Walaiakum salam, wr, wb. Maa nyo dunsanak ambo Tan Bandaro Labiah di Bogor, kok bisiak alah kadangaran, kok himbau alah kalampauan. Satantangan kaba baiak bahimbauan dan kaba buruak bahambauan, dimano Sutan manyampaikan kaba buruak nan indak bisa ditulak dek manusio yaitu datangnyo malikaik maut nan manjalankan parintah Allah, mancabuik nyawo bani adam nan alah sampai janjiannyo yaitu : Mamak kito / Bapak kito / Dunsanak kito nan banamo Ir. Hasril Hamid Yasin Msc, Nagari asa Gurun, Batusangka, dalam umua 65 Th. di Bogor, pado hari Sinayan tanggal 21 Pebruari 2005, pukua 4 pagi. Nan almarhum dikalo wakatu hiduk, iyo pagawai nagari sabagai, Mantan Dekan/ Dosen Fakultas Perikanan IPB. Mako kami nan dari pihak dunsanak jauah, nan samo2 barasa dari Minangkabau, indak ka basabuik nagari atau koto, indak ka basabuik jantan jo batino, kok tolong nan dimintak ka kami, iyo indak katolongan, kok physik kami untuak hadir pado acara takziah menghibur ahli musibah, iyo indak akan balaku, dek karano kami bajauahan. Jadi jo doa sajo kami sampaikan semoga almarhum Mamak kito / Bapak kito / Dunsanak kito nan banamo Ir. Hasril Hamid Yasin Msc, ditarimo sagalo amalnyo, dilapangkan kuburannyo, dimasuakkan ka sarugo jannatun na'im. Amin. Sebab beliau alah punyo modal satu dari tigo modal bani adam apabilo alah maningga, yaitu : Ilmu nan bermanfaat nan digunokan oleh umat nan tingga, sebab beliau adolah seorang Guru/Dosen. Mudah2an modal nan duo lai yaitu : Amal jariah dan anak yang soleh nan mendoakan urang tuonyo ado pado beliau dan keluarga/anak cucu beliau. Dek Tan Bandaro Labiah mewakili sipangka ahli warih, tolonglah sampaikan ucapan belasungkawa kami ko, dan semoga nan ditinggakan tetap tabah, amin.....
Wassalam, HM Dt.MB . ----- Original Message ----- From: "Bandaro Labiah" <[EMAIL PROTECTED]> To: "Palanta RantauNet" <[email protected]> Sent: Thursday, February 24, 2005 11:28 AM Subject: [EMAIL PROTECTED] kaba buruak bahambauan > > Assalamu'alaykum wr.wb. > > sairiang balam jo barabah, > banyak nan ampek puluah ampek, > tabang malayok di hari sanjo. > sairiang salam nan jo sambah > salam tibo ka nan rapek, > sambah tatuju ka nan basamo > > indak basibak jo basisiah, sarato bahinggo jo babateh, ketek nan > indak disabuk namo, gadang nan baimbaukan gala, bathin dek adaik > kasadono, Panghulu nan gadang basa batuah, alim ulama jo tuanku, bila > maulana imam jo katik, nan mamagang sako dalam adaik, hulu balang jo > ampang limo, sarato manti nan pagawai, baitu pulo jo nan mudo arih > budiman, bundo kanduang samo didalam, disinan ambo mandatangkan > sambah. > > ado pun sambah nan ambo tibokan : > karano lah tibo ulak nan jo alai, dari sipangka ahli warih, hadok > kapado diri ambo, karano bapakai pituah lamo, pitaruah nan indak > baunyikan, pakirim nan indak baturukkan, mako utang diambo > manyampaikan, iyo kapado sidang RN nangko. > > Indak dapek sarimpang padi, > batuang dibalah ka parahu, > indak dapek sakahandak hati > kahandak juo nan balaku > > lah singkek langkah, panjang parmintaan, lah putuih pandang kabumi, > lah pulang pandang ka akhiraik, kok gantangno iyo lah panuah, > dibilangno raso alah cukuk, nan punyo datang manjapuk, nan batanam > datang mambubuk, iyo alah mandaulu Mamak/bapak/ dunsanak kito nan > banamo Ir. Hasril Hamid Yasin Msc, Nagari asa Gurun, Batusangka, > dalam umua 65 Th. di Bogor, pado hari Sinayan tanggal 21 Pebruari > 2005, pukua 4 pagi. Nan almarhum dikalo wakatu hiduk, iyo pagawai > nagari sabagai, Mantan Dekan/ Dosen Fakultas Perikanan IPB. > > Dek pangasiah jo panyayang, niniak mamak jo tuanku, sarato urang nan > banyak, lah bakubuakan di pandam pakuburan "urang rumah" Almarhum, > nan talatak di Rangkas Bitung, daerah banten rang namokan,lah > dibacokan pulo kaji jo tahlil sarato fatihah diatehnyo. > > A to nyo lai, tantangang diri mandiangko, lamo hiduk banyak dirasai, > jauah bajalan banyak diliek, kok ado lah utang kain nan sacabiak, > utang pitih nan babilang, hutang siriah hutang pinang, sarato salah > jo khilapaik, kapado kito nan basamo, mamintak sipangka warih, iyo > nak babari maaf mandiangko, dari muluk sampai ka hati, dari dunia > sampai ka akhiraik. > > limbak nan dari pado itu, kok ado khilaf jo gawa di kito nan basamo > kapado Almarhum, alhamdulillah, sabalun bajuluak lahno rareh, sabalun > dimintak lah babari, lah babari mauh di si pangka warih. > > barabah sadundun nan jo balam > sikok baulang pai mandi > sambah sadundun dengan salam > sambah disiko ambo akhia-i > > Wassalamu'alaykum Wr.Wb. > > Bandaro Labiah > > > > > > > > ____________________________________________________ > > Berhenti/mengganti konfigurasi keanggotaan anda, silahkan ke: > http://rantaunet.org/palanta-setting > ------------------------------------------------------------ > Tata Tertib Palanta RantauNet: > http://rantaunet.org/palanta-tatatertib > ____________________________________________________ ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
