Assalamu'alaikum wr. wb.
Sidang Palanta nan dianjuang tinggi diamba gadang.
Ambo cukuik "surprise" mambaca akronim di Padek-online ambo kiro mereka salah
tulih tapi setelah bbrp hari akronim itu tatok samo.
Alun habih ubek KADA saroman nan disabuik mamak Duta di nagari Indian kini
timbua pulo KADAL, di dalam kosa kata betawi ungkapan kadal merupokan ungkapan
nan indak elok, hati2 dikadalin loe. Kalau dalam kamus awak kadal atau
bingkarung juo asosiasino indak bagus. Ambo takuik nanti dek kito maadoan
PIL-KADAL nan tapiliah sabagai pamimpin adolah kadal atau bingkaruang mungkin
pulo kalalaso, biawak, buayo sarato nan sajinih jo mukaluak nantun.
Pamimpin adolah unsur nan sangaik pantiang nan manantukan tujuan na ka dicapai
bak kecek urang kumpulan singo nan dipimpin oleh domba bisa dikalah kan
kumpulan domba nan dipimpin sikua singo. Pandang jauah kito layangkan pandang
dakek kito tukiak-an, negara melayu dan kandang singo nan indak labiah sagadang
lapek tapi dipimpin oleh urang nan kompeten saroman Tun DR. MM dan LKY bisa
managalahkan Indonesia Raya dalam sagalo bidang kecuali bidang korupsi.
Kini alah awak liek banyak mereka2 nan maraso dirino mampu mamimpin balomba
lomba jo sagalo macam caro untuak manjadi KADA dinagari awak. Nan awak
takuik-an adolah tabali kuciang dalam karuang, karano alun ado mereka atau
simpatisan no nan barani timbua dipalanta-ko, baru sikua kuciang nan alah
maliek-an balangno dan langsuang ditubo dek nan indak suko jo kciang tu,
sadangkan kuciang kuciang nan lain masih mandok2 atau masih malu2 kucing, kok
urang talengah disamba-e lauak di piriang.
Ado nan bapandapek indak paralu awak piliah kuciang nan bana2 putih mulus,
bialah kuciang nan agak balang itam tapi bisa manangkok mancik, mako diabaleh
dek nan lain, kalau hanyo untuak manakuik2an mancik angkek silah katua mancik
jadi pimpinan.
Kok kito ingin mambangkik batang tarandam, manabuih gadaian lamo, maapuih malu
dikaniang.
Bukan lah alu salu nangko
alu tataruang ditabing
kok tataruang di lasuang
bisa mancaruah galu galu
bukanlah malu samalu nangko
malu tacoreang di kaniang
kok tacoreng dipungguang
buliah disaok jo kain baju
Mau indak mau, suko indak suko kito paralu pamimpin nan batua batua barasiah
dan mampu malakukan tugehno, karano indak bisa manjaniahkan aia dimuaro kalau
dihuluno kumuah dan indak mungkin mambarasiahan saro kalau sapuno kumuah. Kito
hanyo bisa bado'a kapado Allah supayo dibarikan baliau pamimpin nan sabana-no,
tapi kalu nanti nan tapiliah tatok nan indak bakalincik-an, makono kito haruih
introspeksi, karano pemimpin itu adolah cerminan dari rakyaikno. Dikalompok
parampok indak ka mungkin ustadz jadi pamimpin tapi sakurang kurangno tukang
cacak. Kalau pamimpin awak koruptor mako mungkin sajo awak adolah maliang.
Para pemimpin nan mulia kalau anda kini jadi cagub, cawako atau cabup, sadarlah
bahwa anda dan saya semua adolah camat. Pasti dan pasti kito sadono akan
mapatangguang jawabkan nan awak lakukan didunia ko didepan Allah rabbul'alamin.
Satiok kamu adolah pamimpin dan satiok pamimpin akan diminta patanggungan
jawabno di depan Allah ateh nan dipimpinno. Pamimpin nan adil adolah urang nan
partamo masuak sarugo tapi pamimpin nan zalim adolah urang nan partamo masuak
narako, ingeklah bhw azab Allah itu sangaik padiah. Kamuliaan nan anda dapek
didunia balum tantu bisa manyalamaik-an anda di depan pangadilan Allah, mungkin
sajo urang nan mulia di dunia dimato manusia manjadi hina diakhiraik dan urang
nan hina didunia dimato manusia manjadi mulia diakhiraik. Tapi kalau anda
benar2 tulus ikhlas dan hanya mengharapkan keredhaan Allah, maka Allah pasti
akan mambantu anda dan kalau seandainya anda indak tapiliah jadi pamimpin mako
berarti Allah ingin menyalamatkan anda dari fitnah dunia. Tapi kalau
anda tapiliah jadi pamimpin jalankanlah amanah dan tangguang jawabko sebaik2no
sasuai jo nan diparentahkan Allah, ingek kalau anda berlaku curang sakian juta
urang ka manyumpahi anda dan azab nan pedih akan mananti anda diakhirat.
Talantuang kanaiak tasingguang katurun ridha jo ma'af ambo pinto, ka Allah ambo
mintak ampu ka tuan ambo mintak ma'af. Iko hanyo rasian anak nagari nan ingin
maliek nagari no maju dan cemerlang.
wassalam
Junaidi (38), kandang singo
---------------------------------
Do you Yahoo!?
Yahoo! Small Business - Try our new resources site!
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
