sanak kanduang di tanah deli
nan elok baso jo aluih budi
pintak jo pinto nan ka dibari
sambuiklah kasiah jo putiah hati
gunuang tinggi nan didaki
lautan basa disubarangi
walaupun jauah baribu kaki
cinto dihati indak ka mati
dipuhunkan do'a kapado Allah
maminta rahmat sarato berkah
supayo dikuatkan baibadah
baka iduik di alam akhirah
iduik di dunia samantaro
akhiraik tampaik salamono
apokah baka nan ka dibao
mahadok Allah nan kuaso
anak istri harato bando
cuman amanah nan Maha kayo
kalau wakatu alah tibo
amal ibadah nan ka dibao
panorama jo pintu kabun
urang mambaok buruang nuri
siang ba paneh malam ba ambun
dek mancari sasuok nasi
patang jo pagi bakuhampeh
mancari rasaki hujan jo paneh
mangumpuakan intan sarato ameh
nan kahabih ilang jo tandeh
iduik di dunia samantaro
akhiraik kampuang salamono
kapado Allah nan maha kuaso
disarah kan nasib badan nangko
Allah berfirman dalam Al-Quran
iduik nangko penuh cobaan
marilah kito taguahkan iman
jauahkan doso dan kemaksiatan
sambuiklah salam dari ambo
nan tapuruak di kandang singo
kalau Allah mambari maso
mungkin kito bisa basuo
Wassalam
Do you Yahoo!?
Yahoo! Mail - 50x more storage than other providers!
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ___________________________________________________
