Assalamu'alaikum wr.wb. Manuruik ambo untuak maislamkan adat minang ko iyo mambaliakan fungsi jo tangguang jawab niniak mamak yang kini ko alah diambiak aliah dek ayah dalam satu keluarga. Kini bisa dicaliak bara persen bana niniak mamak di minang tu yang bisa jadi suri tauladan dan menjalankan fungsi "anak dipangku kamanakan dibimbiang". Yang ado kabanyakan kini ko "anak dipangku kamanakan dipalantiangkan". Baa lo kamanakan ka tau jo niniak mamaknyo, kalau niniak mamak ndak pernah mancaliak/manjolong kamanakannyo? Malah niniak mamak tahu punyo kamanakan kalau kamanakannyo ka nikah se...apolagi rang piaman, kalau kamanakan ka nikah baru banyak mangaku nan jadi niniak mamak, karana dapek mintak bagian lo dalam uang jamputan. Kalau ndak, niniak mamak pun ndak pernah mancogokan batang hiduangnyo ka rumah kamanakannyo do. Malah ado lo niniak mamak nan ikuik lo mahabihkan pusako tinggi yang harusnyo hanyo buliah dipakai manuruik adaik yang basandi syarak, syarak basandi kitabullah. Jadi jan salahkan banyak rang mudo, anak jo kamanakan yang maningkek parangai buruaknyo karano ndak ado yang kadijadikan teladan. Solusinyo manuruik ambo : 1. Baliakan fungsi niniak mamak dan caliakan contoh jo budi yang elok ka kamanakan "Karano elok bangso karano budi, budi rusak bangso binaso" 2. Aktifkan baliak fungsi surau, wajibkan bagi anak laki-laki nan alah baligh lalok di surau tiok malam jo diisi kegiatan nan baguno untuak mereka 3. Tanamkan raso jo pareso, tarutamo budaya malu ka anak-anak kito bia jaleh lo "manusia tahan kieh binatang tahan palu" 4. Rubah pola pendidikan anak jo kamanakan ka arah islami yang menganjurkan untuak manjadi enterpreneur bukan untuak jadi karyawan se. 5. Rubah pola pikia orang kampuang untuak ndak basalisiah dek karano harato pusako 6. Batehi waktu untuak manonton TV nan banyak marusak moral acaranyo.
wassalam Reza bujang piaman nan kecewa jo adaik piaman ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
