64 Lupo Diri
Tagendeang biduak nak rang Nareh Dihantak biduak nak rang Bayue Geleang bak geneang siriah areh Indak takana tampuak layue Mangkonyo bariak aie di kolam Karano udang bacampue limbek Laku bak lonjak labu dibanam Umpamo kacang diabuih ciek Buah kuini buah ambacang Jan diruruik padonyo jatuah Bunyi kecek marandang kacang Bunyi muluik mambaka buluah Bak kabau jalang kareh hiduang Paunyuik pambulang tali Tak tau dima kandangnyo Bak umpamo badak jantan Kulik suriah jangeklah luko Namun lenggok baitu juo Lai ketek taranjo-ranjo Lah gadang tabao-bao Lah tuo taubah indak Sampai mati jadi parangai Elok tungkuih indak barisi Gadang agak tak manyampai Bak karabang talue itiak Eloknyo tacampak sajo Gadang sanduak tak mambao Gadang suok tak mnganyang Gadang hantak indak luluih Gadang tungkuih indak barisi Gadang garogok indak bamalu Geleang bak sipatuang hinggok Bak gadih jolong basubang Dikacak batih lah bak batih Dikacak langan lah bak langan Tinggi lonjak gadang galapue Namun lago di bawah sajo Umpamo tabuang sarueh Bak kancah laweh harang Bara eneang bara kuneneang Bara kucikak tandan ikue Malang cilako rajo Ganggang Tuak dibali tunjang hilang Hari pagi dibuang-buang Hari patang dikaja-kaja Gigi tangga rawan murah Awak tuo gadihlah musim Ditakan paruik dikampihkan Kacang paringek di dalam parak Dikarek pandan jo durinyo Awa diingek akie indak Alamaik badan kabinaso Batang silasiah dirabahkan Batang padi di subarang Kandak hati tak tatagahkan Karano hati urang-surang Hao pantang karandahan Napasu pantang kakurangan Tuah dihajan cirik tapanca Siriah naiak junjungan naiak Waru bajanjang batang pandan Sansai baiek binoso baiek Badan surang kamanangguangkan Ijuak samo diampaikan Babanda ka Limau Puruik Isuak kasamo dirasaikan Ajaran niniak tak dituruik Diraso gagah badan diri Lonjak bak labu dibanam Geleang bak sipatuang kanyang Pandang mato maliek ka ateh Urang lalu indak diraso Hino mulie indak piduli Tuo mudo indak disapo Badan bak raso tampan bana Sapantun alang ka manyemba Bukan kapalang kadiak pinggang Barapolah angguak lenggok diri Baganti-ganti kijok mato Disangko diri gagah bana Surang urang pun tak manyapo Dek tajamnyo mato pangkue Tanah bato dipadata Dek rancak dendang tukang ganduah Tak diraso barang lah batuka Manapuak aie di dulang Muko juo kanai pacaknyo Maludah maadok kateh Muko juo nan kasimburan ================= Oleh : A.B. Dt. Majo Indo Disadur dari buku "Kato Pusako" ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
