"Kenalkan, Nama Saya Simon S. Berland."
Masalah namo memang acok juo jadi bahan pembicaraan antaro Ambo jo kawan ambo nan banamo Simon S. Lantiak nan alah pernah ambo caritokan itu.
"Waang sok kabaraik-baraik-an disiko ko, dima lo ado urang awak banamo Simon." Baitu urang acok mananggapi masalah namo kawan Ambo tu. Tapi dasarnyo Simon SB ko memang urangnyo akanyo bajalan, indak pernah abih dek inyo kato kadijadikan jawek.
Katiko kami singgah sabanta sasudah bajalan dari Sungai Tolang, mancaliek anjiang mamaknyo nan katonyo rancak tu - rencana Simon anjiang tu kadisalang untuak paburu, tapi indak kadibaliak-baliak-an lai do, keceknyo-
di lapau Mak Iyuh Gosoh di tapi tabiang tu, mangko mangko mangecek pulolah Simon ko manjalehan ka Mak Iyuh Gosoh nan batanyo;
"Masalah namo ko mak Iyuh, ado pamain sandiwara Inggirih nan banamo Sekspier mangecekkan bahaso namo itu indak bararti do."
"Namo ambo iyo sarupo namo urang baraik, tapi kan ambo tatap urang U.S.A." Kecek Simon manarangan labiah lanjuik. Langsuang Mak Iyuh manyalo,"Ka jadi urang Amerika angku?"
"U.S.A. tu aratinyo Urang Sungei Lontiak Asli, Mak Iyuh." Jawek Simon.
"Cubo batanyo ambo ka Mak Iyuh, sia namo panjang Mak Iyuh?"
"Yusmardi St. Kociak." Jawek Mak Iyuh. Namonyo iyobana sasuai jo bantuak urangnyo nan kadi, kaciak.
"Ambo raso, namo2 nan ado kato Iyuh tu, atau Yus bahaso Indonesianyo, adolah namo2 pangaruah Bangso Romawi ka Urangawak."
Ambo agak tapikia pulo sangenek, Romawi apo pulo ko nan dimungkasuik Simon SL ko. Tapi ambo dangakan sajo taruih keceknyo jo Mak Iyuh.
"Mak Iyuh, sia namo guru kapalo di SD Guguak Tigo?"
"Mak Iyuh bapikia sabanta, sudah tu dijaweknyo, "Ayuh..., Ayuh namonyo. Tapi namo panjangnyo sabananyo Arius."
Agak tabulalang mato ambo saketek. Sabab guru kapalo SD Guguak Tigo tu adolah kawan maso sikola gaek ambo si SGB (sikola guru maso saisuak). Takana bana dek ambo, bahaso iyo itu namo aslinyo.
"Arius itu adolah namo salah satu Kaisar Romawi pado zaman dulu, Mak Iyuh."
Alun sempat ambo bapikia lai, alah ditambah pulo dek Simon;
"Cubo caliak dek Mak Iyuh, Imsakiah lamo nan tatempe di dindiang sasak tu. Sia namo urang ahli hisabnyo?"
Dek karateh imsakiah tu dakek dari tampek ambo duduak, ambo nan sugiro mambaconyo, walaupun Mak Iyuh alah andak bajalan ka dakek karateh tu.
Kutiko itu alah kiro-kiro tigo bulan sudah hari rayo haji, tapi Imsakiah nan tatempel di dindiang lapau Mak Iyuh tu alun bacabuk juo lai. Babiakan batempe disinan. Banyak di rumah2 urang di kampuang ambo nan sampai tigo imsakiah dari taun nan babedo tatempe di dindiangnyo, indak baangke-angek-an. Manjalang bulan puaso, iyo banyak urang mambagi-bagi imsakiah tu. Dari rumah makan, martabak mesir, sampai koperasi mambagi2 imsakiah untuak urang banyak, disaratoi ju ucapan "Selamat Menjalankan Ibadah Puasa."
"Sia tukang hisabnyo, Di?" Tanyo Mak Iyuh ka ambo karano ambo dicaliaknyo alah mambaco imsakiah tu.
Supayo jaleh, ambo baco bana langkok-langkok: "Dihisab oleh Arius Syaikhi, dosen..." dan sataruihnyo. Dibawah tulisan tu adolah jadwal waktu labiah kurang untuak daerah2 lain, yaitu, Natal, Kotanopan, Padang Sidempuan, Sijunjung, dan seterusnyo.
"Tu ciek lai, namo Romawi nan disandang dek salah surang buya terkenal kito." Sambuang Simon dengan yakinnyo. Ciek nan indak bisa ambo tiru dari Simon ko adolah, tiok mangecek, inyo salalu manamukan bukti2 jaleh, nan ado di dakek awak. Antah dari ma datang isi kapalonyo. Satau ambo, sajak mulai sikola di STM Negeri Payokumbuah, inyo memang rajin mambaco koran. Dari Singgalang, Sentana, sampai Haluan nan bahuruf sagadang2 tenju di abih dibaconyo.
"Lai tantu dek Mak Iyuh namo asli Angku Iyuh Surau Batu?" Batanyo Simon ka Mak Iyuh baliah. Tapi mak Iyuh manggeleang sajo jawabnyo, mangko dijaweklah surang dek Simon pertanyaan nan disampaikannyo tu.
"Darius Dt. Sati namo langkoknyo Mak. Ambo raso namo tu masih babau Romawi juo."
Indak baminaik Mak Yuh Gosoh tu mangecek namo2 sarato Romawi antu balau tu lai, jadi sasudah tu dialiahnyo kecek ka anjiang nan tadi kami caliak tu.
Katiko sadang asik maota, ambo sadang manjalehan pusa-pusa anjiang nan amuah diaja, tampak lalu babarapo urang bujang jo gadih, segar-segar dan rancak-rancak nampaknyo. Nan laki-laki babaju kauih, batulisan rancak-rancak, nan padusi babaku kameja kotak-kotak, langan singkek, sarawa lepis, indak ado nan barok do, kecuali surang, barok panjang dek inyo bajilbab.
Ambo etong, ado salapan urang kasadonyo, padusi ampek, laki-laki ampek urang. Rancak-rancak jo manih-manih. Ambo raso karancak-annyo itu indak nampak dari mukonyo do, tapi antahlah, mungkin dari gayanyo nan indak samo jo urang kampuang kabanyak-an.
Simon S.Lantiak ko icak2 indak tau, matonyo luruih ka galeh kopi nan alah candu-nyo se nan tingga lai, bacampua jaguang. Ambo tapuak pungguangnyo, "Hei, caliak tu ha!"
"Anak KKN tu mah." Kecek Mak Iyuh manyalo kami, dek tau nyo ambo panasaran.
"Bilo tibo-nyo Mak Iyuh?" Tanyo Ambo.
"Baru sanjo kapatang. Nan laki-laki tingga di rumah Jusni, nan padusi di rumah Ibu Roslinar." Ruponyo Mak Iyuh alah mangatahui labiah dahulu. "Anak2 kuliah di Unan tu mah." Jaleh Mak Yuh manambahan.
Ati ambo badampuang, baa lah caro bakenalan ju urang2 tu? Rancak2 bana, kok lai ado untuang awak bajodoh jo urang2 santiang tu? Nan gadih2 tu nan manarik paratian ambo. "Cubo lah imbau, kok lai namuah nyo kamari." Mak Yuh Gosoh kan****g ko bantuak tau se inyo nan ambo pikiakan.
Dicaliak urang tu, rancak-rancak kasadonyo. Ambo caliak pulo diri ambo surang. Ambo lai babaju kauih pulo, tapi kuniang warnanyo, bagambar duo jari di sabalah muko, di balakang bagambar baringin, baju GOLKAR nan dapek wakatu urang kampanye. Angek dipakai, dek ambo lah baliak dari Sei Tolang pulo ba-Honda CB manuruikkan Simon SB ko, baunnyo iyo alah agak ganjia, dek bahannyo tetoron.
Sarawa nan dipakai anak2 KKN tu nan laki-laki nampak dek Ambo agak luruih2 modenyo. Ampia samo gadang ukuran kakinyo kateh sampai kabawah. Sadangkan sarawa lepis nan ambo kanakkan adolah sarawa gadang kateh ketek kabawah, begi mode-nyo, kecek urang nan manjuanyo di Pasa Ibuah Payokumbuah, alah batumbok di ikuanyo. Tarompak ambo, tarompah japang. Sadangkan anak2 tu nampaknyo batarompah kulik Nekerman. Ado surang nan mamakai sapatu, bantuak sapatu urang di tipi, nan ado runciang nan bakelok sarupo tando ceklis/ batua di karateh jikok ujian awak bana jaweknyo. Antah apo merek sipatu tu.
Urang2 tu liwaik di muko lapau Mak Iyuh, baranti manyapo sabanta, "Parmisi, Pak." dengan sangaik sopannya. Mak Iyuh ko urangnyo memang akrab jo sia juo, batanyo nyo langsuang. "Ka kama tu? Singgah lah di lopau awak dulu."
"Mokasih Pak, tapi kami ka karumah Da Dedi Katua Karang Taruna dulu...." "E... heh." Baitu kecek mak Iyuh disambuang galaknyo nan khas tu.
Bakcando mairikkan kambiang ka aia ambo maajak Simon untuak namuah ka kantua desa malam tu. Karano, sasuai informasi dari Mak Iyuh, malam ko adolah malam parkenalan antaro Anak KKN Unan jo urang kampuang.
Kutiko acara lah dimulai, kami duduak di balakang, di nan kalam.
Protokol katiko itu adolah si Zainal Abidin, anak Mak Asih nan sikola di MAN Tabek Panjang, Pikumbuah.
"Puji syukur kita ucapkan kepada Allah SWT, yang telah memberikan kepada kita rahmat dan hidayahnya sehingga kita dikaruniai nikmat kesehatan sehingga bisa menghadiri acara rapat pada malam hari ini." Baitu kato pambukak nan disampaikan dek Bidin (panggilan Z Abidin anak Mak Asih tu).
"Shalawat dan salam, mari pulalah kita sampaikan kepada junjungan kita Nabi Muhammad Salallohu Alaihi Wassallam, yang telah membawa kita dari masa kegelapan kepada masa yang terang benderang seperti masa sekarang ini."
Sasudah kato sambutan dari Wali Jorong, Kato Sambutan dari Ketua Karang Taruna, sarato Katua anak KKN mamperkenalkan dirinyo, akhianyo tibolah wakatu untuak mamperkenalkan diri kami masiang2.
Simon dipasonyo dek Katua Karang Taruna maju kamuko, karano urang tau sakampuang bahaso sungguahpun sikolanyo cuma STM indak tamaik, pikiran Simon ko kadang2 indak tamakan dek urang kampuang. Sia tau, cocok inyo bagaua jo anak KKN, baitu mungkin pikiran urang.
Tapasolah Simon maju ka Muko, ka bawah lampu strongkeang (petromax mereknyo) nan tagayuik pas diateh meja kapalo Desa.
"Kenalkan, nama Saya Simon S. Berland." Kato Simon dengan yakin dan wibawanyo.
Urang2 tahaniang kasadonyo, sudah tu babisiak2. Anak2 KKN dengan kamek rancaknyo manunggu lanjutak kecek simon sarupo sadang di bangku kuliah. Da Endi katua taruna babisiak ka Ambo, "Apo katonyo?"
Dek simon ko tau bahaso urang kasadonyo panasaran. Mangko diulangnyo baliak, "Iyo, namo Ambo Simon S. Berland. Mungkasuiknyo Simon dari Sungai Berlantik."
Bakcando kapa pacah galak urang sudah tu mandanga kecek simon tu. Anak KKN nan kamek2 tu nampak tersenyum, tapi kaniangnyo agak bakaruik.
Urang kampuang ambo nan alah tabiaso jo garah simon nan kadang2 memang ndak masuak di aka alah pado maklum sadonyo.
Malam itu adolah awal dari sejarah penuh haru biru antara ambo, Simon, dan anak2 KKN tu di kampuang Ambo. Awal dari sebuah kenangan nan sampai kini masih lakek di benak kami.
Nan ka ambo caritokan di lain wakatu.
Medio September 2004 (w)
---------------------------------------- What happened to Urangawak?
http://groups.yahoo.com/group/urangawak
----------------------------------------
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
