Katiko tu, ambo masih anak umua ampek baleh taun. Grup God Bless mangaluakan album bajudul "Raksasa" nan langsuang laku kareh. Gitaris Ian Antono baru sajo kalua dari God Bless tu, jadi di album tu indak ado rauangan suaro gitar Ian Antono lai, nan lah cukuik dikenal pencinta God Bless.
Nan bamain lead-gitar di album baru tu adolah Eet Syahranie, nan kabanyo baru lulus dari GTI (Guitar Institute of Technology, Hollywood) nan pernah dilatiah dek Paul Gilbert. Padahal kudian Eet sendiri mangakui, bahaso rumor sajo nyo tu. Inyo indak pernah sikola disitu ataupun dilatiah Paul Gilbert. Cuma sempat baraja sound engineering bbrp bulan di Ohio. Walaupun baitu, publik nampaknyo manarimo dengan baik kehadiran Eet tu (nan kudian jadi terkenal pulo jo grup barunyo nan didirikan sudah itu basamo-samo jo Ekky Lamoh dan Fajar Satritama, kawan ambo kini). Syahdan, salah satu lagu God Bless di album itu adolah lagu berjudul "Ayat Setan"; "Ayat setan Yang kau terbitkan Membakar perasaan manusia Perdamaian masih pagi Perang belum berhenti Lalu kau siram api Akibatnya Harus kau terima..." Baitulah kiro2 syair lagu God Bless tu nan lumayan taraso lamak dibaoan Ahmad Albar. Namun lagu tersebut bukanlah lagu andalan album tersebut. Yang jadi andalan adalah lagu berjudul sama dengan tajuk albumnya, "Raksasa". "Kau, raksasa Tertawa-tawa, terbahak-bahak Kepentingan pribadi, kau pikirkan Tipu sana dan sini, engkau lakukan..." Baitu kiro2 sebagian syair lagu "Raksasa" tu. Ambo kutiko itu alah baraja2 pulo malaguan lagu2 tsb, walupun masih bunyi suaro kantuik sajo bunyinyo jo suaro ambo. Pado maso itu, di sekitar Payokumbuah daerah mudiak, Kecamatan Guguak dan sakitarnyo, urang acok maadoan "Sandiwara" pado wakatu urang tempo sikola. Di sandiwara tu, tampillah sagalo macam kebolehan muda-mudi kampuang, sarato tua-tui kampuang nan masih bajiwa muda-mudi. Sandiwara tu diadoan biasonyo di gedung sikola SD setempat. Mulai kiro-kiro sasudah sumbayang Isya, salasai nyo wakatu subuah sajo nan malarai. Acara Sandiwara dibukak biasonyo dek Kapalo Jorong, sasudah baliau maadoan kato sambutan sakaki, disusul kato sambutan dari Katua Karang Taruna, Ibuk Katua PKK (jikok paralu), tapi nan indak pernah maagiah kato sambutan adolah katua Majelis Taklim. Sasudah sambutan-sambutan salasai, mulailah acara nan sabananyo. Ben kampuang siap-siap untuak tampil mambaokan lagu partamo. Tapi samantang Ben kampuang, jan anggap remeh sajo dulu sanak. Dikampuang ambo bennyo wakatu itu dipimpin dek kakak ambo pado gitar, dan kawan2nyo main instrumen lain. Salain mambaokan lagu2 dangdut, mereka juga mambaokan lagu2 nan top di kota pado maso itu. Lagu2 Godbless adolah lagu favorit, lagu2 dari Deep Purple ciek-ciek. Tapi iyo jan maarok lagu Queen apolai Frank Zappa. Lagu rok nan acok dibaokan salain lagu God Bless adolah lagu berjudul "permata Hitam". "Gerak bibirnya, sangat kaku Tatap matanya, menerawang setiap sudut.." Baitu kiro2 awal lagu "Permata Hitam" tu. Katiko ambo ingin mambaokan lagu "Raksasa" tadi tu, kakak Ambo langsuang manyirengeh. "Waang indak usah lah balagu. Indak ka salasai dek waang do, bacilakuik sajo nyo!" Kecek kakak ambo. Tapaso lah kucuik sajo ikua ambo bakcando kuciang dibaokan lidi. Dek karano ambo indak ka malagu, lamo-lamo beko tantu beko ambo bisa diusia dek Cilan (keamanan pentas) kalua dari pentas. Sadangkan mambali karicih masuak indak ado dalam kamus ambo do. Akhianyo ambo bakarajo jadi tukang layar sajo. Kok lah salasai lagu ciek, ka batuka jo urang manari, mako tali layar ambo egang. Lah siap urang ka manari, tali layar ambo sentakkan baliak. Ruang tampek panonton adolah ruang kelas nan dibukak sekat pamisahnyo, sahinggo mamanjang manyarupai gedung bioskop. Katiko acara sandiwara alun dimulai, lampu penonton masih tarang (mamakai listrik dari masin disel), tapi kutiko acara lah mulai, lampu penonton bamatikan. Ambo cigok dari baliak layar, urang2 nan bacewek kadang2 alah marapek sajo. Baitu lampu iduik baliak manjalang acara pose, maranggang baliak. Kiro-kiro alah satangah acara sandiwara tu bajalan, diadokan "pose" agak sajam duo jam. Dalam pose tu, acaranyo yaitu "Lelang Kue". Anak gadih nan paliang rancak di kampuang tu tagak mangamek di tangah pentas, tangan suok mamacik kue madok kateh, tangan kida tasanda di pinggang, pas bana di lakuak bodi nan bakcando gitar sapanyol. Iyo bana titiak aia salero urang mancaliak. Antah mancaliak kue atau mancaliak nan mamacik, ambo indak tau. Dalam acara lelang kue tu, ado surang tukang lelang-nyo (tukang janang, MC lelang) nan mahariak-hariakkan. Sia nan ingin manyampaikan sesuatu, biasonyo sindia-manyindia, kanai manganaian antar kelompok kampuang, bisa maagiahkan pitih ka tukang lelang, sarato mambisiakkan pasannyo ka talingo tukang lelang. Dikampuang ambo tu, tukang lelang kue-nyo banamo Gocoh (Syaf namo aslinyo, tapi di kampuang ambo namo Syaf, singkatan dari Syafruddin atau Syafri, acok dipanggia "Coh" sajo. Lamo-lamo jadi "Gocoh"). Mancaliak bantuaknyo sajo urang lah galak. Apolai mandanga inyo mangecek. Lucu bana. Karajo Gocoh nan sabananyo adolah tukang, tapi tibo musim manggi inyo gilo manggi, musim durian inyo lah gilo durian sajo. Umuanyo kutiko itu sakitar 30-an. Badan ketek, sunguik bengkok, suaro kadalam, mancaliak inyo bajoget jankan urang ndak kagalak, kabau sajo bisa galak dek lucunyo. "Halo-halo, manyo pareman, longang sajo, lah barongik tukang pacik kue manantian. Manyo?" Hariak Gocoh mambukak lelang. Pareman nan bagarombol disuduik kanan bawah pentas nampak mangode Gocoh. Gocoh mandakek, sudah tu salah surang tampak babisiak ka Gocoh. Sasudah mandapek nan kadikatokan, Gocoh maju ka muko pentas baliak. "Iko posan dari pareman Ndonguang (Donguang-dounguang mungkasuiknyo). Ma nyo pareman Kuranji, baa kok indak tadonga mandokuk. Indak mandapek lukah potang. Bayia 500 piah." Kecek Gocoh jo mik. Maksud pareman (di Limopuluah koto, kato pareman lah berkembang arti, bukan cuma preman sajo, tapi juga "kelompok") Danguang-danguang tu mamanciang urang Kuranji mangecek. Lukah adolah panangkok baluik, karajo malukah tu indak patuik dikarajokan dek rang mudo, mangkonyo urang Danguang2 tu manyindia sarupo itu. Batua sajo, pareman Kuranji nan tagak di sabalah bawah kida pentas, mangode Gocoh pulo. Sasudah dibisiakkan, disampaikanlah dek Gocoh jaweknyo. "Oi pareman Ndonguang. Jan ongeh bona lai. Baru tabuek katupek sakaruang, olah ongeh pulo. Bayia 1000 piah." Kecek Gosoh. Acara kanai manganaian itu balangsuang balamo-lamo, kadang baselingi jo lagu permintaan, pareman nan mamintak bajoget kateh pentas. Lagunyo biasonyo dangdut. Sampai akhianyo kue tu tajua ka salah satu kelompok, lelang kue pun berakhir. Setelah lelang tu biasonyo cuma menampilkan bagian terakhir dari drama nan alun salasai, sudah tu sandiwara berakhir. Ayam pun mulai bakukua tando wakatu subuah. Drama nan ditampilkan di sandiwara tu biasanya karangan rang mudo setempat. Indak sarupo jo sinetron2 kini, drama tu ditampilkan sacaro live. Untuak memberikan kesan drama tu sarupo jo pilem di TVRI, mangko pada bagian intro partamo, sasudah mangecekkan sepatah kata, tokoh drama berdiri kaku, freezed sesuai dengan karakternyo. Pambao acara mangecek memperkenalkan masiang2 tokoh; "Sarwandi, sebagai Johni." lalu si Wandi tu maju ka tangah pentas, mengucapkan sepatah dialog: "Cukup Shiva, jangan kau menghianati aku lagi!" Sasudah mangecek tu, si Wando managok bakcando patuang, dengan mimik muko berang, dan tangan tatunjuak ka muko. Sudah tu, pembawa acara melanjutkan, "Imelda, sebagai Shiva!" Lalu Si Mel maju ke pentas. Ia berlutut di hadapan Wandi nan memerankan Johni tu, lalu mangecek, "Tidak Johni, ia hanya teman biasa bagiku, percayalah padaku Johni..." Lalu sudah tu pembawa acara melanjutkan; "Yusniar, sebagai Ibu Shiva." Tek Iyuh pun maju ke pentas membawakan perannya, sudah tu tagok pulo. Lalu, "Masni, sebagai ayah Shiva." Mak Mas pun katangah, dan seterusnya. Ondeh, lah panjang sajo carito, padahal tadi mungkasuik ka bacarito tantang "Ayat Setan", tapi lah masalah sandiwara sajo nan bacaritokan. Dek ari lah malam, carito "Ayat Setan" kito lanjutkan barisuak. Note; Dalam acara sandiwara, sindir menyindir dan persaingan antar sesama pareman kampuang tidak jarang membawa kekerasan yang berujung pada perkelahian terbuka antar kelompok. Tidak jarang jatuh korban, karena para pareman itu umumnya membawa senjata tajam pisau di balik jaketnya (hanyo urang2 tuo nan mamakai kain saruang, pareman indak pernah bakain saruang, kama muko ka disuruakkan.) Pada suatu malam di tahun 1989, dalam sebuah acara Sandiwara di desa Kuranji, Kecamatan Guguak, Limopuluah Koto, satu truk pareman dari Parak Batuang, dekat Pasar Payakumbuh datang menyerbu pareman desa Kuranji tu. Mereka semua membawa pisau dan terlihat sangat membabi buta (Pareman Parak Batuang cukuik terkenal reputasinya). Pareman Kuranji yang tidak siap menghadapi lawan yang tidak seimbang kewalahan, beberapa orang terluka dan dilarikan ke rumah sakit. Satu orang tewas dengan luka tusuk di bagian dada sebelah kiri. * Parung, 22 Agustus 2004 (To be continued with the story of Satanic Verses) Wady Afriadi 0815-970-1611 [EMAIL PROTECTED] http://wady.or.id ---------------------------------------- Do You Urangawak? Join the [EMAIL PROTECTED] The group of Minangkabau folks worldwide To join, click http://groups.yahoo.com/group/urangawak ---------------------------------------- __________________________________ Do you Yahoo!? Yahoo! Mail is new and improved - Check it out! http://promotions.yahoo.com/new_mail ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
