Dari biliak Pasambahan, sekalian memperkenalkan biliak baru Mak Zul. ----- Original Message ----- From: muhasrul mz To: [EMAIL PROTECTED] Sent: Friday, September 24, 2004 11:33 AM Subject: [pasambahan] Assalamualaikum Warahmatullahi wa barakatuh
Manolah bundo kanduang di Minangkabau, sakali ambo maimbau, walau bundo kanduang nan diimbau , batin dek adat kasamonyo, pangana batin ka nan dunsanak sadonyo, ujuiknyo sambah ka nan banyak. Sambah sujuik sambah tasimpuah , sabarek bungka nan piawai, indak basibak jo basisie, bukan bahinggo jobabateh. Ujuiknyo sambah nan taunjuak, nyato tawalak ka ukuran, tabayang barieh jo balabeh, bana bak andai kato bida. Bundokanduang limpapeh rumah nan gadang, umbun puro pagangan kunci, pagangan kunci aluang bunian, pusek jalo kumpulan tali, sumarak dalam nagari, hiasan didalam kampuang, nan gadang basa batuah, kok iduik tampek banasa, kok mati tampek baniat, kaunduang unduang ka Madinah, ka payuang panji ka Sarugo. Ujuik tujuan buah rundingan, sakiro paham di kahandaki, bahubuang jo maso nan ditampuah, musim nan tumbuah iko kini, syari'at ado bahakikat, lahie kulik manganduang isi, di bumi nan tampak nyato , didalam pandangan ulemu, tiliek nyato paham mamanjek, di jauhari simpanan kato, jikok aka dijalankan, jotanang budi marangkak, kateh alah taambun jantan, kabwah jaleh takasiak bulan, sampang tabagi dek ulemu, lahie manjadi buah ama, dek enggeran soko nan tatagak. Koto aman alam santoso, salamat koroang jo kampuang, makmur anak kamanakan, dunie bulieh akhirat dapek, sinan mardeka makonyo panuah. Tapi sungguahpun baitu, kalau ditiliak nyato-nyato, jikok dipandang sungguah sungguah, dimainkan ereng jo gendeng, dipakaikan raso jo pareso nyato basuo kato papatah' Bakarih si kati muno, patah lai basimpai alun, ratak sabuah jadi tuah, kalau di bukak pusako lamo, dibangkik tareh nan tarandam, lah banyak ragi nan barubah, iyo bana bak pantun adapt: Bulek ruponyo daun nipah Bulek nan nyato bapasagi Diliek lipek tak barubah Dibukak lak tambuak tiok ragi Jalan dialiah dek rang lalu, cupak dipapeh rang manggalaeh, adat di aliah dek rang datang. Ukhuwah jo jangko kok tak tarang, susunan niniek muyang kito, dek rancak kilek loyang datang intan disangko kilek kaco. Lilek baliuang lah ka kaki , kolek camin lah ka muo, gabak dihulu tando kaujan, cewang dilangik tando kapaneh. Kalau malantai sabalun lapuakjikok maminteh sabalun anyuik, ingek samantaro alun kanai. Di dorok cando nan bak kian, tumbuahlah niaik dalam hati, kacalak calak ganti asah, parintang wakatu manjalang babuko, handak baraja adaat jo istiadat pusako tuo warih miniak muyang kito. Satantangan diri ambo nanko, lah banyak tabang dari inggok, umua habih tapakai di rantau urang, kok dietong kurun jo wakatu, iyolah labiah sapatigo abad. Niniak mamak alim ulamo, cadiak pandai sanak sudaro, bari izin ambo ba makmum, bari bairiang ambo ba jalan. Kok jalan luruih nan kaditampuah, adat nan basandi syarak, syarak basandi kitabullah, syarak mangako adaik mamakai di sinan ambo ka munuruik. Manusia basifat khilaf, Allah hanyo nan Qadim, kok basuo khilaf jo kilafat, indak di kasad di sangajo ampun jo maaf ambo pintakan. Disusun jari nan sapuluah, disusun lutuik nan duo, kok ado kato banan bukan anjak dek dunsanak ka nan bana. Wassalamua'laikum Wr.Wb ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
