Maa Rang Lapau nan Basamo,
Ondee Angku Zul Amri, iyo ibo lo hati kami dek angku masuak rumah sakik. Kito doakan kini alah elok dan dapek lo manikmati suasana Nyepi di Bali.
Apopun nan manyababkannyo, mari kito caliak ringkasan barito ko:
1. Mungkin terobsesi oleh postingan tantang jariang jo patai babarapo hari nan lapeh dipalanta
2. komsumsi jariang jo patai di ambo iyo agak bakalabihan
3. tensi ambo malonjak manjadi 230 / 130
4. ginjal ambo nan suok dipantaknyo . hasil diagnosa samantaro yaitu kamungkinan ado gangguan ( batu ) di saluran kemih atau ginjal. Hasil pemerikasaan rontgen , USG , Lab ( gula darah normal 125 / ml ) tak ditamukan adonyo batu diginjal dan saluran kencing.
5. Katiko ambo tanyokan ka dokter nan marawat , panyabab pembengkakan ini , apo ada kaitannya dengan sering mamakan patai jo jariang dan minum kopi ? jawaban pak doto kamungkinan ya , sambia galak sengeang
6. hati hatilah dengan jariang jo patai
1. Postiang Patai jo jariangko memang ambo nan muloi dek taragak jo Budaya Kampuang dan ota salero manyalero dan hubuangnnyo jo nan busuak-busuak tapi rasonyo lamak. Batambah jauah jarak dari kampuang, baik dari jarak tampek (lokasi Rantau) ataupun waktu (lamonyo marantau) batambah kareh saruan Jariang jo Patai ko (Caro Arabnyo: Wa jaraina wa fataina ... Iyo baitu Rangkayo Rahima?). Postiang tu salain mangakui busuak baunnyo tapi juo mangatangahkan khasiatnyo mangutip sumber-sumber reset makanan. Istimewa jo jariang bahkan ambo caritokan baa Carito Kawan di Kabek Jariang, sampai maimbau-imbau namo Amaknyo tu bana di Rimbo Gadang.
2. "Agak bakalabiahan". Iko nan paralu kito hati-hati, mungkin dalam sagalo hal. Misanyo banyak makan nasi mungkin kakanyangan tapurangah pulo awak di bueknyo. Jadi, kok dapek
"Sadang talamak diantikan," walaupun iko barek mangaranjokannyo.
3. Tensi. Mungkin juo macam-macam panyababnyo.
4.5. Ginjal. Memang iko barek karajo. Hubuangannyo jo jaraina wa fataina? Dotor galak sengeng sajo. Panyababnyo mungkin pulo macam-macam.
6. "Hati-hati", iko nasehat dan kunci nan dapek kito adaptasikan ka macam-masam soal nan kito hadoki. Kato isyarat "Ingek sabalun kanai, kulimek sabalun abih" dapek diadaptasikan juo dalam soal ko.
Tambahan dari MakNgah. Salain goreng ikan tri jo patai nan masih ambo simpan-simpan di kulkas, ambo pun mambuek gulai udang jo patai. Kapatang ko babuek lo kalio patai. Jadi lah bapatai-patai. Namun ambo indak makan sakali gus doh. Di ulang-ulang, di ambiak saketek-saketek bilo rindu. Masih ado di kulkas. Maklumlah, iko untuak MakNgah adolah barang lux, bukan sajo susah mandapekkannyo tapi maha bulo balinyo. Tadi malam, tangah malam, marangkak-rangkak ka dapua takana ikan tri jo patai, lai bakacok juo seketek jo nasi.
"Patai Milk Shake ". Kabanyakan kito di Lapau mungkin lah mangatahui aa tu "Milk Shake" tu. Milk shake sacaro garah dahulu ditarjumahkan kawan-kawan manjadi "Susu Goyang" tapi itu garah. Milk shake adolah Eskrim dicampua Susu (milk), dibalendeh sahinggo manjadi minuman pakek-pakek encer antaro eskrim jo susu. Milkshake ko macam-macam flavornyo tagantuang kapado salero masiang-masiang. Sacaro komersial nan populer adolah strawberry atau coklat. Nah. dalam carito fataina wa jaraina ko MakNgah mamasuakkan flavor patai. Manuruik salero Mak Ngah iyo lamak. MakNgaha jadi kalinci (guinea pig) percobaan sandiri. Tapi dalam postiang tu rasonyo lai dibarikan pulo desclaimeryo, sia nan ka maancubo cubo sandiri dengan risiko sandiri.
Baitu juo jo "Kopi Talua Patai". Kapatang, dek stock patai habih di kulkas, mangko Makngah cilok sajo duo incek patai dari Kalio Patai. Dek kalio patai ko patainyolah lambuik, jadi murah mambalendehnyo. Rasonyo. Oiy yaiyyay Biay! Iyo balain dari nan lain. Maklumlah patai tu lah baraso kalio, jadi flavornyo unik, nan bagi MakNgah marupokan world premiere pulo. Dek Makngah lamak, unik, dek nan lain, mungkin muak mandanganyo. Tapi kok ado nan kamancubo, disclaimernyo, risiko sandiri.
Nah, dibaliak ota salero-manyalero jo makan ka makan ko, jan lupo bagarak badan. Indak paralu nan barek-barek do. Kalau nan lah baumau tanduak limo kateh tu, rancak iko diparatikan. Jan banyak duduak-duduak di rumah sajo karano di kantua karajo kan lah ahli duduak juo. Saroman Mak Ban kuliliang Taman Bogor dakek rumah baliau bajalan-jalan iyo rancak tu. Anggota Lapau nan main tenis di Batawi rancak lo du, salain seport kan ado sosialisasi kopi darek basuo kawan-kawan. Basuo jo kawan-kawan tu ubek lo du. Kalau MakNgah, baranang, bajalan, balari-lari anjiang, walaupun dalam rumah dari biliak, kamar mandi ka dapua, trade mill (jalan tempat), dan manari panabik paluah. Sakitulah dahulu, sabulan lai MakNgah ka batanduak tujuah... :)
Mudah-mudahan kito sehat sadonyo dan jan lupo basarah diri kapadoNyo, Allah Subhanahauataala, mulo karajo jo Basmallah diakhiri jo Hamdallah dimanopun kito mamijak bumi manjunjuang langikByo, indak tantu bilo kito ka diimbauNyo, karano kapadoNyo kito sadonyo kan kumbali...
Salam, --Mak Ngah Santa Kuruih, di Tapi Riak nan Badabua
37626
From: zul amry <[EMAIL PROTECTED]> Date: Thu Mar 10, 2005 4:42am Subject: [EMAIL PROTECTED] Dipantak Patai
assalamualaikum wr.wb :
Mungkin terobsesi oleh postingan tantang jariang jo patai babarapo hari nan lapeh dipalanta , mako komsumsi jariang jo patai di ambo iyo agak bakalabihan dengan segalo macam variasi masakan , antah itu digoreang campua jo ikan teri atau dipangek campua jo udang , atau diuok sarato dimakan mantah sajo . Namun akibatnyo sangat fatal , ginjal ambo nan suok dipantaknyo . Caritonyo baiko , ditangah malam buto labiah kurang jam 2 malam pado tanggal 3 Maret 2005 paruik ambo sabalah suok sakik luar biaso , malilik , kejang dan sakik nan indak tabadoan . Indak doh tapaso balarikan karumah sakik (UGD ) di Denpasar . Satalah dipareso dek angku Doto hasil diagnosa samantaro yaitu kamungkinan ado gangguan ( batu ) di saluran kemih atau ginjal . Untuk pastinyo harus dicheck secara seksama dengan rontgen , USG serta lab darah & kencing dan baru bisa dilaksanakan bisuak siang . Dek sakiknyo luar biaso dan untuak mailangkan raso sakik tapaso basuntikkan dek angku doto ubek pananang ( valium / morphin ? ) , harus rawat inap dan terus diinfus . Sawaktu masuak rumah sakik , mungkin dek manahan raso sakik nan indak tatahankan , tensi ambo malonjak manjadi 230 / 130 . Hasil pemerikasaan rontgen , USG , Lab ( gula darah normal 125 / ml ) tak ditamukan adonyo batu diginjal dan saluran kencing , Cuma pado ginjal kanan ado pembengkakan dan radang atau dalam bahaso medis disabuik hidronephrosis. Katiko ambo tanyokan ka dokter nan marawat , panyabab pembengkakan ini , apo ada kaitannya dengan sering mamakan patai jo jariang dan minum kopi ? jawaban pak doto kamungkinan ya , sambia galak sengeang . Mako dari itu saran ambo bagi nan lah baumua kapalo limo , hati hatilah dengan jariang jo patai , jan sampai mangalami pulo sarupo ambo , ampek hari ampek malam tagolek di Rumah Sakit Graha Asih Denpasar . Sabagai ilustrasi ambo cubo mambayangkan kasanak sadonyo sarupo apo bana sakiknyo, pokoknyo labiah sakik dari urang malahiekan , baa kok baitu ? sacaro logika sajo urang nan malahiekan bia dikatokan sakik macam apo tapi masih namuah juo malahiekan ciek lai , tapi kalau nan iko iyo ampun ambo dibueknyo , kapoook !
Wassalam : zul amry piliang di bali
Internal Virus Database is out-of-date. Checked by AVG Anti-Virus. Version: 7.0.300 / Virus Database: 266.5.1 - Release Date: 2/27/2005
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
