Mancaliak gambar urang basilek di majalah tu kadang-kadang taragak lo Mak Ngah malakekan baju jo sarawa gelembong tu. Sudah dilakekan iyo bangkik lo sumangaik; balapoh-lapohan lo sarawa galembong tu, manyipak-nyipak, maheptah-heptah ditangah rumah, ilia mudiak dari dapua sampai ka biliak, surang, saroman juaro ndak dapek lawan. ... Hep tah... Hehhehh...:)
Randai Nan Tongga nan Mak Ngah caliak wakatu ketek tu memang Nan Tongga Si Magek Jabang jo Puti Gondoriah. Karano Anak Randainyo dari Payokumbuah, rasonyo Koto nan Godang, logat atau dialek nan dipakai iyo bana Caro Pek Ten. Wakatu tu pulo Mak ngah partamu kali mancaliak Puti Gondoriah, kironyo si Puti tu urang laki-laki basanggua babadak babaju padusi. Baitu randai maso dahulu. Indak ado anak gadih sato doh. Kini dek lah moderen namonyo go eh, lah sato lo anak-anak padusi mamancak-mancak basarawa galembong, tapi sayang heptahnyo agak aluih saik suaronyo... Daulupun sabananyo banyak urang padusi Minang nan santiang-santiang basilek, tapi indak dijadikan tontonan randai doh, disiapkan sabagai self defense, musuah nan indak dicari-cari, basuo pantang diilakkan.
Kalau Eva baparan (eh, indak naiak paran rumah doh :) ) sabagai Intan Korong, sia garan Intan Korong ko? Apokoh inyo mandeh dari si Gondoriah? Ciek lai tanyo Mak Ngah apokoh Anak Randai atau panulihnyo tahu dimaa bana tu lataknyo Gunuang Ledang?
Manganai pamain di Honolulu tu mukasuiknyo tantu mambukak kurusuih maaja anak-anak sikola sinan barandai. Sudah tu untuak graduationnyo mareka diminta mampatontonkan kapandaiannyo dengan para bintang dan guru-guru nan didaangkan dari tampek budaya asli, dalam hal iko dari Minangkabau. Kami di UCSC (University of California Santa Cruz) malakukan hal nan saroman tu dengan Gamelan/Tari Sunda jo Bali tiok tahun.
Dek kini Eva di Nagari Juruman tu (Dusseldorf?) sakali-sakali kok pai ka Kassel singgah sabanta ka Roternburg an der Fulda. Ado kawan Mak Ngah dahulu jadi dotor di sinan, namonyo Syaiful Rangkuti. Nomor taliponnyo wakatu tahun 1986 indak manyahuik lai. Wakatu itu Mak Ngah sampai ka Rantaunyo dalam pajalanan mangambara dari mancaliak Matoari Tangah Malam di Lofoten Island, Norway, manari-nari di Skandinavia sampai mandaki-daki Pagunuangan Alpen di Switzerland. Kok Eva basuo jo Angku Syaiful tolong sampaikan salam Mak Ngah. Taragak lo Mak Ngah baliak ka Eropah eh...
Good luck jo translation project Randai tu. Sakitulah dahulu.
Salam, -- Mak Ngah 32604
From: Eva Nukman <[EMAIL PROTECTED]> Date: Sun Aug 22, 2004 3:35pm Subject: [EMAIL PROTECTED] Randai (was: Re: datang tampak muko)
Alhamdulillah, salam perkenalan ambo lai batarimo. tarimo kasih dunsanak kasadonyo, tarutamo Mak Ngah jo uda Syahril.
manyabuik Mak Ngah yobana mambuek ambo takana jo kampuang Baruah Gunuang, karano di sinan ado kakak sepupu ibu ambo nan kami imbau Mak Onga (pakai o, khas br. gng). apolai kironyo Mak Ngah lah pernah pulo marancah nagari tu.
Mamak manyingguang randai Nan Tongga. apokah samo jo Anggun Nan Tongga? zaman saisuak di bangku kuliah, wakatu masih bagabuang jo Unit Kesenian Minang-ITB, ambo lai sato bamain randai Anggun Nan Tongga tu, manjadi Intan Korong. :)
ambo alah pulo mancigok jurnal nan Mamak rujuak (Asian mungkin mukasuiknyo yo Mak? bukan Asean). ambo indak dapek masuak ka artikelnyo tu doh. tapi yo urang nan manulih laporan tu pulo nan manjadi induak samang ambo kini. istilah kerennyo tantu awak sabuik klien. :) laporannyo sarato naskah randai pertamo tu (Umbuik Mudo and the Magic Flute)dimuek pulo di Asian Theatre Journal, vol. 20, no. 2 (Fall 2003). wakatu itu ambo alun ikuik proyek tu lai do.
randai nan kini adolah Magek Manandin, samo jo Umbuik Mudo, nan mambuek naskahnyo Musra Dahrizal dari (ASKI)Padang Panjang. atau jan-jan pak Musra sendiri ikuik di milis ko, atau anaknyo? nan pulo alun jaleh bagi ambo, apo nanti Pak Musra jo kawan2 ka datang ka hawaii sarupo dulu. nan pasti, urang2 nan ka bamain randai ko adolah mahasiswa jurusan teater di univ. hawaii.
ambo alun jaleh bilo tanggal pasti randai ko ka dipentaskan. kalau ndak salah dulu dikecekan oktober. kini kami sadang mampahaluih kalimat2nyo. bia lah nanti ambo tanyoan, ka mamak ambo mambari kaba.
lorong kapado diri ambo kok uda Syahril tanyoan, ambo nan indak mudo lai. umua alah kapalo tigo, anak alah tigo pulo. di padang ambo gadang di Anduriang, namun ayah ambo kini tingga di Aia Tawa (namonyo tantu nan ado di balakang namo ambu tu). sajak lulus sma ambo maninggaan padang, mulo2 dek alasan sikolah, tapi jauah2 marantau basikolah ruponyo indak gelar se nan dapek do, dapek pulo junjungan urang jawa. jadilah ambo indak pulang lai ka padang. lah menetap se di banduang, lalu cimahi, sampai ambo barangkek ka jerman karano Uwan ambo tadi S3 di siko.
singgo itu dulu carito ambo, dunsanak kasadonyo,
Kok ado sumua di ladang buliah kito manumpang mandi kok ado umua ka panjang buliah kito manumpang mandi sakali lai....
(hahahaa, bagarah saketek)
banyak maaf,
va nan sadang taragak jo "Basijobang"
--- Outgoing mail is certified Virus Free. Checked by AVG anti-virus system (http://www.grisoft.com). Version: 6.0.735 / Virus Database: 489 - Release Date: 8/6/2004
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
