Assalamu'alaikum.w>
.... kito sambuang pulo baliak.....
Sudah tu diturunkan ka kubua, wakatu malatakkan jenzah
tu, ambiak 3 kapa tanah.
Minhaa khalaqnaakum Dari tanah engkau dijadikan.
Wa fiiha nu-idukum dan kepada tanah engkau
dikembalikan
Waminhaa nukhrijukum taaratan ukhraa, dan kelak dari
tanah juga kamu akan dibangkitkan semula. Diciumkan ka
jenazah tu .
Mukasuiknyo, ambiak tanah 3 kapa, sakapa diciumkan,
Daulu engkau datang dari tanah
Cium nankaduo, Sekarang kembali masuk dalam tanah
Cium nan katigo Nanti bangkit dari tanah juga
Dibuliahkan isteri atau suami mancium suami tu.
Indak mambatakan udhuak.
Karano satangah-satangah urang mangecekkan, "... ee
jaan...jaaan bata udhuak".
Nan bata udhuak tu urang iduik, urang mati indak ado
hukumnyo doh. Adolo nan mangecekkan manitiak aia
mato, sadiahnyo. Indak,... indak ado kanai manganai jo
nan mati tu doh. Aia mato bukan najis, tapi jan
diminum pulo aia mato tu.
Sudah tu ditutuik jo tanah, dan andaklah jo tanah nan
disinan juo, bakeh panggalian tadi, indak buliah jo
tanah lain. Dan sunat ditinggikan sajangka. Mako
urangpun baliak.
Kecek Nabi saw., badoalah untuak si mati,karano inyo
akan ditanyo.
Kito baliak sabanta ka sumbayang urang untuak urang
mati ko.
Saelok-eloknyo ampek puluah urang, kalaulah
disumbayangkan dek 40 urang, mako si mati dapek
syafaat. Nabi saw. bersabda, "Maa miin muslimiin
yamuutu, fayusal lu alaihi arbaina,
La yusykur billah illa syafa-a humullah. Tidak ada
orang Islam yang mati yang disembahyangkan 40 orang,
melainkan Allah memberi syafaat kepada orang mati itu.
Jadi aratinyo memang digalakkan manyumbayangkan
rami-rami, (bukan manggalak-galakkan).
Yang afdhal imamnyo adolah anaknyo sendiri, atau
keluarga terdekat. Kalau isteri, suami yang lebih
afdhal. Tapi kadang-kadang abak atau amak mati, anak
duduak di lua.
"Ndak sumbayang .....?"
"Sumbayanglah" keceknyo pulo.
Inyo kadang-kadang tukang mambaokkan pitih untuak
urang nan sumbayang sajo nyo.
Itu sababnyo awak harus baraja baa manyumbayangkan
jenazah ko.
Bia awak jadi imam, ndak payah bana do, murah.
Ndak usah tuan-tuan maapa panjang-panjang, kalau
indak taapa. Awak lah gaek-gaek ko maapa
panjang-panjang kan susah.
Nieknyo, "Sengaja aku shalat ke atas mayat ini, 4
takbir fardhu kifayah karena Allah taala".
Jan disabuik ampek rakaat, beko rukuak pulo dinyo.
Allahu akbar,
Baca fatihah
Allahu akbar
Shalawat, "Allahuma shalliala muhammad"
Allahu akbar
Allahumagh fir lahu
Allahu akbar..
.....cukuik
Assalamualaikum.w.w.
Kalau padusi Allahumagh fir lahaa
Sudah, kan shah tu !.
Urang-urang nan duduak di lua-lua musajik tu suruah
sumbayang kasadonyo. Bilo paralu ajakan.
Maknanyo, itu sebagai suatu hadiah nan terakhir untuak
si mati. Dan iko memang digalakkan, disuruahkan.
Mudah-mudahan tibo di awak nantik lai pulo labiah dari
40 urang manyumbayangkan awak.
Nan sayang di awak, urang nan disumbayangkan indak
pernah sumbayang, iko nan paliang malang.
Kito baliak baliak.
Sasudah dikubua kito baliak pulang. Suatu hari Nabi
saw. datang ka kubua, mendoakan duo kubua. Batanyolah
para sshabat, "Yaa rasulullah, apa sebabnya dua kubur
ini saja yang engkau doakan ?". Dijawek dek nabi "
Kedua orang ini sedang diazab, yang pertama dia ini
rajin sembahyang tapi tidak beristinjak, yang kedua
orang ini suka mengadu domba orang".
Urang nan ndak baistinjak, disampiang iyo indak
baistinjak ado pulo urang, nyo bukan ndak baistinjak,
tapi nyo buang aia ndak lancar. Sadang sumbayang,
rukuak, manitiak satitiak. Katagak, malu, bataruih-an
juo sumbayang. Urang takah iko akan diazab. Untuak
urang-urang nan takah iko, kok ka sumbayang jan buang
aia. Takaja-kaja jaan. Kalau buang aia, Bialah buang
aia sa jam, satangah jam ndak baa, atau hantakkan kaki
40 kali, jogging ditempat kecek rangkini.
Insya Allah baranti nyo tu. Memang urang tuo-tuo
saluran tu lah sampik, atau memang dari ketek dapek
keadaan nan takah iko. Kalau sadang sumbayang
manitiak, tagak lah, baranti sajo lah,
Jan malu pulo, dek karano "Inna azaaban dunya ahwam
min azaabil akhirah" Azab dunia lebih ringan daripada
azab akhirat, di dunia ko malu sajo nyo. Di akhirat
nantik ?. Ciek lai apo pulo nan kadimalukan awak
sakik. Atau caronyo takah iko, supayo urang indak
nampak, tutuik iduang, seolah-olah iduang tu badarah.
Kan ndak tahu urang tu do.
Kito taruihkan.
Masuak dalam kubua, duo kali galok. Galok dalam kubua,
dan galok malam. Alah kito sabuik sabalun ko, nan
maikuti mayat tu tigo, isteri/suami atau keluarga
ikuik, harato ikuik, amalan ikuik. Duo baliak, ciek
tingga. Dulu, jo pangkek-pangkek di baok urang ka
kubua, Kapten, letnan, jendral, kopral, jabatan
gubernur,menteri dan sebagainyo. Ka mancaliak kan ka
Mungkar Nangkir jabatan banyak, pangkek tinggi.
Cubo tuan-tuan pikia, kana dibaok tu, pangkek-pangkek
tinggi, jabatan tinggi ?, pakai tembak mariam pulo tu
?. Buliah Mungkar Nangkir lari lintang pukang ?.
Peduli aa malaikat. Ndak ka adoh tu doh, mungkin
labiah susah pertanyaan dibueknyo. Kana jabatan ?.
Pertanyaan akan tetap tibo. Urang Islam ditanyo 7 hari
7 malam, urang kapia 40 hari 40 malam. Wakatu urang
lah malangkah pai. Kecek urang 7 langkah, tapi alun
basuo hadits atau carito ko lai doh. Umumnyo memang
urang akan pai, tapi pai ndak pai urang, malaikat akan
tetap tibo batanyo. Jan tuan-tuan tunggu pulo, buliah
malaikat ndak datang. Malaikat ka tibo juonyo, ndak
peduli. Nan tingga amalan-amalan, sumbayang di
kapalo, zakat di kida, puaso di suok, amalan-amalan
lain subalah kaki. Iko nan ka mangawal kito dari
pertanyaan malaikat.
Kalau lah tajawek, mako malaikat mangatokan.
"Nuumu naumatal arusy"
Tidurlah kamu sebagaimana tidurnya penganten baru.
Tampeknyo diubah dari kubua manjadi sebagian sarugo,
mako dibukaklah pintu sarugo, pintunyo
sajo, alun masuak sarugo lai. Dan dilapangkan kubuanyo
sasayuik-sayuik mato mamandang.
(Dalam alam barzah, bukan alam dunia dalam kubua tu).
Kalau urang maksiat, indak dapek manjawek. Mako
diampoklah inyo jo panggado, dan diantakan
binatang-binatang babiso untuak menyeso. Mako
maraunglah urang dalam kubua tu, tapi indak didanga
dek jin jo manusia, binatang-binatang nan mandanga.
Pernah Nabi lalu kak kubua tu, taduduak-taduduak unto
Nabi dek mandanga suaro pakiak urang dalam kubua.
Sampai hari kiamat.
Roh tu naiak ka langik, sudah tu diantakan ka kubua
baliak untuak manjawek pertanyaan. Makonyo barado
diantaro iduik jo mati. Kutiko lah sampai, mako
tabukak matonyo (di alam barzah), katiko itu aia
matonyo manitiak (di alam barzah), taraso dek nyo lah
mati nyo ruponyo.
Wakatu mati, sasudah sakik tacabuik nyao tu, ndak
taraso lai doh, ndak tahu lai doh. Samo jo
Urang lalok, katiko takalok indak tahu, lah jago baru
tahu, eh takalaok den dimuko TV ko haa. Lah jago baru
tahu. Samo jo urang mati sadang lalok, tau-tau lah
dalam kubua sajo. Itu makonyo tuan-tuan malam-malam,
kalau lah masuak ukatu Isya, sumbayanglah, jan lalok
lo dulu. Memang buliah indak ado larangan, Indak
salah. Cuma khawatir beko, lalok baniek sumbayang
pukua tigo, sadar-sadarlah, "Maa rabbuka"... baa gak
agak. Alah dalam kubua.
Mako duduaklah, di dalam kubua tu manunggu hari
kiamat, antah bara ribu tahun. Bagi urang nan sanang,
sabanta dek nyo dek karano maraso kenikmatan di alam
barzah. Bagi urang nan kanai azab, ukatu manjalang
kiamat tu, indak dapek aka lamonyo doh taraso dek
inyo, itupun
Dengan harapan akan bebas dari azab, tapi sabananyo
kecek Nabi, Alam barzah adolah permulaan, kalau
selamat, mako salamaik sampai ka sarugo, bilo indak,
di akhirat labiah barek lai siksaan.
Alam barzah ko bukan berarti kubua sajo, cuma dek
kebiasaan, acok di sabuik alam kubua. Kok urang mati
tabanam dilauik baa ?, panek lo Munkar Nangkir ka
mancari ?. Kok urang nyo makan dek rimau baa ?.
Malaikat masuak dalam paruik rimau tun ?.
"Dimaa lo lah nyo ko aa ".... baitu ?...
Ndak,... tiok urang mati, rohnyo memasuki alam
barzah.
Ndak peduli jo maiknyo lai doh, nan ka ditanyo roh tu.
Tampek nyo di alam barzah. Nan kanai seso roh tu...
... ooo kalau bitu ndak baa tu do sutan,... roh nyo
nan kanai seso nyo. ... aaiiii....
Kok sakik awak nan sakik sabananyo sia ?, roh ko
jasad ?. Kanai dek pisau tangan misalnyo. Nan sakik
sia ?, tangan tu nan sakik atau roh awak nan maraso
sakik ?.
Tiko urang lalok diresek ndak taraso dek inyo doh, dek
aa ?. Dek roh nyo ndak ado. Jadi nan maraso sakik tu
roh sabananyo. Nah, kalau roh tu bana nan kanai ampok
dek panggado barapi malaikat Munkar Nangkir, ndak ka
sakik ?. Aaaa.... bapikialah elok-elok.
Kito yakini sajo lah talqin tu bahaso,
Allah itu benar, Muhammad itu benar,... Azab qubur itu
benar. Jan tapangaruh pulo dek urang-urang nan
mangecekkan azab kubua(alam barzah) tu ndak ado.
Inna 'azabil qabri haq. (Sesungguhnya 'azab kubur itu
benar adanya).
Kito cukuikkan dulu, Alam roh ko singan iko,
salanjuik, apo nan tajadi sasudah tu, baa kejadian
kiamat, hari berhisab, apo nan ado dalam sarugo, baa
nan tajadi di narako. Kito sambuang nantik kok lai ado
ukatu. Sampai jumpa lagi dalam frekwensi dan gelombang
yang sama.
Wa billahil hidayah wat taufiq
Wassalam
St. Sinaro.
____________________________________________________
Start your day with Yahoo! - make it your home page
http://www.yahoo.com/r/hs
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
