Assalamu'alaikum wr.wb.,
Di dalam surah At Taghabun (Surah 64): ayat 11 Allah SWT bafirman;
Setiap musibah yang menimpa adalah dengan izin Allah (sesuai dengan
sunatullah). Barangsiapa yang beriman kepada Allah, niscaya Dia akan menunjuki
hatinya. Dan Allah Maha Mengetahui segala sesuatu.
Pada bagian lain, di surah Al Baqarah di penghujung ayat 155 dan ayat 156 Allah
bafirman;
Dan beri kabar gembiralah orang-orang yang sabar (tabah).
(Yaitu) orang-orang yang manakala ditimpa musibah mereka berkata, ' kami ini
datang dari Allah dan kepadaNya kami akan kembali.
Prihatin jo ibo awak mandanga kaba tantang bancana nan manimpo
dunsanak-dunsanak awak. Mulo-mulo nan di Nabire, sudah itu nan labiah dahsyat
di Aceh. Mareka manjadi korban musibah alam barupo gampo bumi. Kito doakan
kapado Allah, mudah-mudahan mareka nan takorban mandapek ampunan dari Allah
SWT, nan sakik capek cegak baliak, nan kailangan diganti Allah jo nan labiah
elok, nan kamalangan dek ditingga mati karib karabaik semoga diagiah Allah SWT
kasabaran.
Gampo bumi adolah pristiwa sunatullah. Bumi nan awak pijak-anko, di pusek
bumino barisi jo massa cair, batemperatur sangaik tinggi, mampu manakan jo
kakuatan sangaik tinggi pulo. Dan Allah tatapkan bagian dari bumiko tampek
cairan magma dari paruik bumi tu sawaktu-waktu mangalia kalua. Itulah nan awak
caliak sabagai latusan gunuang barapi. Namun massa tadi, nan salalu
manggalagak-galagak tadi, acok kali manakan kalua lalu 'mamakan' bagian labiah
lua dari 'kulik' bumi nan labiah padek, nan bisa taban, patah lalu jatuah
kabawah. Dek pangaruah takanan dari dalam taditu, (dalam skala bumi nan luasko)
mako bagian padek dari bumi, nan saolah-olah sarupo lempeang taapuang-apuang
diateh masa caiatu, bageser kaarah-arah tatantu, dan acok kali balago jo
lempeangan lain. Ditatapkan Allah Ta'ala tampek nan rawan di bagian-bagian
bumiko, tampek lempeangan-lempeangan kulik bumi tu balago, manunjam masuak
baliak kadalam bumi, mampangaruhi kasaimbangan bagian bumi ditampek 'ano'
balago tu.
Sapanjang pulau Sumatra di bagian baraik, bahkan sajak dari Burma di utara,
manaruih kasalatan bakelok kabagian salatan pulau Jawa adolah daerah nan
dipangaruhi dek balagono lempeang-lempeang raksasa kulik bumi tadi, nan
manjadian daerahko rawan taradok gampo. Akibaik batumbuak lempeang-lempeang
gadang tu, tagaduah kasaimbangan di 'kulik' bumi, bahkan ado nan patah, jatuah
taban kabawah. Ikolah nan tajadi kapatang di sabalah baraik Aceh. Katiko bagian
bumi patah atau taban-tu, sato turun pulolah muko aia lauiak. Iko fenomena nan
tampak di panduduak di tapi pantai. Namono aia, di dalam lauik basa, sasudah
itu tantu mancari kasatimbangan baru no baliak, babaliak muko lauik cako.
Ikolah nan disabuik jo galombang tsunami dalam bahaso Japang, nan mahondoh jo
kakuatan luar biaso maambiak kasatimbangan baru, jo volume aia maha raksasa
manyuik sado nan ado di sakitar tampek tajadi katidak saimbangan mulo-mulo.
Nagari awak tu sakali lai sangaik rawan taradok kajadian sarupo itu. Indak
hanyo dilauik sajo taban tu bisa tajadi. Bahkan ambo baco di dalam tafsir Al
Azhar Buya Hamka, di Danau Maninjau panah pulo tajadi taban sarupo itu di
caritoan Buya Hamka (ambo lupo di pambahasan juz bara). Mulo-mulo turun, susuik
aia danau, tapi sasudah itu babaliak naiak baliak mahondoh tapi danau jo
galombang pasang.
Mudah-mudahan Allah malindungi awak kasadono dari marobahayo katiko Allah
mampalakukan sunatullah diateh bumi Allahko. Amiin.
Wassalamu'alaikum wr.wb.,
Lembang Alam
---------------------------------
Do you Yahoo!?
Send holiday email and support a worthy cause. Do good.
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
