assalamualaikum wrwb
wakatu ketek ambo pernah mandapek carito dari datuak
ambo, tapi carito ko sabananyo untuak uda ambo jo
mamak ambo nan kutiko itu alah sakolah di tarbiayh,
tapi dek ambo kutiko tu baru barumua 5 taun, ambo acok
bapaluak (pangku )jo datuak tu, jadi dek ambo tarekam
pulo nan di caritokan nyo ka uda jo mamak ambo tu.
dek takana dek ambo curito tu karano wakatu sumbayang
jumaik tadi ambo dapek buletin juma't di dalam nyo ado
curito tu samo bana jo nan di caritokan dek datuak
ambo tu.
katiko tu ari baru kiro2 pukua 6 pagi mato ari alun
lai tabik, nan urang baru siap sumbayang subuah,
sambia manunggu mato ari tabik kami bakumpua di rumah
sambia makan rabuih ubi jo minum teh manih.
"Koniak la kolian ado nan koden kecean ko kolian" (itu
bahaso kampuang asli kami di aie angek koto tinggi
gunuang ameh payo kumbuah) kecek datuak ambo ka uda jo
mamak ambo nan wakatu itu ado di rumah (indak sakola
do mungkin lbur).
katiko lah bakumpua datuak ambo mulai bacarito
"Dulu nyo kolian wakatu zaman nobi Musa, pado suatu
ari nampak la surang urang podusi bajalan sambia
manunduak, non anak gadih ko sobona rancak, kulik
putiah borosiah non nampak dari tangan nyo, sodangkan
mukonyo di tutuik dek kain kuluak, kain non di pakai
dek urang tu sagalonyo itam manunjuakan bak raso inyo
sadang ta seso bona ( berkabung ).
anak gadih ko bo jalan ko rumah nobi Musa, sampai di
muko rumah nobi Musa nyo tokok pintu sambia mongecekan
salam,
"masuaklah..!" kecek urang dari dalam rumah, baru anak
gadih tu masuak ka dalam rumah, sampai dalam rumah tu
bo suo lah anak gadih tu jo nobi Musa, kotiko basuo jo
nobi Musa urang ko langsuang monangih so koreh-koreh
nyo,
"ba'a kau dek monangih?" tanyo nobi Musa, tambah koreh
tangih urang tu,
"ba'a kau dek monangih?" tanyo nobi Musa baliak.
" ya nobi Allah tolonglah den , tolong do'a kan den ko
Tuhan supayo diampunkanNyo doso den non godang ko dek
Tuhan!"
" apo ko doso kau tu " botanyo nobi Musa baliak,
"payah bona den mongecekan doso den ko ya nobi"
" kecekan sa la jan ragu-ragu pulo kau lai "
Bacoritolah padusi cako ko nobi Musa,
" ambo lah bozina Nobi, sasudah tu ambo monganduang,
kutiko anak tu lahia kadunia ambo langsuang
mancokiaknyo sampai mati, dek ambo malu jo urang
banyak"
Mondonga curito padusi tu langsuang nobi Musa togak jo
mato merah nyo mangecek,
" Padusi kurang aja kau, bakirok kau dari rumah den
ko, dapek kutuak pulo rumah denko beko gara-gara kau,
pai kau kini juo"
Poilah anak gadih cako jo tangih non sodiah bona dari
rumah nobi Musa, indak tau anak gadih tu lai ko ma ko
mongadu, sadangkan ko nobi sajo lai indak dapek, jan
lai ko non lain, non tobayang dek inyo iyo godang doso
non lah di korojokannyo, mungkin indak ko to ampunkan
lai.
Sodangkan di rumah nobi Musa baru sajo anak gadih tu
poi langsuang malaikat Jibril turun maadok nobi Musa,
"Ba'a dek ongkou (kamu :pen) tulak uarang padusi non
nio tobat dari doso-dosonyo? lai ongkou tau doso non
lobiah godang dari pado itu?" kecek malaikat Jibril.
Tokojuik nobi mondongakan tanyo Jibril tu , lai ko ado
doso non lobiah godang ( dilua sirik ) dari pado
podusi pozina jo pombunuah tu?
"ya Jibril, ado juo doso non lobiah godang dari pado
doso podusi cako lai Jibril"
" lai " kecek Jibril,
" Doso apo tu Jibril? " tanyo nobi Musa ,
" Yaitu doso urang-urang non moningga kan Sumbahyang
(Solat:pen) socaro songajo tapi inyo indak pernah
monyosa (menyesal : pen), urang tu lobiah godang
dosonyo dari pado soribu kali Bozina" mondonga kecek
Jibril tu langsuang nobi Musa momanggia padusi cako
baliak, dan nobi mombacokan Du'a untuak momintakkan
tobat urang tu supayo di tarimo Tuhan"
Baru kino ambo tau bak raso carito nan di caritokan
datuak ambotu batua, ambo kiro coritonyo tu dulu cuma
sakadar manakuik-nakuik i kami sajonyo, tapi baru kini
ambo tau bakraso itu adolah pernah tajadi di zaman pra
Nabi.
Note:1. caritoko dulu di caritokan dek datuak ambo
2. Dikuatkan dek buletin jumat mesjid raya batam
edisi No.25/Jumat,24 September 2004 / Rajab 1425 H
Batam 24 sept 04
Gusdi.A (Didi)
_______________________________
Do you Yahoo!?
Declare Yourself - Register online to vote today!
http://vote.yahoo.com
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
