Maa Angku Syahril Bakri, Angku Taufik Malin, sarato Rang Lapau nan Basamo,
Angku Taufik Malin ruponyo lah malanglang buana di dunia fana ko sabalun ambo maninggakan Kampuang. Ambo alun panah basuo jo baliau. Baliau pun baru "masuak Lapau". Ruponyo mancaliak ambo acok takilek di Lapau, baliau mungkin manganggap MakNgah sabagai moderator di Miling List Awak ko. Mungkin itu sababnyo postiang baliau di arahkan ka MakNgah. Angku Taufik, walaupun ambo acok di Lapau mangikuti sabagian ota sajak mulo didirikan lah 12 tahun sampai kini, ambo bukanlah moderator. Lapau kito indak ado moderatornyo doh. Jadi rancak postiang-postiang ka Lapau diarahkan sajo ka Rang Lapau nan Basamo. Bak pituah Angku juo, "Lamak Siriah dikunyah-kunyah, lamak kato dipalegakan."
Angku Syahril. Apokoh "Pak Nur Anas Jamil dosen dari Ikip Pdg" ko Drs. Nuranas,Sejarah Budaya, dari Talago, Pek Ten? Kalau iyo, mungkin baliau kawan ambo maso sisuak (sajak 1952) di Pek Ten, nan kini lah almarhum pulo.
Tambahan Legenda.
Di awal Maret 1966 (babarapo hari sabalun apo nan dinamokan tanggal Supersemar), ambo kabatulan di ateh Kapa Koan Maru balia dari Padang ka Jakarta. Ambo panek-panek, rangkik-rangkik di Kapa, latiah dari pajalanan 5 hari naiak bus dari Medan, singgah sabanta di Bukittinggi, langsuang ka Padang,ka Taluak Bayua mangaja Kapa Koan Maru ka pai balaia. Ampia ambo katinggalan Kapa, indak ado tiket, indak ado catut sampai di Taluak Bayua. Kapa lah ka balaia, awak tingga surang lai nan indak bakuricih. Baa lai, ka diambuai kapa ko kok jatuah lo badan ka lauik.
Kabatulan ado saurang babaju hijau nan indak bakatahuan jo ambo kalua kapa tagageh-gageh. Mungkin ka pai basamalan jo familinyo. Katu inyo ka baliak ka kapa, ambo kaja dan stop urang tu. "Eh Uda, lah hampia tingga ambo ha" kecek ambo ka inyo kareh-kareh supayo di danga urang nan bahaso dunsanak ko sadang mancari ambo. Sambia basalam ganggam ka inyo, ambo bisiakkan mintak inyo maangkek tas ambo mambawo masuak kapa.
"Alaa, alhamdulillah, untuang awak basuo!" keceknyo sambia basalaman mangijok mato. Inyo jenjeng lah tas ambo ko tagageh-gageh, maogah-ogah jalan saroman tantara gagah kapanekan manhangok bajalan ka pintu masuak kapa; ambo ikuti inyo dari bulakang. "Ini adik saya, untung nggak ketinggalan!" keceknyo jo Logat Subarang ka tukang kuricih di pintu masuak kapa.Ruponyo Logat Subarang tu labiah ditakuti atau dianggap bagak dari Logat Awak! "Ya Pak, ya Pak" kecek tukang kuricih ko maangguak-angguak. Ambo maangguak lo saroman awak lah dipa-Apak-inyo lo, sambia taruih mairiangkan si Uda ko ka teh ka Dek Kapa.
Kapa sampik, sudah tu sampai di dek, di latakkannyo tas ambo dakek kawan-kawannyo nan ruponyo urang manggaleh babelok. Tolong agiah tampek stek, ko adiak den hampia tingga sabanta ko, keceknyo ka rombongan nan lah dulu di sinan tu. "Mokasih yo Da, beko di Jakarta awak samo-samo kalua yo!?" kecek ambo untuak mayakinkan. "Yo, beres tu, jan pindah-pindah jan bacarai jo rombongan ko," keceknyo. Sudah tu memang tigo hari kamudian tibo di Tanjuang Pariuak awak ka kalua kapa, inyo lah datang, maangkek tas ambo, malapeh ambo ka lua kapa sambia basalaman samo-samo batarimo kasih salamat jalan. Ambo indak panah bakatahuan dan basuo jo inyo sampai kini. Nah, ikolah carito panambah data ka topik tulisan Angku Taufik Malin, manganai "uang" tu.
Dek badan MakNgah lah latuik naiak oto 5 hari sakali arah, jalan buruak, pulang baliak Bukittinggi-Medan maurus visa, mangko di ateh dek kapa, tapurangahlah badan. Langsuang istirahat, banyak mangalai-ngalai takalok-kalok, indak banyak carito, purak-purak engak tapi aka ndak ilang. Rombongan ketek dakek awak tu asyik maota, main remi parintang wakatu. Lah tigo malam balaia, katu pagi-pagi sampai di Tanjung Pariuak, urang lah basegeh, ganti pakaian, basega, maota-ota, minun kopi. Awak bitu lo, lai duduak-duduak minun kopi basosialisasi ka bapisah sapagi tu. Salah saruang kakak dari Canduang dalam rombongan batanyo ka ambo:
"Sjamsir ka pai ka ma?"
"Mungkin agak jauah staketek Tuan," jawab ambo lunak-lunak.
"Ka taruih ka Banduang atau ka Yogya?" tanyo baliau.
Mungkin awak anak mudo idak ado potongan urang manggaleh babelok saroman anggota rombongan tu, disangko awak Mahasiswa UI, ITB atau Gajah Mada.
"InyaAllah kok lai disampaikan Tuhan, ka Berkeley," jawab ambo.
"Kama?" kecek baliau tacangang.
Namo nagari tu alun masuak perbendaharaan kamus baliau atau kamus umum wakatu itu lai.
"Ka Berkeley" kecek ambo mayakinkan.
"Bekli? Dima tu Bekli tu?" tanyo baliau luruih.
"Di Kalifornia, Tuan," jawab ambo lunak manambah katarangan.
"Kalipornia? Amerika?" tanyo baliau takajuik jo mato saroman Mato Jawi.
"Iyo Tuan," jawab ambo jo Galak Nabi... :)
"Oih, Sjamsir ka pai ka Amerika!" sorak baliau manggoyo lutuik kawan duduak dakek baliau.
Mandanga tu nan lain-lain barinsuik-insuik dakek-dakek ka ambo manjalehi aa nan didanga tu.
"Ka Amerika?" "Anto indak mangecek-ngecek lah tigo ari kito balaia?" tanyo nan lain.
"Iyo, aa lo lah nan kadikecekan Tuan, Rantau jauah nan kadituruik, suasana nagari saroman ko lo kini," kecek ambo.
Wakatu itu lah tasabuik namo "Taufik".
"Taufik di Amerika kini, mudah-mudahan basuo nanti" kecek kakak nan dari Canduang tu.
Aaa, baitulah caritonyo. Ampek-puluah tahun sampai kini ambo indak panah basuo Angku Taufik tu di Amerika tu doh. Wakatu suasana Tsunami patang ko, banyak email basilang siua ka ambo. Salah satunyo ambo caliak namo "Taufik Malin". Ambo talusua jo email paribadi jo subyek "Dari Canduang?" Ruponyo, iyo Angku Taufik ko lah nan disabuik urang ka ambo di ateh kapa Koan Maru 1966 tu nan kini jadi legenda. Tuhan mampatamukan akamai di Dunia Maya. Ambo tanyo jo Angku Darul nan juo sakampuang kami juo tapi Angku Darul mangiro kok Angku Taufik dri Bukik Batabuah. Baa tu Angku Taufik? Bacarito lah ka Rang Lapau, adidunsanak kito nan Basamo, di maa pulo Angku Taaufik di dunia maya ko kini, di Japang atau di Amerika. Mudah-mudahan kito basuo juo nanti baganjua di Lua Lapau ko. Tulisan dan pangalaman Angku Taufik nan labiah pakiah tantu banyak manfaatnyo ka Kito nan Basamo.
Salam, Mak Ngah
38595
From: <[EMAIL PROTECTED]>
Date: Mon May 2, 2005 10:52am
Subject: RE: [EMAIL PROTECTED] (Nanka 6) Setiok urang mancari uang....lobang uangkotak amal nan lucu!
Waalaikum salam Wr. Wb.,
Pak Taufik Malin, manarik satiok tulisan yang Bapak sampaikan, ambo
InsyaAllah lai mambaconyo, tapi tulisan iko salalu ditujukan ka Mak Ngah
di Santa Kuruih, iko bagarah sajo bukan ambo komplain, he he.
Mengenai lubang kotak wakaf di Musajik manuruik ambo iyo rancak di pagadang, salain pitih indak balipek-lipek, iyo doa awak bia gampang dan capek masuaknyo pitih dari saku ka kotak iko, sabaliaknyo mungkin garin masajik takuik pitih diambiak dek urang yang indak kompeten, makonyo kotak tu juo dikunci jo kuro2. Tapi biasonyo kalau hari Rayo, dulu dimasajik kami urang mintak sumbangan pakai kambuik, InsyaAllah iyo lai dapek banyak, mungkin dek suasana dan lubang nyo yang gadang tu barangkali ditambah sang pialang adolah Pak Nur Anas Jamil dosen dari Ikip Pdg, baliau sangek mahia marayu jamaah hanyo untuk kabaikan iko.
Sakian, wass, syb.
-----Original Message----- From: taufikmalin [mailto:[EMAIL PROTECTED] Sent: 1 May 2005 0:56 To: [EMAIL PROTECTED] Subject: [EMAIL PROTECTED] (Nanka 6) Setiok urang mancari uang....lobang uangkotak amal nan lucu!
Assalamu'alaikum wr wb
Angku Syamsir, pamisi masuk kalapau, hari iko adolah hari sabtu, bisuik hari minggu balun tantu awak hidui lai. Ado nantakana untuk disampaikan kapado anak2 mudo minang yaitu tantang uang atau rasaki. Uang bisa membuat orang manjadi bahagia, dan bisa pulo membuat orang manjadi susah, dan malah bisa membuat orang bakalahi antaro dunsanak, anak jo bapak atau ibu, dan bisa pula satu bangsa dengan bangsa baparang. Baitumanalah pangaruh pitih atau uang. Jadi kalau diliek liek buku pedoman hidup orang muslim, Al Quran, mudah2an awak bisa manggunokan uang itu dengan bijaksano. Mudah2an tulisan ambo dibawah ini bisa baguno untuk orang2 minang yang sedang membangun nagari.Kalau ado nan baik ambieklah, kalau ado nan salah buang sajo. --- mooh di cut ---
Internal Virus Database is out-of-date. Checked by AVG Anti-Virus. Version: 7.0.300 / Virus Database: 266.7.2 - Release Date: 3/11/2005
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
