Karano kato "balas" ko ambo dapek dari kawan arek ambo sajak tamaik SMA sampai kini, banamo Adi Tanjuang.
Tadi Adi Tanjuang nan mangawani ambo jo gandang katiko babansi di RRI Bogor jo Mak Bandaro Labiah tu alah barangkek pulang kampuang ka Muko Jalan, subarang Maninjau jo oto Gumarang.
Si Adi ko nan maagiah tau bakeh ambo, bahaso tarafo nan ado dalam lampu neon (indak nan palastik do, tapi nan basarang aluminium) itu banamo "balas".
Keceknyo si Adi ko tau jo elektronik, tantu ambo picayo pulo. Ambo baco tulisannyo di situ, iyo "ballast".
Tapi sahari katiko ambo manulih tantang balaspemi nan sasek sabuik jadi balaslampu itu, ambo sadang kanai paulahan pulo dek pakaro balas tu. Ambo katiko pindah ka rumah kontrakan di Paruang ko sajak diusia dek (mantan) urang rumah tu, mambali babarapo buah lampu neon di Pasa Paruang.
Baa kecek urang punyo toko listrik tu, "Nio nan ma, nan Philip atau nan biaso?"
Karano ambo nio nan tahan saketek, tantu ambo jawek, "Philip sajo lah." Dek karano haragonyo indak jauah babedo.
Ambo caliak harago balas Philip-nyo sajo di Carrefour, jauah labiah maha daripado nan ambo bali tu.
Baru bara minggu ambo pakai, sasudah mamanjek-manjek pulo ambo sakian kali untuak mamasang-nyo surang, lampu neon tu alah bacilakuik. Baulah-ulah iduiknyo. Acok bak cando lampu disko inyo surang, kijok-kijok sarupo diskotik.
Sasudah mamanjek pulo ambo baliak untuak mambukak neon tu baliak, ambo paratikan isi lampu neon tu.
Agak ragu ambo. Ambo punyo ciek balas nan alun bapakai nan babali di Carrefour dengan harago agak maha, agak balain tulisan Philip-nyo nampak dek ambo.
Sampai-lah ka kasimpulan, "K***ra, balas Philip palasu kironyo." Sabab bola lampu neon-nyo nampaknyo indak ado bamasalah.
Tapaso lah ambo manjapuik balas Philip nan dijua di Carrefour Lebak Bulus tu, ambo tuka. Iyo balain nampaknyo.
Balas palasu nan ambo bali di Pasa Paruang tu mamakak bunyinyo, tiok diiduikkan inyo basuaro maranguang bakcando ado kumbang di dalamnyo.
Tapi balas Philip nan babali di Carrefour tu, indak ado maranguang cando itu do. Tantu asli mungkin, dima lo Carrefour tu namuah marusak namonyo jo manjua balas Philip Palasu.
Jaran ambo dinyo mambali balas-balas palasu tu. Haragonyo iyo labiah murah, tapi awak ta-aniayo dibueknyo.
Dek karano kanai ulahan tu lah, sampai sasek sabuik ambo. Ka manyabuik "balaspemi" tasabuik "balaslampu".
Baitu lah ambo kanai ulah balaspalasu.
Wassalam, Wady
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
