Apokah berita masuak Islam-nyo si Jacko iko luput dari perhatian media2 Amerika? Abih lalok wartawan2 Time, Newsweek, The Post, dan sagalo antu balau surek kaba Amerika tu? Manga pulo karajo Google, ndak tantu dinyo bahaso si Jacko ko alah mambaco duo kalimat syahadat?
Nan dapek dek ambo cuma barita tentang salah surang Uda si Jacko ko nan banamo Jermaine Jackson iyo masuak Islam.
Baa lah si Jacko tu katiko inyo alah masuak Islam. Tantu sumbayang inyo lai, limo wakatu sahari samalam. Itu nan wajib sajo baru, alun nan sunaik lai. Tantu paralu pulo inyo basunaik untuak mangukuahkan ka-Islamannyo. Bapuaso di bulan Ramadhan, menahan diri dari makan, minum, sarato sagalo hal nan mambatakan ibadah puaso. Tantu harus jago pulo si Jacko tu sabalun wakatu Imsyak tibo untuak makan parak siang.
Dek karano inyo alah jauah dari sekedar bisa dikatokan mampu, mangko tantu lakek pulolah kawajiban naiak haji ka Makah di dirinyo. Tapi sampai kini, alun tadanga lai si Jacko ko pai ka Baitullah menunaikan ibadah haji...
Mangkonyo ambo ingin batanyo, iyo lai sabana masuak Islam no ko?
Mangko bakeh Bundo nan mambao barito, mungkin bisa maagiah panjelasan ttg kabenaran kaba ko.
Karano ambo bukanlah si Jacko (as I said), dan bukan pulo urang nan kenal jo wanyo, indak sasuku atau sakampuang pulo, namun ambo cukuik suko jo suaronyo sarato lagu-lagunyo, baiak sasudah inyo masuak Islam ataupun sabalunnyo.
Bundo Kanduang kito tu alah pulo mampostingkan babarapo syair lagu (?) dari si Michael Jackson ko ka palanta kito ko.
Jikok ambo mamposting lagu "I'll be There" disiko, tantu indak relevan do. Namuah palaming pulo nan tibo beko. Apolai kalau ambo mamposting syair "Blood on the Dance Floor" nan mambuek awak angguak-angguak bakcando balam mau, sudah tu baagiah pulo minum pilkita.
Jadi nan ka ambo posting adolah lagu nan sabana sadiah nan didendang uni kito Elly Kasim nan jombang tu, sarato tatap rancak sampai kini tu. Kecek salah surang senior nan kenal jo uni kito tu, "Ambo abih ati bana mancaliak ka Uni Elly tu kini, sajak sasudah operasi iduang tu, batambah manih bana nyo kini!" Baitu kecek salah surang Uwan kito tu bakeh ambo.
Lagu kito ko bajudul "Kasiah Tak Sampai". Syairnyo sbb;
Kasiah Tak Sampai =================== Cipt. Zaenal Arifin
Maaalang baacintoo... Bulan jo bintang Kasiah digungguang dek mato ari Bia bacarai, nyao jo badan Putuih lah tali jantuang jo ati Cinto ka uda den bao mati
Kaaa... dalaaamm.. tanah... Maik bakubua Datang malaikaik yo nan batanyo Apo ka dayo Yo nan takana Kasiah ka uda nan indak sampai Yo nan takana, kasiah tak sampai
Cintoooooooooo.... den indaaakkk... Adooo duonyooo... oooo...ooooo
Cinto.... den hanyo... ka uda surang
Biaaa... lah mangamuak... Topan jo badai Cinto den indak ado duonyo Bia di dunia Kasiah tak sampai Yo di akhiraik.... Den nanti juo.. Uda den nanti.., dalam sarugo...
Cintooooo... den indak... adoo... duonyooooo.. ooo...oooo Cinto.... den hanyo... ka uda surang... =======================================
Baitu lah kiro-kiro lagu nan sabana sadiah nan dibaokan dek Uni kito tacinto tu.
Dek sabana sadiahnyo lagu tu, sampai dibaeh urang ambo wakatu malagukan lagu tu kutiko urang sadang baralek, sarupo nan alah ambo caritokan.
"Urang sadang basanang hati dek kasiah alah sampai, 'Kasiah Tak Sampai' nan angku lagukan!' Tolong tuka ka nan lain!" Baitu hariak si pangka ka ambo.
Tapi jawek tantu ado pulo dek ambo.
"Yth. Hadirin nan berbahagia. Ambo manyanyikan lagu 'Kasiah Tak Sampai' bukan mancaritokan kaduo anak daro jo marapulai nan sadang basandiang duo ko. Tapi lagu ko ambo baokan adolah mancaritokan nasib badan diri ambo surang..." Mangko abih madok pulo lah gadih-gadih ka ambo dinyo. Walaupun muluiknyo indak mangecek, tapi matonyo mangatokan bakeh ambo; "Iyo malang bana nasib uda... Jikok jo ambo uda sajak dahulu tantu ndak ka bak cando iko..." Baitu kiro-kiro keceknyo, dalam hati, nan tabaco dek ambo :)
Jikok dunsanak ado juo nan marando tagang sampai kini, padohal alah bakarajo di kantua, bantuak rancak jo gagah pulo sarupo bintang pilem India, langkok jo sisunguik nan manih tu, tapi alun ado juo nan namuah lai, mangko cubolah baraja babansi..!
Ambo yakin, jikok diambuih bansi tu salayok, abih manuruik nan gadih-gadih tu ka dunsanak lai.
Tapi sabalunnyo tantu bansi tu babao ka ambo dulu, untuak "diisi" saketek. Tapi ambo tantu indak namuah sumbarang agiah. Beko sasek pagunokan pulo.
Babaliak ka caito kito; supayo jan lagu si Jacko sajo nan kito bahas, mangko rancak juo kito mambahas lagu Uni Elly ko.
Nan menarik dari syair lagunyo adolah, baitu bana dalamnyo kasiah ka uda tersayang tu, sahinggo katiko malaikaik batanyo ka nan malagu di dalam kubua:
"Maa Raabbuka?"
Kunun lai tanyo malaikaik nan bajawek, tapi, kasiah ka uda nan takana....
Ondeh.., iyo sabana sadiah....
Cubo lah dapek dek ambo adiak nan bakcando itu... Ndak ka cando iko badan diri...
Marando tagang hiduik surang diri... Makan di warteg, lalok bakalumun kain saruang surang...
Tiok mangecek urang baturo pulo...
Iyo sabana dalam arati lagu "Kasiah Tak Sampai" nan dibaokan dek Uni Elly kito tu.
Urang awak tantu labiah mangarati dalamnyo arati lagu tu daripado arati lagu si Mikail Jekson tu, baiak sasudah masuak Islam bana inyo.
Jikok inyo alah batua2 pai ka Tanah suci manunaikan ibadah haji, tantu imbauan kito ka wanyo batuka pulo lai.
Indak namuah kito maimbaunyo "Jacko.., Jacko...!" sajo lai.
Tantu bahimbaukan jo "Haji Mika'il Jekson" lai. Mungkin jadi "Haji Muhammad Michael Jackson" pulo, karano banyak urang manambahkan namo Rasulullah di muko namonyo sasudah bapulang dari tanah suci. Tantu alah aleh dek kito kasadonyo namo Bapak Pembangunan kito lengkapnyo adolah "Haji Muhammad Soeharto" atau H.M. Soeharto sajo, sajak baliau pulang dari tanah suci (antah nan ka bara yo- ambo ndak tau).
Karano H.M. Jacko (jikok bana) tantu alah saudara kito pulo sesama muslim. Mangko lagu-lagunyo tantu alah dapek pulo dipalajari dek anak nagari. Bundo Kanduang nan mambari kaba tu alah mamposting lagu H.M. Michael Jackson tu ka palanta awak ko.
Sasudah baiduikkan tep mamuta lagu2 uni Elly, "Kasiah Tak Sampai", "Kabau Padati", "Ubekkan Denai", "Sayang Tak Sudah", "Bugih Lamo", "Oto Sinar Riau", "Langkisau", "Si Nona", "Baju Kuruang", dan lain lain, tantu alah patuik pulo kito mandangakan lagu dunsanak kito nan lain tu, nan agak babeda garitiaknyo, yaitu lagu dari dunsanak kito H.M. Michael Jackson tadi tu.
Ambo alah basiap-siap andak maantakkan kaki mandangakan lagu "Billie Jean", "Thriller", atau "Beat It" dari dunsanak kito tu. Suaro gitar di lagu "Beat It" namuah pulo mambuek ambo gilo. Iyobana garang. Lai ambo cubo-cubo main jo gitar Ibanez baru ambo tu (one of the RG series), ondeh, sabana hengkau rasonyo. Raso ka dilakek kacomato hitam tu, bapakai sarawa cabiak, manggaridi hati nak naiak ka pentas.
Salah surang kawan ambo, si Saul Hudson lai disuruah pulo main gitar di album HM Jacko nan alun lamo bana lai, untuak maisi intro di lagu "Black or White" di album "Dangerous" tu. Si Saul ko labiah sanang dipanggia si "Slash" sajo (agak kaongeh-ongehan pulo saketek, mangko maleh Axl jo wanyo. Tapi suaro Les Paul-nyo, anyo Jimi Hendrix mandiang nan mengatasi).
Dek kito alah samo-samo muslim, mudah2an namuah pulo Yth. HM Jacko ko maimbau ambo untuak sakedar maisi suaro gitar di albumnyo nan baru (suaro gitar bacampak-an se jadih juolah). Daripado inyo maajak si Slash nan kapia tu, apolai Steve Porcaro tu.
Tantu batambah barek tugeh pangawal HM Jacko tu. Labiah barek daripado SS tantu. SS indak ka mahadok-i gadih-gadih nan ka bagayuik ka Mak Buih tu do, nan kainnyo banyak sayuik tu.
Tantu haram hukumnyo HM Jacko dipagayuikkan gadih-gadih nan bukan sajo kapia sarato indak muhrimnyo, tapi kainnyo pun indak salasai jaiknyo do! Banyak nan sayuik kainnyo, sampik pulo lai. Jan ka disuruah lai, ditagahkan pun tatap se inyo mangareh utk manempekan dadonyo sarato bagayuik ka HM Jacko tu...
Nan ka kito nanti-nanti tantu konser Dunsanak kito HM Jacko tu nan barikuiknyo. Dek wanyo alah Islam, tantu kasado urang nan terlibat dalam konsernyo tu; mulai dari penari latar, backing vocals, crews, nan biasonyo tu indak ado nan indak babalah bajunyo di dado, nan di konser barikuiknyo tantu kasadonyo alah ba-busana muslim lai. Backing vocal jo penari latar nan rancak2 tu tantu ba jilbab lai kasadonyo. Pabilo yo, kito dapek mancaliak konser HM Jacko nan barikuiknyo. Jikok indak bana mancaliak langsuang, di tipi baiak manah!
Hati-hati sanak, jan sampai lupo pulo jo gitarisnyo nan kuliknyo agak kalek, jo gitar Ibanez seri RG warna merah (Red Sunburst), jo aksi panggungnyo nan sangaik aktraktif tu. Jan disangko itu si Slash nan alah bakarek abuak. Si Slash inyo pakai Gibson Les Paul nan babuang pick-guardnyo biasonyo.
Jan sampai salah, itu adolah ambo!
Wassalam, Wady Afriadi (30 tahun, 6 Bulan, 20 hari)
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________

