Dubai Online at: [email protected] --~--~---------~--~----~------------~-------~--~----~ You received this message because you are subscribed to the Google Groups "newsline" group. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/newsline?hl=en -~----------~----~----~----~------~----~------~--~---
