Untuak dunsanak kasadonyo..., salamaik basuo jo ambo baliak.. :)
Ado saketek palajaran nan takana di ambo, nan ka ambo
curai-papahkan di bawah ko.
Urang awak, sajak dahulunyo alah bisa mangarati perbedaan antaro
"bakaba" jo "mambao kaba".
Ado tangguang jawab nan barek nan dipikua dek seseorang jikok
inyo sendiri nan manyerakkan kaba, daripado sekedar mambao kaba.
Namun niniak moyang kito nan bukanlah urang bodoh, melainkan
urang cadiak, mambuek samacam "benteng intelektual" terhadap
seseorang nan cuma mambao kaba, dan bukan urang nan mambuek kaba
tu.
Benteng intelektual tu babungkuih dalam bantuak pantun, nan ambo
tulihkan di bawah iko;
====
"
Banda urang nan kami bandakan,
Banda urang Koto Tuo
Kaba urang nan kami kabakan,
Urang kok baduto, kami ndak sato
"
====
Sebuah pertanggung jawaban nan sangaik elegan!
Bara ka cadiaknyo niniak moyang kito.
Aratinyo (dek dunsanak nan alun paham bana jo kieh sarato
umpamo):
"Ambo cuma, mambandakan banda urang. Yaitu banda urang Koto Tuo"
"Dan ambo cuma mangabakan kaba urang, jikok urang tu baduto,
ambo ndak ado sato dalam duto to do, ambo cuma manyampaikan apo
nan dikecekkannyo ka ambo."
Dari kiasan tsb, niniak moyang kito alah manyadari, bahaso dari
kaba nan beredar tu (atau ota), indak tatutuik kamungkinan
bahaso ado pulo nan kaba DUTO.
Sepanjang awak indak pernah sato manyato dalam ba-DUTO, tantu si
pambao kaba dapek dibebaskan dari tuntutan nan mungkin timbua di
kamudian ari (!).
Dalam maso kini, di dunia urang2 intelektual, urang nan basikola
nan nak mancari gala S1, S2, atau S3, caro nan dipagunokan dek
niniak moyang kito ko dipakai pulo. Cuma namo nan balain. Kalau
di kampus nan elit sarato terpandang tu, tantu ndak bisa kito
manyabuik "mambandakan banda urang" sajo do.
Kalau ambo indak salah danga, caro niniak moyang kito tu
disabuik urang2 kampus sebagai "catatan kaki".
Itu carito nan pernah ambo danga dari anak KKN di kampuang ambo
nan banamo Tiaka, di Kec. Guguak, Limpopuluah Koto, Pikumbuah
Mudiak.
Antah baa kaki nan bacataik tu, alun sempat ambo mananyokan ka
anak KKN lai. Mungkin ado sanak2 nan alumni Unand bisa
manjalehan labiah jauah, jo caro nan intelektual sarupo nan
dipakainyo di kampusnyo tu.
Sabab, sarupo kecek salah surang mamak kito nan lulusan Unand,
"indak sumbarang urang nan bisa masuak ka Unand tu do."
Alah kajaleh se ambo jo Simon ndak ka pernah manjajak ka kampus
Unand tu do. Namun ambo barsyukur juo sempat maikua-ikua jo anak
Unand nan terhormat tu salamo inyo KKN di kampuang ambo. Bialah
durian ambo abih sabatang, karambia ambo tandeh satandan.
Bahkan, acok pulo ambo jadi baruak, ambo nan mamanjek karambia
dek anak2 Unand nan terhormat tu taragak jo karambia mudo.
Karano baruak nan disuruah indak namuah, karano inyo maraso
indak paralu bagaua jo anak Unand (dasar Baruak!), mangko tantu
ambo lah nan jadi baruak naika kateh karambia.
Iko lah maleo pulo kaji baliak nampaknyo, bisalah ambo sudahi
sabalun palaming pulo nan tibo!
Wassalam,
Wady Afriadi (30 th, 6 bulan)
P.S.:
Maaf, tanggapan2 ambo alun dapek manjumpai dunsanak kasadonyo,
karano moderator alun berkenan memuat tanggapan2 ambo tu
(dimoderasi). Mudah2an tulisan ambo ko, lai "laik muat" di
palanta ko.
__________________________________
Do you Yahoo!?
Yahoo! Mail - You care about security. So do we.
http://promotions.yahoo.com/new_mail
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
