INFO PADEK Oleh: Wady Afriadi
Berita tantang kadatangan Presiden Suharto ka wilayah 50 Kota indak baitu manarik perhatian urang kampuang ambo, nan banamo Desa Tiakar, Kecamatan Guguk, Kabupaten 50 Kota, daerah Payokumbuah mudiak. Kutiko tu namo-namo kampuang, desa, sarato kecamatan di Ranah Minang alah disasuaikan jo ejaan bahaso Indonesia, dek karano itu namo resmi dari kampuang ambo adolah Desa Tiakar, Kecamatan Guguk. Sadangkan dalam ejaannyo, namo desa ambo ko disabuik "Tiaka" dan Guguk dibaco urang "Guguak". Daerah-daerah lain pun ambo caliak sarupo itu pulo. Ado nan labiah manarik bagi urang kampuang daripado mananti-nanti baruak gadang orde baru nan kadatang tu, yaitu mautak-atiak angko, nan banamo undian Porkas, nan kudian batuka namo jo SDSB, atau disabuik BT sajo, nan sadang angek2nyo. Tuo mudo, kayo bansaik, kasadonyo sibuk dek maetong2 angko apo ko nan ka kalua. Angko apo nan ka kalua tu indak amuah batakok-takok uwok sajo lai. Harus bacari jalannyo, dari ma datangnyo, baa kok sampai kalua. Kasado angko nan kalua langsuang dicataik urang, dicari-cari baa kaitannyo jo angko nan ka kalua. Salain daripado tu, mancari angko indak amuah mangandalkan pikiran manusia nan tabateh sajo nampaknyo. Harus pulo mamintak patunjuak ka makhluk nan indak tampak, nan mungkin tau kiro-kiro apo nan ka kalua. Mimpi-mimpi nan tajadi wakatu lalok, dicubo pulo manarjemahkan, apo aratinyo berdasarkan buku "Primbon Takwil Mimpi.". Dari berbagai metode ado tu, mangko mulailah timbua rumus-rumus jo katantuan nan bisa diikuti untuak mancari angko ka kalua tu. Angko nan kamungkinan gadang ka kalua tu baistilahkan "info padek". Jikok bamimpi batamu babi, angkonyo anam. Jikok ula, tigo. Harimau, salapan. Dan lain-lainnyo. Pokoknyo kasado makhluk binatang tu ado aratinyo. Indak itu sajo, plat nomor oto atau honda nan balantak atau basingguangan di hadok-an awak harus pulo dikana atau dicataik capek, sia tau itu angko nan ka kalua. Sabab acok bana kajadian, angko nan kalua tu BA kendaraan nan balantak kapatang. Dek ingin sato kayo pulo, ambo sato pulo mamasang BT tu, walau acok duo angko sajo. Nan bapasang indak kupon resmi SDSB (Sumbangan Dana Sosial Berhadiah) tu do, tapi bon putiah sajo. Bon putiah ko adolah versi nan indak resminyo, tapi angkonyo nan kalua mangikuti kaluaran SDSB nan resmi tu. Untuak pai mamasang, ambo pai bakureta angin ka Danguang-Danguang, sabalun angko kalua di hari Kamih. Alah sakian kali pasang mangandalkan takwil mimpi manuruik buku primbon nan dipinjamkan dek Mak Mas (Masruddin Dt. Godang namo lengkapnyo), nomor nan kalua alun juo sasuai jo nan ambo pasang. Jankan ka samo, bakaik sajo indak. Jauah panggang dari api taruih. Dipasang limo sambilan, nan kalua ampek duo, indak basewai-sewai! Kecek kawan ambo nan banamo si Jan, cubo baco Koran Sentana; disitu banyak info padek, katonyo. Inyo alah babarapo kali mandapek duo angko, bahkan pernah sampai ampek angko dek mancaliak info padek di Koran Sentana tu, keceknyo pulo. Ambo danga dari kawan-kawan nan lain iyo baitu. Si Jan kawan ambo ko adolah anak dari Siman nan baparak lado. Inyo sikola di STM Kosgoro Payokumbuah, Jurusan Bangunan. Katiko tu ambo alah kalas satu pulo di SMA Limbanang, nan wakatu tu banamo SMA 2 Payakumbuh. Si Jan ko urangnyo agak pamalu jo cewek, banyak sagan. Manggaya lai segeh, sikek indak asak-asak dari sakunyo, tapi jo cewek takuik. Tiok kapai sikola pakaian rapi bana, baju saragam indak baju nan diagiah di sikola nan dipakainyo, tapi baju katun bamerek Rocomoro, nan kudian bajaikkan lambang Osis. Dompetnyo stenbai taruih di saku balakang sarawa nan bajaik model Levis. Taba nampaknyo, tapi ambo indak tau isinyo. Ambo acok panaran juo, ingin tau isi dompetnyo, apokah si Jan ko mandapek BT indak mangecek2 ka ambo? Dek panasaran taruih tu, mangko suatu wakatu, wakatu si Jan tu indak tau ambo pareso dompetnyo, nan bawarna coklat tuo tu. Wakatu ambo pacik iyo barek bana rasonyo. Sabalah lua dompetnyo ado stiker gambar duo balah jari tangan nan tabukak, sadangkan di tangah-tangahnyo ado tampek untuak malatakkan poto, talinduang di baliak plastik stiker nan transparan untuak tampek poto tu. Paspoto si Jan tu tapampang ditangah tangan nan tabukak tu, sarupo urang bado'a, lalu di bawahnyo ado tulisan "Hidupku di Tangan Tuhan". Agak tasirengeng ambo, sarupo iko tangan Tuana- Tuhan Allah SWT? Ambo bukak dompetnyo, pitihnyo indak bara kironyo do. Paliang gadang karateh limo ribu nyo, sarato babarapo pitih doriang (receh) logam. Tapi nan mambuek dompet tu jadi taba, karano dipanuhi jo karateh koran. Iko nan mambuek taba kironyo, pikia ambo. Talambuang si Jan katiko inyo babaliak, nampak dinyo ambo sadang mausai-usai dompetnyo. "Baa kok karapiak-i dompet den tu?!" sagahnyo. "Ambo ingin tau sajo, den sangko waang dapek BT indak mangecek-ngecek kaden, dek taba bana dompet nampak di den." Baitu jawek ambo sambia maagiahkan dompet tu baliak ka inyo jo galak sengeang. "Dek itu dek den suruah, baco Koran Sentana!" Jawek si jan tu yakin. Kecek si Jan sasudah ambo tanyokan untuak apo karateh Koran usang tu, hanyo sbg panaba dompet supayo jan kempuih bana saku balakang, keceknyo. O, baru mangarati ambo. Supayo tampak seksi panggua balakangnyo, dompet agak ditabakan saketek, di saku nan sabalah lai, balatakkan saputangan handuak ketek nan agak taba pulo, jadi saimbang suok kida. Sugiro sasudah tu, ambo langsuang mancari Koran Sentana nan dikecekkan si Jan tu. Ruponyo info padek nan dimungkasuik dek si Jan tu barupo pertanyaan-partanyaan sarupo pertanyaan di TTS. Salain pertanyaan-pertanyaan nan tasurek tu, di sabalah kida ado pulo patunjuak patunjuak angko. Patunjuaknyo itu agak mamaniangkan kapalo, karano gambarnyo tu kasadonyo tasusun dari angko-angko nan manggaridi. Bantuak gambar tu manyarupoi kapalo urang, tapi tasusun dari angko-angko sajo. Talingonyo ango salapan, bibianyo ango tigo balimpik, iduangnyo angko tujuah tabaliak, sasudah tu di abuaknyo bagaridi angko angko antah bara banyaknyo. Nan ma nan kadiambiak untuak ka dipasang? Ambo baco pertanyaannyo, sasudah tu ambo caliak jawaban kuis tu untuak minggu nan lalu. Iyo sarupo jo angko nan kalua. Angko tu diambiak dari huruf partamo tiok jawaban. Misalnyo, pertanyaannyo: "Apakah yang ditakuti orang?" lalu jawabannyo: "Api", mangko angkonyo adolah satu, karano huruf A dari "Api" berarti satu. B bararti duo, C bararti, tigo, D bararti ampek, sampai angko sambilan. Sadangkan huruf "J" babaliak ka nol baliak, huruf sudah itu baulang pulo angkonyo baliak. Dek raso-raso ka lai pulo, mangko mulailah ambo untuak siap-siap mamasang. Karano ambo hanyo ka mamasang duo angko, mangko ambo sigi duo pertanyaan terakhir sajo. Ambo caliak pertanyaan nan partamo: "Yang sering dikenakan di tangan?". Sasudah tu partanyaan kaduo; "Sering keluar pada waktu malam?"Iyo agak karuik kaniang ambo bapikia. Dicubo pulo mancaliak ka gambar nan tabuek dari angko tu, batambah paniang pulo ambo dinyo. Pertanyaan partamo, nan acok dipakai di tangan, adolah cincin, awalnyo C, berarti tigo, atau galang, g berarti tujuah. Jadihlah, pasang kaduonyo sajo, bia nak 'donokang" coki tu, baitu pikia ambo dek takana ka kartu koa. Sadangkan partanyaan kaduo, nan acok kalua diwaktu malam, adolah jangkrik, karawai, lingkuak (burung hantu), anai-anai atau laron, ma nan iyo? Agak barek ati ambo ka jangkrik atau kaririak tu. Huruf J berarti angko 0, jadi kamungkinan angko nan ka kalua adolah 30, atau 70. Baitu pikia ambo. Agak mantap taraso ati ambo, mangko langsuang ambo kayuah kureta angin ka Danguang-Danguang ka tampek urang mamasang BT tu. "Pasang duo angko Mak Uwa!" Baitu kecek ambo langsuang ka Mak Uwa, agen BT bon putiah tu. "Duo buah, ciek 30, ciek 70, masiang masiang duoribu rupiah!" Sambuang ambo mantap. Jikok salahsatu angko tu mandapek, mangko jo mamasang duoribu rupiah tu duo angko, ambo bisa mandapek 120 ribu rupiah. Alah cukuik untuak pambali saikua kambiang. Bialah malayang pitih balanjo saminggu ko, pikia ambo, asa awak lai ka mandapek. Wakatu tu ari baru ari Salasa, sadangkan angko kalua hari Kamih, jadi masih lamo lai. Sambia manunggu duo ari tu, ambo simpan sajo bonnyo dengan mantap, jo parasaan arok-arok cameh. Dalam maso manunggu angko nan ka kalua tu, tadanga kaba dek ambo bahaso ado urang gilo nan bakaliaran di kampuang alah bara hari ko. Gilonyo lai indak gilo bana do, cuma kanai saketek. Istilahnyo, "Kanai tali tigo-nyo saketek." Keceknyo indak jaleh ujuang pangkanyo. Karajonyo bajalan ilia mudiak, pai kalapau urang tapi ndak jaleh sajo nan ditanyokannyo. Daripado manggaduah ka urang kampuang, akhianyo salah surang maanta-kan wanyo baliak kalua dari nagari Tiaka. Sabalun inyo disuruah pai, tantu lai banyak pulo nan batanyo ka wanyo, "Bara angko nan ka kalua?". Sarato langsuang mancataiknyo di karateh. Dek karano ambo alah maraso mandapek inpo nan sabana padek, mangko bara angko nan dikecekkan urang gilo tu indak ambo pasang lai. Angko SDSB atau Porkas nan kalua tu, diumumkan di radio RRI tiok hari malam Kamih patang Rabaa. Pangumuman disiarkan dek RRI Nasional sacaro langsuang. Dek karano ambo sato mamasang, alah rundo pulo ambo di bok ambo mandangakan angko ka kalua. "Bok" ko istilah anak mudo Tiaka wakatu tu, yaitu tampek rumah tingga nan dijadikan tampek lalok dek nan mudo-mudo. Ndak ado do anak laki-laki nan lalok di rumah jo urang tuonyo, kacuali anak manjo, nan ka manjadi cimeeh dek kasado urang kampuang. Saisuak bana tantu surau jo musajik tampek lalok nan bujang-bujang. Tapi sajak surau jo musajik tu alah bakunci dek pangurus, mangko anak2 mudo tapaso mancari rumah tingga tampek lalok basamo-samo. Bok ambo tu adolah rumah kayu kami sabalun mambuek rumah batu nan kini ko. Sajak kami pindah katiko ambo baumua limo taun, alah tingga se rumah kayu kami nan lamo tu. Lai sempat uwo (nenek) ambo tingga disinan sabalun maningga. Sasudah kosong rumah tu bataun-taun, dapek pangana dek ambo untuak mambaok lah kawan-kawan lalok disinan basamo-samo. Badabok-dabok jantuang ambo mandanga bola nan kalua di tampek undian tu. Ambo mandanga siaran RRI tu jo radio ketek nan dulu acok ambo baok untuak kabalo jawi ka tangah sawah. Undian balangsuangkan tapek jam duobaleh malam, mamakai bola nan di puta. Baitu tadanga dek ambo. Kabatulan ambo surang sajo malam tu, kawan-kawan indak abih tibo. Sasudah tagak talingo ambo mandanga angko nan kalua tu, bukannya arok ati ambo dek mandapek, malah pencong galak ambo. Sabab duo angko nan kalua ujuangnyo 72! Indak basewai-sewai jo angko nan ambo pasang! Iyo sabana panduto Koran sentana tu! Pikia ambo. Keceknyo angko nan ka kalua 30, tapi malah 72 nan kalua! Sampai ndak talalok ambo sampai pagi dinyo. Jo sakik hati, ambo langsuang mambali Koran sentana tu baliak barirusaknyo. Indak ko samo angko BT nan kalua jo jawaban pertanyaan di Koran sentana tu? Untuak apo awak mancari inpo juo ka koran baruak tu? Baitu pangana ambo jo ati mangka. Baitu ambo bali di pasa danguang2, langsuang ambo bukak halaman kaduo Koran Sentana tu. Ndak ambo caliak bagai gambar-gambar urang padusi rancak- tapi kainnyo sayuik- nan ado di halaman muko. Pertanyaannyo nan kapatang adolah: -Apakah yang sering keluar di waktu malam? Jawabannya, GELAP. Awalnyo G, berarti ngkonyo= 7 . -Yang sering dikenakan di tangan? Jawabannya: BORGOL. Pangkanyo B, berarti angkonyo= 2. Batua kironyo, 72 angkonyo! Ondeh mandeh, baa kok ndak takana dek ambo jawaban nan samurah tu? A iyo bana tarangah ambo dinyo. Mangko basumangaiklah ambo baliak mancari ipo di angko2 nan tasangkuik kusuik di Koran tu. Sia tau, kok indak kini, mungkin minggu barisuak lai rasaki awak. Kalau dipikia-pikia pulo, kan lai ado bon nan ambo pasang angko 70, sadangkan nan kalua 72, berarti: Cuma beda ciek angko. Alah ampia ambo ka mandapek subananyo! Minggu barisuak pasti ndak ka maleset lai! *** Katiko ambo sadang lalok-lalok ayam di tangah rumah, siang ari alah dakek ka sanjo, mungkin pukua tigo wakatu tu. Tadanga dek ambo suaro Honda Cup 70 gaek ambo nan bawarna sirah tu. Langsuang tagak talingo ambo. Urang gaek ambo jikok pulang dari Danguang-Danguang, pasti mambao! Apolai tadanga dek ambo bahaso baliau pai pulo upacara manyambuik Presiden Suharto tu di Tanjuang Jati, dakek Limbanang. Jikok indak sate Malin Danguang-Danguang, pasti baliau mambali gulai cancang di kadai nasi "Bahagia" nan sabana hengkau raso cancangnyo tu. "Lai Apa basuo jo Presiden tu tadi Pa? Lai sempat basalam ndak?" Tanyo ambo sasudah baliau manungkek standar onda kap 70 tu. (Ambo mamanggia urang gaek ambo jo panggilan "Apa" jo "Ibu".). "Dima pulo awak ka bisa mandokek ka inyo, urang godang sajo nan bisa mandokek ka tenda tompek inyo mangecek sarato batanyo jawab tu (Kalompencapir). Hanyo Pal Camat, atau Pak PS (Penilik Sekolah) sarato pejabat dari Kantua Bupati sajo nan duduak dokek inyo. Nan lain coliak-coliak jauah sajo lah. Antah bara-bara pangawal presiden nan manjago di sakuliliangnyo, matonyo sajo bak cando ka mamakan urang, dima pulo ka talok dek awak mandokek." Jawek baliau. "Lai takona dek Af urang gilo nan dulu bakaliaran di kampuang awak ko? Tadi inyo ado disinan." Tantu heran ambo, manga pulo urang gilo ko disinan? Indak diusia dek pangawal paresiden wanyo dari sinan? Malu lah awak beko jikok ado urang gilo Pikumbuah nan dicoliak paresiden. "Manga pulo urang gilo tu disitu?" tanyo ambo. "Inyo babaju safari tadi. Sato mangawal di barisan pengawal presiden tu. Indak ado nampak tando-tando gilonyo lai. Intel kironyo tu nan masuak ka kampuang awak manyamar jadi urang gilo. Ruponyo inyo kamari manyalidiki jikok ado nan ka mambahayokan ka presiden Suharto tu." "Ha?!?" Tangango se muncuang ambo mandonga informasi tu. *** Paruang, basudahkan hari Minggu, 24 Oktober 2004 Catatan: Kini, alah marak pulo mamasang BT ko di Pikumbuah baliak. BT nan bapasang tu BT liar, angko nan kalua samakin indak bisa diprediksi. Kalamak di bandar-nyo sajo. Nampaknyo 'seni' mancari info padek tu alah iduik baliak di Pikumbuah, kini. (Wady Afriadi) Wady Afriadi 0815-970-1611 http://wady.or.id ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
