35 Hukum
Ampek macam hukum Partamo hukum ilimu Kaduo hukum bainah Katigo hukum kurenah Kaampek hukum ijtihad Salah cancang mambari pampeh Salah bunuah mambari diaik (mambaleh) Salah makan mamuntahkan Salah tariak mangumbalikan Cabuah dibuang, usue bapakai Sasek suruik gawa maubah Manyalang mamulangkan, maagiah buliah sajo Utang dibaie, piutang ditarimo Babatulan babayaran, mahukum bapatutan Piutang batagiah, manyalang mangumbalikan Nan mancancang juo nan mamampeh Nan mambunuah juo nan mandiaik Nan bautang juo nan mambaie Nan bapiutang juo nan kamanarimo Nan manghilangkan juo nan kamangganti Nan gawa juo nan manyasa Ampek macam caro manantukan hukum nan biaso dalam nagari Partamo dicari jo rundiangan Kaduo dicari manuruik adaik Katigo dibandiang manuruik syarak Kaampek dikaji sabab akibaik dari awa sampai akienyo Dihukum juo Urang nan maliang urang Urang nan maliang harato bando Hukum nan dipakai dalam nagari Pangadilan adaik panghulu-panghulu Kalo adiak nan salah, kapado kakaknyo Kalo kakak indak piduli, kapado niniak mamaknyo Kalo kamanakan nan salah, kapado mamaknyo Kalo niniak mamak indak piduli, kapado wali atau kapado nan tuo di kampuang Kalo isi rumah nan salah, kapado wali rumah Kalo wali rumah indak piduli, kapado panghulunyo Kalo isi kampuang nan basalah, kapado tuo kampuang Kalo tuo kampuang indak piduli, kapado isi nagari Kalo isi nagari indak acuah, kapado panghulu Kalo nan salah panghulu, karano indak acuah ka anak buah, diadukan kapado karapatan panghulu-panghulu Jikok nan salah nan ketek pado nan gadang, diadukan pado panghulu dinamokan mandugo Hukumnyo batanak nasi, manjamu kaduo pihak di hadapan hakim, hakim nan manyalasaikan, kalo indak dituruik hukumnyo mandagi namonyo Kalo indak manarimo hukum karapatan panghulu, hukumannyo dibuang sapanjang adaik Sagalo karajo buruak atau baiak jikok tajadi di dirinyo, indak dibao samo (indak dipidulikan) Hukum adaik tigo macamnyo Partamo timbangan aka budi iyolah jariah payah Kaduo timbangan ameh perak Katigo timbangan nyao badan Timbangan aka budi tigo macamnyo Partamo sasek suruik, talangkah kumbali Jikok salah pado Allah mintak tobaik, kok salah pado manusia mintak maaf Kaduo mangambangkan, lapiak maisi aie Katigo umpang manyisik lupo manyusuli, hilang mangganti, luko mandamak, patah manampo, sumbiang manitik Nan ditimbang jo ameh perak Mangambangkan lapiak, maisikan aie, manatiangkan carano Siriah bapucuak, pinang babuah, carano barisi ameh atau perak sakupang duo kupang (saameh labiah) sabanyak-banyaknyo satahie, sapaho, atau mamotong kambiang, sabarek-bareknyo kabau sikue, bareh saratuih Nan ditimbang jo nyao Hukumannyo dibuang atau utang nyao dibaie jo nyao Jikok nan dihukum indak namuah manjalani, hukumannyo batal, manjadi hukuman mati pado adaik di nagari, nan dihukum dibuang, diusie dari nagari Hukum buang ado ampek macamnyo Partamo hukum buang siriah Kaduo hukum buang biduak Katigo hukum buang tingkarang Kaampek hukum buang daki Nan dinamokan hukum buang siriah, dibuang sapanjang gadang, indak dibao baiyo batido, indak dibao sahilie samudiak, indak dijalang kok tajadi, buruak baiak di dirinyo dek nan sagadang atau dek nan sapayuangnyo Hukum samacam itu buliah dibatalkan (indak dijalani ) tapi diubah jadi kok baabu dijantiak, kok rasan balenggangi, kok kuma disasah Nan dinamokan hukum buang biduak Dibuang dek karapatan nagari Nan dinamokan hukum buang tingkarang Dibuang dek karapatan nagari, indak buliah lai dipabaiki dek nagari, kok ado tajadi nan buruak atau nan baiak ateh diri nan dihukum, indak ka dihiraukan, indak ka diliek, indak ka dijanguak dek urang saisi nagari Tapi kalo ditimpo cilako barek, tagak indak tasundak melenggang indak tapampeh, indak tamakan dek irih jo didih, antaro anak jo induak bapak, antaro suami jo istri, antaro adiak jo kakak nan sainduak saayah, guru nan maaja, tukang nan mambuekkan rumah atau antaro dukun jo pandai ubek kasadonyo dapek mahiraukan Nan dinamokan hukum buang daki Hukum buang dek karapatan nagari, Indak buliah lai tingga dalam nagari, kalo ado nail dihukum punyo harato sawah ladang dibaie atau diganti dek nagari Limbago patitiran adaik Warih dijawek, pusako ditoloang, gadang bagiliran Syariaik palu mamalu, dunie baleh mambaleh Imbau basahuti, kato bajawab Dakwa bakatarangan, jawab bahiliran Harato bawarih Gabak manganduang ujan, kalimbajo manganduang angin Silang bapangka, karajo bajunjuang Kato baasa, angin bapuhun Salisiah balawanan, takuruang mati Barubah disapo, batuka diasak Cabuah dibuang, usue dipakai Ilimu sasuai jo aka, pandang tatuju ka nan lahie Asa hukum satu, yaitu manyalasaikan antaro duo urang nan bakasumaik Pacahan hukum ado anam macam Partamo cupak usali Kaduo cupak buetan Katigo kato pusako Kaampek kato mupakaik Kalimo kato dahulu batapati Kaanam kato kudian kato bacari Cupak usali adolah kasasuaien umum kasaluruhan hati manusia Cupak buetan adolah karukunan nan mambarikan katanangan bagi satangah hati manusia Kato pusako adolah malatakkan suatu di tampeknyo Kato mupakaik adolah barasa dari kato basamo nan dapek dibao sarantau hilie sarantau mudiak, sarantau kiri, sarantau kanan Kato dahulu batapati adolah kato nan hampie salasai, datang masalah nan baru, dibuek janji nan disatujui, disusun janji baru, dirundiangkan basamo, sasudah mandapek pasasuaian Kato kudian kato bacari adolah kato nan lah hampie salasai, datang masalah nan baru, nan mansyahkan dek tapek alasan nan hak, kalah nan batie Pusako jatuah hukum tigo macamnyo Partamo ditangkup Kaduo diliek, dimusiah dibandiang, dijinjiang sarantau hilie sarantau mudiak Katigo dipikiekan hukum nan jatuah tu Sahari hukum jatuah ribuik rajo namonyo Duo hari hukum jatuah angin kapa-kapa namonyo Tigo hari hukum tu jatuah angin lunak lambuik namonyo Dipikiri pado duo hari katigo Itulah pusako pikie jo janji jatuah hukum Jikok ka basuluah pado alim pandeta atau pado adaik nan kawi dalam nagari Wajib bagi panghulu mamanggie urang-urang bakasumaik Mamareso tantang pandapek-pandapeknyo Mambuek surek pandakwaan Mambuek surek hukum pado nan manang Sabuah diagiah pado nan manang Sabuah disimpan di tangan panghulu Mahindari jan tajadi, manjago jan bapaliang muluik pandakwa atau nan tadakwa, saadah atau panghulu-panghulu nan lain Utang pado koto ado ampek macamnyo Partamo ditangkup (ditarimo) Kaduo manyalasaikan Katigo mamusiah Kaampek mambandiang Hukum bandiang ado tigo macam Partamo bandiang saiyo Kaduo bandiang pamacah Katigo bandiang pamutuih Hukum alue dipakai dalam kato-kato Halue salah batimbang Halue utang babaie Halue salang mangumbalikan Halue suarang baragiah sarikaik babalah, balabeh dikatangahkanbatinjau, gaib bakalamullah, basalah bapatuik, jahek baundang-undang Halue hukum sasuai jo Hadih, dalie kieh jo ijtimak Halue adaik adolah bapiutang pado sagalo urang dalam nagari Halue kurenah, jiko baiak, jadinyo baiak, elok di urang katuju di awak Nan bana itu tatap di nan bana, baiak kato dipabaiki, binaso kato dibinasokan, sah kato disahkan Ado tigo macam hukum Partamo hukum ilimu Kaduo hukum bainah Katigo hukum ijtihaik Hukum ilimu adolah hukum nan sasuai jo ilimu, kalo basalisiah itu namonyo hukum barhalo Hukum bainah adolah hukum tempang, kaputusan nan disangajo untuak mamanangkan urang nan mamungkiri walaupun basumpah Hukum ijtihaik adolah ampek pulo macamnyo Partamo hukum badukalo Kaduo hukum baramu Katigo hukum basamo Kaampek hukum samato Hukum badukalo adolah juo hukum tempang, barek sabalah, dimanangkan karano bapihak pado urang nan dakek atau karano didake-i Sipaik hukum tigo macamnyo Partamo gabuak diampeh Kaduo miang dikikih Katigo puntuang di hambuih Nan dikatokan gabuak diampeh, kusuik disalasaikan, karuah dipajaniah, dandam habih kasumaik putuih, indak dapek dibandiang lai, yaitu hukum pardamaien Nan dikatokan miang dikikih, kok kusuik disalasaikan, karuah dipajaniah, hutang dibaie, piutang batarimo, hukum bakalah manang Nan dikatokan puntuang dihambuih dicabuik dari kahormatannyo, diturunkan pangkeknyo, atau hukum buangan Panyalasaien hukum tigo macamnyo Partamo ditarimo atau dibaie Kaduo ditalangkai kok gadang dipaketek Katigo ditangkih atau indak ditarimo ================= Oleh : A.B. Dt. Majo Indo Disadur dari buku "Kato Pusako" ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
