|
Assalamu'alaikum wr.wb.,
Kinilah wakatu nan paliang tapek
untuak badoa. Badoa apo? Badoa semoga Allah SWT mendatangkan pamimpin nan sabana
pamimpin untuak mauruih nagari awak nan gadangko. Baa ka indak. Sagadang ko
nagari. Nomor ampek paliang banyak panduduakno di bumi Allah ko. Laweh alang
kapalang. Kayo nan sabanano jo sumber daya alam. Laweh lauik basano. Subur,
banyak kayu di hutan nan laweh pulo. Banyak 'harato' dalam paruik bumi.
Tapi alah ampia anam puluah tahun mardeka, namun nagariko taruih sajo salah
uruih. Salah gubalo, dek salah nan duduak di kamudi. Intino bana salamoko,
ado-ado sajo 'ilaik' no urang nan duduak di kamuditu. Tumah sampai kini,
bangso awak ko sakik nan sabana sakik. Nan di-kiak sagalo barek, nan
di-kacak sagalo alia, kok salero iyo amuah-amuah. Sagadangko bangso, mambuek
pinjaik sin alun juo pandai lai doh. Sabanyakko manusia, salaweh tu nagari,
salawehtu lauik, nan kadimakan mambali taruih juo lai baru. Bareh babali,
basalundupan pulo masuakno. Gulo babali, basalundupan pulo masuakno. Garam
babali. Lai kajadi garam, babali, baimport juo lai baru. Itulah tando anak
bangso ko sadang sakik. Dek nan mamimpin salamoko indak panah ado nan 'cuciang',
nan luruih. Nan ado banyak nan tukang kepoh sajo. Pamimpin-pamimpin awak umumno
ajaib-ajaib. Ano pagawai, baiak ka jenderal bana pangkaikno, tau awak bara
gajino, tau awak dima suduik dapua rang gaekno, tapi tibo-tibo takajuik awak,
kirono awakno kayo gadang. Bapuluah milyar pitihno, itupun nan disabuikno, nan
indak disabuikno iyo Tuhan jo awakno sajo nan ka tahu, padohal indak panah
sakali juo tadanga awakno jadi urang panggaleh doh, sabab karajono
iyo dikantua sajo sajak saisuak no.
Lah panek awak rasono jo kaadaan nan
indak sanderehko. Lah ingin awak nagari ko badaso andakno saketek. Rakyaikno
badaso andakno saketek. Jaleh urusan masiang-masiang anak nagari
sarato ba siluruih kasadono. Jaleh karajo nan kadikakok, jo ba
siluruih mangakokno. Jaleh tagakno hukum, nan sabana hukum. Nan tibo di
mato indak bapiciangkan, tibo di paruik indak bakampihkan. Hukum ko ha. Hukum,
nan sabana bagarah-garah sajo salamoko.
Itulah paraluno awak babaliak ka
Allah Ta'ala. Badoa jo mamintak basungguah-sungguah. Ya Allah datangkanlah urang
nan elok, nan luruih, nan adia, nan kajadi pamimpin di nagari kamiko. Ya
Allah ampunilah doso kami salamoko, nan pangicuah, nan pamaleh, nan gadang hota,
nan zhalim kadiri kami. Ya Allah tunjukilah kami, ampunilah kami,
rahmatilah nagari kami, jauhkanlah bala dari kami. Ya Allah dangakanlah sarato
kabuakanlah doa kami, ya Allah, ya Rabbal 'Alamiin.
Wassalamu' alaikum
wr.wb.,
Lembang Alam
(Baco bismillah khusyuak-khusyuak ka
mancoblos ari Sinayan)
|
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ___________________________________________________
