Assalamu'alaikum wr.wb., Manolah nyiak Sunguik sarato karapatan Palanta nan adang adok,
Namo Ophir untuak gunuang Pasaman itu kalau ambo indak salah danga katiko baraja ilimu bumi saisuak iyo diagiahan dek panaliti Jaruman nan sadang pai mancari-cari kok a nan kadapek diambiak dipasakitaran gunuang Pasaman tu. Diagiah baitu sajo namotu, sudah itu didalam laporan karajono disabuik-anlah gunung Ophir di koordinat sakian-sakian, sabalah kian Loeboek Sikaping ect.etc. Basuo di (salah surang urang pandai) awak laporan tu, mako sato pulolah awak manyabuik Ophir, muskipun indak populer sangaik. Kok ditanyoan ka urang di sabalik gunuang Pasaman tu namo gunuang tu yakin bana ambo indak ka banyak nan manyabuik namo Ophir doh. Ophir disiko iyo indak jaleh pulo dek ambo, antah dek kaisengan panaliti itu sajo, atau baliau bana nan banamo von Ophir, antahlah. tapi indak rasono ka basangkuik jo curito nabi Sulaiman nan manarimo ameh upeti tudoh. Sabab di Gunuang Ophir ko indak basuo ameh (paliang indak dalam jumlah nan amuah ditambang) doh. Nan nabi Sulaiman jo ratu Sheba bak kecek inyiak tu, di al Quran disabuikan namo baliau ratu Bilqis dari nagari Sabaak. Nabi Sulaiman mandapek laporan dari burung Hud-hud, nan bahaso disinan ado nagari nan diparentahi padusi, urang-urangno manyambah matoari, nagarino kayo. Mako bakirim sureklah nabi Sulaiman ka bakeh ratu Bilqis tu untuak maajak mamaluak agamo tauhid, manyambah kapado Allah nan esa. Disabuikan nan bahaso surek baliau tu diawali jo kalimaik 'bismillahirrahmaanirrahiim'. Basidanglah para pambasa di nagari ratu Bilqis, mintak sifaik ratu, aa nan ka rancak ka dibuek. Diutuihlah urang utusan maantaan cindro mato sabagai tawaran untuak badamai, sabab manuruik ratu Bilqis nan bijaksano tu, kalau awak baparang, adaik parang babunuah-bunuahan, mako anak nagari nan kamarasai. Tapi cindamatotu di tulak dek nabi Sulaiman nan jauah labiah kayo. Disuruah baliakkan barangtu jo ancaman baliau nan bahaso baliau ka manyarang nagari tu sarato mausia panduduakno. Ratu Bilqis nan manarimo kalah akhirno datang manamui nabi Sulaiman ka Palestina. Samantaro baliau masih diparjalanan, nabi Sulaiman mamarintahkan kapado tantara Jiin anak buah baliau untuak mamindahan singgasana ratu Bilqis dari nagari Sabaak ka Palestina. Jiin itu sanggup mangarajokanno dalam sakijok mato. Sangaiklah takajuik ratu Bilqis katiko mancaliak singgasanatu alah ado diistana nabi Sulaiman. Katiko baliau dipasilakan masuak ka istanatu, nan lantaino dari kaco, baliau manyangko itu aia, baliau angkek kain baliau sampai nampak batih baliau. Ratu Bilqis akhiano basarah diri kapado Allah jo parantaraan nabi Sulaiman, baliau mangecekkan,' Ya Tuhanku! Sesungguhnya aku menganiaya diriku sendiri dan aku berserah diri bersama Sulaiman kepada Allah rabb semesta alam'. Baitulah labiah kurang caritono nan bisa awak baco di surek an Naml (surek 27) ayat 20 sampai ayat 44. Sudah itu pakaro namo-namo gunuang, nyiak. Namoko iyo amuah saroman-saroman. Misalno di awak ado gunuang Marapi, di Tapanuli ado pulo Sorik Marapi, di Jawa Tangah ado pulo gunuang Marapi. Padohal gunuangno jaleh indak samo doh. Jadi manuruik dugaan ambo, gunuang Ledang nan di Johor tu mungkin indak kasamo jo gunuang Ledang di nagari puti Gondoriah tu agakno doh. Tapi antahlo lah. Itu pulo dulu katambahno nyiak. Wassalamu'alaikum wr.wb., Lembang Alam ----- Original Message ----- From: Sjamsir Sjarif <[EMAIL PROTECTED]> To: Lapau <[email protected]> Cc: Biaro <[EMAIL PROTECTED]>; Slamet Rino <[EMAIL PROTECTED]>; abrar Yusuf <[EMAIL PROTECTED]>; R. D. Lukman <[EMAIL PROTECTED]>; boes Roestam <[EMAIL PROTECTED]>; Hayatun Nismah Rumzy <[EMAIL PROTECTED]>; Dutamardin <[EMAIL PROTECTED]> Sent: Thursday, February 10, 2005 11:12 AM Subject: Re: [EMAIL PROTECTED] RE: gn pasaman - gn Ophir; GUNUNG LEDANG > Maa Rang Lapau nan Basamo, > > Kato OPHIR indak ado hubuangannyo jo Bahaso Bulando doh, baiak kapanjangan > maupun kapendekan. Kato "ophir" atau "ofir" dan kadang-kadang tadanga > "sofir" dengan sebutan nan agak sabunyi, asa katonyo adolah dari Bahaso > Hibru (Hebrew), bahaso Urang Yahaudi. Kato ko diambiak referensinyo dari > Kitab Taurat (Old Testament) nan mancaritokan suatu palabuahan suatu > daerah jauah di nagari antah barantah wakatu Nabi Sulaiman. > --------------------------------- Do you Yahoo!? Yahoo! Mail - Find what you need with new enhanced search. Learn more. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
