Waalaikum salam, wr, wb.
Sato lo ciek bapantun atau mamang atau apolah namonyo, dek judulnyo alah
diubah dek rang lalu, pantunnyo bajudul "Hiduk bakarukunan" sbb :
Elok tapian di nan mudo
Elok kampuang di nan tuo
Elok nagari dek panghulu
Elok musajik dek tuanku
Elok rumah dek bundo kanduang
Nan tuo dipamulie
Nan ketek dikasihani
Samo gadang lawan bakawan
Ampek macam limbago urang badunsak
Jikok jauah cinto-mancinto
Jikok hampie jalang-manjalang
Kok kakurangan tukuak-manukuak'i
Kok sampik lapang-malapangi
Mandapek samo balabo
Kahilangan samo barugi
Sakik samo disilau
Mati samo dijanguak
Nan rusuah samo dibujuak
Dikaba baiak baimbauan
Dikaba buruak bahambauan
Sagitu se pantun siang ko untuak paubek hati nan rusuah, dek kito baru
dapek musibah kapa tabang Lion Air. Semoga Pak Prof Khaidir dan keluarga
capek sembuh seperti sedia kala.
Wassalam,
HMDMB (47 +)
> Assalamu'alaykum Wr.Wb.
>
> Ronald P Putra sarato sidang RN
>
> dek taimbau pulo sakatek, ambo cubo pulo manjawek, untuang kok lai
> kapaguno.
> tapi sabalunno, ambo cubo manyampaikan baliak, satantangan Diskusi
> (apolah namono ...) topik sabalunko, kok diambo bak pantun kapatang
> juo, ""basilang kayu ditungku, disinan api mangko ka hiduk", tingga
> diawak maambiak nan elok, maelok-i sado nan salah, nan paralu adolah
> caro manyampaikanno.
> "iyokan nan diurang, lalukan nan diawak " tapi malalukan nan diawak
> tantu jo dalil pulo. indak managakkan banang nan basah.
>
> babaliak rundiangan dari Ronald P Putra, satantangan pantun, ambo
> cubo mauleh.
> Mamangan nan disampaikan dek Ronald P Putra, iyo alah pado tampaikno,
> tapi ado pulo saketek nan takana-takana, yaitu adia (adil).
>
> Kadang-kadang adia ko indak pulo harus "manimbang samo barek, kok
> maukua samo panjang, mambagi samo banyak doh" tapi baginjaikan juo
> saketek banyakno. Saumpamo maagiah balanjo ka anak-anak, atau THR
> untuak kamanakan, mako nan ketek rasono cukuk Rp.1000, maklum anno
> baru sikola SD, kalau alah SLTA tantu indak cukuk Rp. 1000, tapi
> diagiah agak Rp. 5000, baitu pulo nan alah kuliah (atau alah remaja)
> tantu diagiah Rp. 10.000. baitulah salah satu ujuik adia.
>
> Balam jo kekek bari makan
> barilah makan kaduono
> panjang jo singkek dicubo mampaulehkan
> indak sampai ka ba a juo.
>
> Wassalamu'alaykum Wr.Wb.
>
> Bandaro Labiah
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
