Assalamu'alaikum wr.wb. Kok nan kaanam, manjalang kalalok.
Wassalamu'alaikum wr.wb., Lembang Alam PANGAJIAN DI MUSAJIK GURUN (6) 'Kaji awak samalamko pakaro basugiro mamintak ampun kapado Allah,' kecek buya Abidin maawali wirid patang Satu ko. 'Indak ado awakko nan indak ka talanjua sasek jo badoso doh. Mungkin talanjua mampakecek-an urang. Mungkin talapeh kato-kato bangih ka urang. Mungkin taambiak hak urang. Mungkin durako ka urang gaek. Atau durako ka laki bagi istri-istri. Mungkin talanjua mangicuah. Sambuah kamungkinanno sarato ado sajo wakatuno, baiak disangajo atau indak, kirono awak alah mambuek doso. Kasadoannotu langsuang tacataik. Malaikat Raqib jo 'Atid nan di suok jo di kida awak indak panah baranti mancataik sagalo macam karajo jo amalan awak, nan baiak ataupun nan buruak. Namun alhamdulillah, basyukur bana awak dek Tuhan Allah Maha Pangampun. Sagadang aa juo doso taradok Tuhan Allah, kalau awak mintak ampun pasti diampuniNo. Malahan awak di himbau, untuak basugiro mandapek-an ampunan Allah ko. 'Wa saari'uu ilaa maghfiratin min rabbikum wa jannatin 'ardhuhassamaawaatu wal ardhu, u'iddat lil muttaqiin.' Firman Allah Ta'ala di dalam surek Ali Imran ayat 133. 'Basugirolah kalian kapado ampunan Rabb kalian sarato untuak mandapek-an (balasan) sarugo nan lawehno salaweh langik jo bumi, nan alah disadiokan untuak urang-urang nan taqwa.' Basugirolah! JaNo Allah. Capek mintak ampun. Capek mambaco astaghfirullah, katiko awak sadar alah talanjua babuek doso. Sudah itu dikana-kanai bana jaan sampai diulang pulo mambuek doso nan samo baliak sasudah itu. Capek awak tobaik, nan sabana tobaik, taubatan nashuha. Ditambah pulo jo janji Tuhan Allah nan bahaso untuak urang-urang nan amuah mintak ampun, amuah manyasa-i kasalahannotu, Allah manyadiokan balasan jo sarugo Allah nan sangaik laweh. Salaweh langik jo bumi, laweh sangaik. Indak paralu pulolah awak mancubo nak maukuano, bara lawehno sarugo Allah tu. Sabab sangaik laweh, dan alah tasadio. Alah disadiokan Tuhan Allah untuak urang-urang nan bataqwa. Banyak tando-tando urang nan bataqwako ditarangkan dek Tuhan Allah di dalam Al Quran. Nan sambuangan dari ayat di ateh, diagiah panjalasan pulo dek Allah sia-sia nan dimukasuik jo urang nan bataqwa ko. Nan partamu adolah urang-urang nan suko ba infaq, manafkahkan di jalan Allah harato nan dapek dino, baiak dalam kaadaan sadang murah rasaki ataupun sadang agak kurang saketek rasaki. 'Allatziina yunfiquuna fissarraa i wadhdharraa i.' Sadang pasang, sadang banyak rasaki, no bainfaq. Sadang kurang, sadang agak sayuik saketek tapi lai juo, ano tatap juo bainfaq. Iko tando nan partamu dalam rangkaian ayat nan iko. Nan kaduo adolah, 'Wal kaazhimiinal ghaizha.' Dan urang nan manahan bangih. Urang nan sabanano kok bangih alah ka patuik, tapi indak bangihno doh. Alah saparampek jam no manokok pintu, indak juo kunjuang dibukak-an urang pintu. Ditokok juo ciek lai, alah sampai duo puluah minik, baru kasudahanno kalua binyi takantuak-kantuak mambukak-an pintu. Bagi nan pambangih kalua sakali burangsang, 'Lalok sarupo urang mati, alah barangik den manantian indak kunjuang babukak-an juo pintu'. Tapi urang nan mangandalian bangihno, indak kalua bagai dino kato-kato sarupo itu doh. Maklum sajo no, barek sangaik karajo binyi den ko gomah, kalatiahan banano. Nan katigo, 'Wal 'aafiina 'aninnaas.' Nan pamaaf ka urang banyak. Lah talongsoang urang salah, katiko urang tu mintak maaf, indak tarago bapikia bagai no mamaafan urang tu doh. Indak banyak-banyak etongan bagai no doh. Indak paralu kalua pulo macam-macam kato-kato nan indak paralu sabalun mamaafan tu doh. Baitu urang mintak maaf, dimaafanno sakali. Janji Allah pulo, 'Wallaahu yuhibbul muhsiniin,'. Allah manyukoi urang-urang nan babuek baiak. Tasabuiklah kisah tantangan Abu Musa Al Kazhim, cucu dek Ali bin Abu Thalib, cucu piyuik dek nabi SAW. Pado suatu subuah baliau ka bauluak ka sumbayang subuah, ditolong dek khadam baliau saurang budak, manuangan aia untuak bauluak. Dek si khadam ko takantuak juo lai baru, indak sangajo katiko manuangan aia pauluak tu, tasiram gamis Abu Musa sainggo basah kuyuik. Patuik rasono kok bangih baliau. Nan budak ko alah maraso pulo bahaso iyo ka kanai bangih ano agakno. Tapi takana dino potongan ayat-ayat ko lalu dibacono. 'Al kaazhimiinal ghaizha = urang-urang nan manahan bangihno' jano. Indak jadi bangih Abu Musa. Dikecek-anno pulo baitu, 'indak bangih den ka awaang doh,' jano. Disambuang pulo dek si budak tu, ' Wal 'aafiina 'aninnaas' = sarato urang nan pamaaf ka urang banyak. Kecek Abu Musa pulo tasanyum, ' alah den maafan awaang.' Disambuang no juo baru ciek lai, 'Wallaahu yuhibbul muhsiniin' = Dan Allah manyukoi urang-urang nan bauek baiak' jano. Aa jawab Abu Musa sudah itu, ' sajak kini nangko awaang den jadian urang mardeka, alah kasanang ati ang.' Mardeka no nan jadi walaupun cako alah patuik kok kanai bangih dek tuan no. Sarupo itulah pamahaman Abu Musa taradok ayat 134 surek Ali Imran tu, inginno tamasuak kadalam golongan urang nan dikecek-an Allah sabagai urang nan bataqwa. Masih ado sambuanganno ciek lai tando-tando urang nan bataqwa ko, tapi alah di ayat barikuik talatakno. Yoitu, 'Urang-urang nan bilo talanjua babuek doso atau maaniayo ka dirino sandiri, mareka capek babaliak mangana Allah, sudah itu capek mareka mintak ampun ateh doso-dosono cako. (sampai akhir ayat)'. Talanjuano badoso, lah salahno, alah aniayono ka dirino, sudahtu capekno takana kapado Tuhan Allah, mamintak ampunno sakali. Mako adolah Allah Maha Pangampun. Bara juo ka gadang doso, bara juo ka banyak doso taradok Allah, mintak ampun awak, pasti diampuni Allah.' Sarupo itulah kaji buya Abidin nan sakali ko. Sudahtu sarupo biaso diadokan tanyo jawab. Batanyolah Bagindo Baro nan kini alah sato pulo duduak mangaji di musajik Gurun ko. 'Batanyo ambo ciek nyiak,' jano mamuloi. 'Barapun juo gadang doso, kalau awak mintak ampun, diampuniNo awak di Tuhan Allah. Jadi urang-urang maliang gadang, nan maambiak pitih nagara, nan alah hiduikno sapueh-pueh hati jo arato nan diciluikno tu, sudah tu biko mintak ampunno ka Tuhan Allah, diampuniNo di Tuhan. Kan ka lamak sangaik dino du nyiak. Masuak sarugo juo no du langsuang biko?' 'Nan diampuni Allah langsuang tu katiko surang urang mintak ampun adolah doso ka Tuhan Allah. Aa conto doso ka Tuhan Allah? Awak di parintah Tuhan Allah sumbayang, puaso, mambayia zakaik, indak dikarajoan kasadoanno tu. Sumbayang indak, puaso indak, mambayia zakaik indak. Awak dilarang Tuhan Allah minum tuak, dilarangNo baampok, dilarangNo mamakan barang-barang nan haram. Dikarajoan kasadoanno tu. Sampai suatu katiko dapek hidayah urang nan sarupoko, mintak ampunno ka Tuhan Allah sabana-bana mintak ampun. Sudah itu nan maa nan parintah Allah dikarajoanno lai, nan maa nan dilarang Allah diantianno lai, mako urang sarupo iko diampuni dek Allah. Sadangkan urusan antaro sasamo manusia, Allah baru ka maampuni apobilo alah bakarilahan awak jo sasamo manusia. Di sakik-i urang, kalau alun mintak maaf awak, kalau alun dimaafanno awak, mako alun diampuni Allah urusan nan sarupo iko. Masih badoso awak, masih ka dapek hukuman di narako awak isuak dek karano itu. Jadi kok diciluik pitih nagara, pitih rakyaik sanagara, sudah itu awak indak dimaafan dek rakyaik nan banyak, mako jadi doso nan sarupo itu, indak kadiampuni Allah sabalun urang banyak ko mamaafan. Jadi indak main-main itu urusanno antaro awak samo awakko. Itulah mangko dianjurkan bana dek Tuhan Allah supayo awakko pamaaf, supayo murah pulo urang lain mamaafan awak. Baa agak ati Bagindo tu?' "Iyolah nyiak. Sasuai sin ambo du. Ko gomah ciek nyiak, maoh-an lah ambo, salamoko acok ambo cimee-an pangajian inyiak ko. Lah badoso ambo ka inyiak,' kecek Bagindo Baro basungguah-sungguah. 'Ambo maafan,' jawek buya Abidin singkek. 'Ambo kabatanyo pulo ko mah buya,' kecek etek Nurbaini pulo. ' Di pangajian sabalunko ado buya sabuik bahaso urang nan alah talanjua bazina, mintak dihukum ka nabi SAW sabagai urang nan sangaik bariman. Baa pulo tu buya, kalau inyo urang nan sangaik bariman tantu indak ka bazinanyo, baa pulo katarangannyo tu buya.' 'Nampak tinggino nilai iman urangko katiko awakno datang mangaku ka Rasulullah SAW mangecek-an nan bahaso ano alah bazina, sarato siap manarimo hukuman. Sabab alah didangano firman Tuhan Allah apo hukuman bagi urang nan bazinatu (Surek An Nur ayat 2). Alah didangano pulo katarangan dari Rasulullah SAW tantangan hukuman rajam bagi urang nan bazina. Perbuatan zinano tu indak ado ampek urang sasi doh. Nan tahu hanyo ano, laki-laki nan manzinaino sudah tu Allah. Kalaulah no nak tanang-tanang sajo, kecek-anlah mintak ampun sajo kapado Allah, cukuiklah Allah sajo nan katahu. Tapi itu indak cukuik dino. Ano takuik jo azab sarato hukuman Allah nanti di akhiraik. Bialah kini ditarimono di duniako hukuman sasuai jo katatapan Allah. Disinanlah tampak katinggian nilai imanno kapado Allah, kapado Rasulullah, kapado ayat-ayat Allah. Katiko kudian urang padusiko dihukum rajam, dipungkang-I jo batu sampai mati dek urang basamo-samo, diantaro nan sato mamungkang tu ado nan mangaluakan kato-kato kasa, mahinokan urang padusitu, ditagua dek nabi. Angkau jaan mahinokan urangko, nilai imanno jauah labiah tinggi dari angkau, kecek nabi ka urang tu. Baa kiro-kiro buk Ben?' tanyo buya Abidin manutuik pangajian. _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
