Ingek sabalun kanai oleh: Drs. Indones St. Sati Lah satangah jam Indomo, Menan, jo Mangkuto tibo di Palanta Mak Sati. Lah abih ayia sarobaek sagaleh surang, baru Mak Sati mancogok "Asalamualaikum!" Mak Sati mambari salam. "Alaikum salam" sarangkek katigonyo manyauiti. Dek lai manyauik katigonyo , sanang bana hati ambo, tando elok niaek katigonyo". Ayia teh nan dilatakkan si Usuik, lah diiruik Mak Sati " Tampaknyo Angku-Angku mambao barita pantiang. Ado nan baru pulang dari kampuang?"
"Sampaikanlah Indomo!" , Menan manyilakan Indomo manyampaikan pasan nan dibao. Ruponyo Indomo lah diangkek manjadi Jursam. "Sambah Mak Sati", sambia mangecek Indomo mampatamukan tapak tangannyo dan manempelkan ujuang jarinyo di kaniang. "Eee. iko resmi tampaknyo. Sampaikan Indomo!' " Sungguah batigo kami nan datang tapi lah sarapek papeknyo mawakili kawan-kawan sa surau. Lah abih kopi sacerek, lah tandeh goreang sapanci, namun biduak indak juo ka tapi, golek indak tibo juo di nan data. Tingga lanjuik karajo nantun, diutuihlah kami nan batigo, manamui Mak Sati nan gadang basa batuah, urang nan cadiak candokio, ka pai tampaek batanyo, ka pulang tampaek babarito. Kok manabang lai di pangka, manjuluak lai di buah, Ambo sampaikan pasan nangko, kok indak manuruik adaek, kami ganjua babaliak suruik, kami baliakkan pasan ka nan pangka. Sakian sambah". "Lah sampai Indomo?" "Alah Mak Sati". "Bukannyo ambo ayam kinantan putih cotok, kukuak panjang ranggah takulai, ikua tajelo ka jarami lamak makan dikunyah-kunyah lasuah kecek dipakatokan. Ambo lai baduo jo si Usuik, nak dicari bulek nan sagolong, picak nan satapiak, mananti Indomo agak sabanta. Itu lai sabanta, tigo banta pun kami tunggu. "Sambah Indomo tampaknyo ka pangka tabu nan manih, ambo juo nan ka manyampaikan salam mangumbalikan sambah". "Mak Sati. Bak basi baiak, baringgi-i, nak ayia puncuran tabik, nan ulam pucuak manjulai.Pulang maklum ka Mak Sati". " Indomo, Tantang nan Indomo kamukokan tadi, lai di lae manjariau, tapek di garih nan bapaek, ibaraek manabang lai di pangka, umpamo manjuluak lai di buah. Sampai paparkan dek Indomo, sabarih jan ilang sakato jan lupo, nak samo sanang dalam hati, sajuak di dalam kiro-kiro". "Mak Sati ! Patatah patitih sampai si siko, karano ilimu ambo dangka tantang itu, indak tantu apo nan ka disabuik, kalu lidah dibueknyo. Oleh sabab karano itu, jo kecek biaso ambo lanjuikkan, baa tu mak Sati." Tasarah ka Indomo. Nan paralu nan diama pacah, nan dimukasuik sampai "Ado duo masalah nan kadisampaikan ka Mak Sati." 1. Baa mustinyo reaksi urang awak di rantau mananggapi anggota dewan Sumbar rapun divonis hakim. 2. Baa pulo tanggapan urang awak tantang fatwa kiyai nan malarang mamiliah padusi jadi imam. "Cukuik duo !, tantang presiden tentara baa?". Mak Sati manantang. "Nan itu alah tajawaek dek kami. Itu kan jaleh, alah basuluah matoari, ado sijarahnyo nan ka dikana. Tapi sungguahpun baitu, paralu juo Mak Sati singguang, sakurang-kurangnyo jadi bahan parbandiangan di kami." "Jadilah!. Tantang anggota dewan Sumbar, wajar inyo kanai vonis." Karano ,"tangan mancancang bahu mamikua". Urang Sumbar,tampek asanya Minangkabau lah lupo jo patatah-patitih urang tuo-tuo. Mestinyo anggota dewan harus tahu,: 1. Sawah ba pimatang, ladang babintalak 2. Tahu di ribuik ka mandingin, 3. Tahu di ombak ka maampeh 4. Nak tinggi naiakkan budi 5. Nak elok tahan napasu 6. Nak kuek paham dikunci 7. Budi jan sampai tajua. Kaduo, tantang padusi jadi imam. Di Minangkabau padusi buliah jadi imam kalau makmumnyo padusi pulo. Urang laki-laki indak buliah diatur padusi. Laki-laki takuik di bini, hino di Minangkabau. Di Minang indak ado padusi jadi pangulu. Rasonyo indak pernah awak mandanga gala Datuak Maimunah. Tantang fatwa kiayi di Jawa tu aniang-aniang se lah awak. Mestinyo awak nan mangecek. Kini lah ado urang nan mamikua. Baban nan barek tu, awak tingga maangguak-angguak sajo lai. Tantang masalah nan lah tajawek di majilis angku-angku tadi tu, ambo cuma manyampaikan pribaso urang Sunsang (One of fisherman's village in South Sumatra) Kalu bumbung bekas bekasem, dicuci bak mano bae masih mambu tu la. Guci bekas pamaram lauak busuak dicuci jo apo sajo baunnyo indak kailang. Kalau pribaso urang awak nan ampia samo aratinyo jo itu, KACIAK TARANJO-ANJO,GADANG TABAO-BAO, LAH TUO JADI KALAKUAN. Karajo kok lah jadi parangai sarik ditinggakan. Jikok katiko mudo inyo ganaeh, lah tuo biasonyo batambah ganaeh. Kok katiko mudo inyo suko mancilok, lah tuo tatap pancilok, malah bisa jadi parampok asa ado kasempatan . Manuang inokkanlah di awak, nan pantiang jan bak papatah urang awak: "CAKAK ABIH SILEK TAKANA, KOK BARINGEK SABALUN KANAI, KOK BARIMAEK SABALUN ABIH." Ambo tambahi ciek laaai, yaitu tantang urang sumando. Di Minangkabau, urang sumando , ditinggikan sarantiang, didahulukan salangkah. Nan paralu awak pandai manilai urang sumando tu.. Ado kreteria URANG SUMANDO. Partamo, urang sumando lapiak buruak. Kaduo, urang sumando langau ijau, Katigo urang sumando kutu dapua. Kaampek, urang sumando kacang miang, dan nan Kalimo urang SUMANDO INYIAK MAMAK. Nan kalimo tu cuma nan elok. Inyo, kok kusuik nan ka manyalasai, karuah nan ka mampajaniah. Ibaraek kayu gadang di tangah padang. Ureknyo tampaek rang baselo, batangnyo tampaek rang basanda, dahannyo tampaek bagantuang, daunnyo tampaek balinduang di ari paneh, bataduah diari hujan. Indomo, sakitu sajo dari ambo". "Tarimo kasi Mak Sati. Kok lai tambah untuak kami batigo." Khusus untuak angku nan batigo indak ado doh. Kok untuak sagalo urang Minang iyo lai. Dangakan elok-elok. - Gapuak jan mambauang lamak. - Cadiak jan mambauang kawan. - Kayo jan manjua nan bansaek - Usah sanang maliek urang susah - Jan susah maliek urang sanang. Mak Sati, kami pacik arek , diganggam taguah. Kok siang di patungkek, malam dipakalang. Sakali lai tarimo kasih , wasalamualaikum ww. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
