Assalamu'alaikum.w.w.
.... kito taruihkan curito kito ......
Hari barikuiknyo, lah tampak pulo sutan kito bamanuang
baliak di ateh jambatan tun.
Baa dek tambah kacau go, janno sutan.
Pikia ka pikia, sarjana ruponyo punyo caro nan babeda
jo seniman. Seniman mancari hakekat jo caranyo surang,
jo ilham, jo roh, jo perasaan.
Sarjana mamakai rumus-rumus dan hitungan-hitungan, jo
hipotesa dan teori, sudah tu mambuktikannyo jo
per-cobaan-percobaan.
Utak Sutan Ain baputa dan manjalajah hampia sarupo
pelukis abstrak jo pengembaraan seninyo. Takana di nyo
bahaso pernah baraja di bangku sakola rumus-rumus
abstrak tantang iko. Sebagian besar dari rumus-rumus
ko adolah abstrak, jauah dari kenyataan dalam bantuak
angko-angko jo rumus-rumus matematika.
Usao sungguah-sungguah dari surang sarjana nan ingin
mahancuakan jo mailangkan sintesa dan analisa
tradisional, manggantinyo jo pandangan tantang hakekat
nan tadinyo tasuruak di baliak laia kebiasaan jo
tradisi.
Apo sabananyo laia atau salubuang kebiasaan ko ?
Kito maliek sesuatu, nan bukan sajo indak samparono,
malah kito indak malieknyo samo sakali, mungkin
sesuatu nan kito liek, malah indak ado ujuiknyo.
Disamping warna spektrum nan taliek ado pulo
warna-warna lain. Sinar ultra violet, gelombangnyo
pendek-pendek sahinggo indak dapek kito indera. Sinar
infra merah, gelombangnyo labiah panjang untuk dapek
kito liek. Dek karano itu kito indak manampak sinar tu
walaupun ujuiknyo ado. Adonyo sinar-sinar ko dapek
dibuktikan jo plat-plat potret nan sensitif, jo
termometer.
Sabaliaknyo kadang-kadang kito maliek sesuatu nan
indak ado ujuiknya. Sejumlah bintang nan kito liek jo
teleskop di cakrawala, mancapai jarak 50 juta tahun
cahaya dari kito. Artinyo sinar-sinar nan dipancarkan
bintang-bintang itu paralu ukatu 50 juta tahun untuk
sampai ka mato awak. Cahayo nyo nan kito indera kini
ko, dipancarkan sajak sakian juta tahun nan lalu dek
bintang-bintang itu. Jadi awak indaklah maliek hakekat
bintang-bintang itu, nan nampak adolah masa lampaunya.
Tantang hakekatnyo kini, hanyolah Allah nan tahu,
mungkin lah hancua dan hilang, mungkin lah padam,
mungkin lah pindah jauah ka ujuang lain dari semesta
abadi nan indak batapi ko, kalua jauah dari
pangliek-tan kito walau mamakai alat nan baa pun juo.
Keadaan bintang itu kini indak mungkin awak ketahui,
kecuali sasudah 50 juta tahun nan katibo.
Mungkin kito silau dek kilek sesuatu nan sabananyo
indak ado ujuiknyo samo sekali.
Sampai bantuak itu kaindak yakinan kito.
Sampai bantuak itu ruponyo indera kito ko lah
mangicuah kito.
Apo nan dapek manuntun kito kalua dari kebingungan ko.
Baa awak bisa sampai ka hakekat di tangah-tangah galok
itam pakek takah iko ?
Tambah tamanuang Sutan kito mamikiakan, dek ari
lah laruik sanjo, mungkin isuak diinok diranuangi
baliak baa nan sabana no go. Allah Mahakuasa, kok
indak diagiah ilimu ka manusia go, indak kamangarati
�.. janno Sutan.
.... barisuak kito sambuang ....
Wassalam
St. Sinaro
__________________________________
Do you Yahoo!?
New and Improved Yahoo! Mail - 100MB free storage!
http://promotions.yahoo.com/new_mail
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
___________________________________________________
